விருந்துக்கு அழைக்கப்பட்ட ஊழியர்கள்!! டேபிள் நிறைய கொட்டி கிடந்த பணம்!! அப்புறம் நடந்தது தான் டிவிஸ்ட்!!

வழக்கமாக நிறுவனங்கள் தங்களுக்கு கிடைக்கக்கூடிய லாபத்தில் ஒரு குறிப்பிட்ட பகுதியை ஊழியர்களுக்கு பகிர்வது வாடிக்கை. பண்டிகை காலங்களில் போனஸ் வழங்குவது, நிறுவனத்தின் ஐந்து ஆண்டு கொண்டாட்டம், பத்தாண்டு கொண்டாட்டம் என தனியாக கொண்டாட்டங்களை நடத்தி அதில் ஊழியர்களை தேர்ந்தெடுத்து கார் போன்ற பரிசுகளை வழங்குவதை நாம் பார்த்திருக்கிறோம். ஆனால் இங்கே ஒரு நிறுவனம் செய்த செயல் ஊழியர்களை திக்குமுக்காட வைத்துவிட்டது.

சீனாவை சேர்ந்த ஒரு நிறுவனத்தில் தான் இந்த சம்பவம் நடந்திருக்கிறது. இந்த வீடியோ சமூக வலைத்தளங்கள் எங்கும் தற்போது வைரலாகி இருக்கிறது. சீனாவில் செயல்பட்டு வருகிறது Henan Kuangshan Crane Co என்ற நிறுவனம். கடந்த 2002ஆம் ஆண்டு தொடங்கப்பட்ட இந்த நிறுவனம் கிரேன்கள் உற்பத்தி மற்றும் விற்பனையில் ஈடுபடுகிறது. இந்த நிறுவனம் தங்களுடைய ஊழியர்களுக்கு ஒவ்வொரு ஆண்டு இறுதியிலும் விருந்து அளித்து உபசரிப்பது வழக்கம்.

அந்த வகையில் இந்த ஆண்டுக்கான விருந்து நிகழ்ச்சியில் நிறுவனத்தின் முதலாளி Cui Peijun ஊழியர்கள் அனைவரையும் திக்கு முக்காட வைத்து விட்டார். இந்த நிகழ்ச்சியில் நிறுவனத்தில் வேலை செய்யக்கூடிய சுமார் 7000 ஊழியர்கள் பங்கேற்றனர். நிறுவனத்தின் தலைவர் கியூ பை ஜூன் கலந்து கொண்டு ஊழியர்கள் மத்தியில் உரையாற்றினார். அப்போது நிறுவனம் கடந்தாண்டை விட இந்த ஆண்டு பெருமளவு லாபம் ஈட்டி இருக்கிறது என அப்போது அவர் குறிப்பிட்டார். நிறுவனத்தின் லாபத்தில் 70 சதவீதத்தை ஊழியர்களாகிய உங்களுக்கு தான் பிரித்து தரப் போகிறேன் என அப்போது அவர் அறிவித்தார்.

விருந்து நடைபெற்ற நிகழ்ச்சியில் ஒரு டேபிள் போட்டு அந்த டேபிள் முழுவதும் சீன நாட்டு கரன்சியை கொட்டி வைத்திருந்தார்கள். உங்களுக்கு எவ்வளவு தேவையோ அவ்வளவு அள்ளிக் கொள்ளுங்கள் நீங்கள் எவ்வளவு பணத்தை எடுக்கிறீர்களோ அத்தனையும் உங்களுக்கே சொந்தம் என அறிவித்தார். இதனை அடுத்து ஏராளமான ஊழியர்களும் போட்டி போட்டுக்கொண்டு டேபிளில் இருந்த பணத்தை அள்ளிச் சென்றனர். கைகளில் அள்ளிய பணம் முழுவதும் அவர்களுக்கே வழங்கப்பட்டதாம். மொத்தம் 26 மில்லியன் அமெரிக்க டாலர்கள் இப்படி போனஸாக வழங்கியுள்ளார்.

நிறைய பேர் தூக்க முடியாமல் கையில் பணத்தை தூக்கி செல்லும் வீடியோக்கள் சமூக வலைதளங்களில் வெளியாகியுள்ளன. இந்த நிறுவனம் ஊழியர்களுக்கு மிகச்சிறந்த முறையில் பரிசு வழங்குவதில் புகழ்பெற்றதாக இருக்கிறது. ஒவ்வொரு ஆண்டும் ஊழியர்களுக்கு நெக்லஸ், மோதிரம் உள்ளிட்டவற்றை பரிசாக வழங்கி வருகிறது. இந்த முறை வித்தியாசமாக பணத்தை வழங்கி இருக்கிறது. பணமாக கொடுத்தால் வங்கி கடன்களை அடைப்பது, வீட்டுக்கு தேவையான பொருட்களை வாங்க உதவுவது என அவரவர் தேவைக்கு ஏற்ப பயன்படுத்தி கொள்வார்கள் என இந்நிறுவன தலைவர் கூறியுள்ளார்.