லண்டன்: பிரிட்டன் நாட்டின் பொருளாதார வளர்ச்சியில் அந்நாட்டு அரசு முக்கிய முடிவுகளை எடுக்க உள்ள நிலையில், பிரதமர் டேவிட் கேமரூன் உலகின் மிகப்பெரிய ஆன்லைன் வர்த்தக நிறுவனமான அலிபாபாவின் தலைவர் ஜேக் மா அவர்களைப் பிரிட்டன் நாட்டின் வர்த்தக ஆலோசகராக நியமித்துள்ளார்.
சீன அதிபர் ஜி ஜின்பிங், 4 நாள் சுற்றுப்பயணமாக இங்கிலாந்து செல்ல உள்ள நிலையில் பிரிட்டன் அதிபரிடம் இத்தகை அறிவிப்பு வெளியாகியுள்ளது குறிப்பிடத்தக்கது.
டேவிட் கேமரூன்
பிரிட்டன் பிரதமர் டேவிட் கேமரூன் அவர்களின் செய்திதொடர்பாளர் கூறுகையில், அலிபாபா என்னும் ஆன்லைன் வர்த்தக நிறுவனத்தின் தலைவரான ஜேக் மா பிரதமரின் வர்த்தக ஆலோசனை குழுவில் இடம்பெற்றுள்ளது.
மேலும் இவர் நாட்டின் வர்த்தகம் மற்றும் பொருளாதாரத்தை மேம்படுத்தும் திட்டங்களை வடிவமைப்பதிலும், ஆலோசனையிலும் இடம்பெறுவார் எனத் தெரிவித்தார்.
சீன சந்தை
பிரிட்டன் நிறுவனங்களின் தயாரிப்புகள் அலிபாபா போன்ற ஈகாமர்ஸ் நிறுவனங்களின் மூலம் சீனா சந்தையில் எளிதாகத் தங்களது வர்த்தகத்தை மேற்கொள்கிறது. இதனால் நாட்டின் ஏற்றுமதி அளவு கணிசமாக உயர்ந்துள்ளது எனப் பிரதமரின் செய்தி தொடர்பாளர் தெரிவித்தார்.
வர்த்தக ஆலோசக குழு
இங்கிலாந்து பிரதமரின் வர்த்தக ஆலோசக குழுவில், அந்நாட்டின் முன்னணி நிறுவனங்களான ரோல்ஸ் ராய்ஸ், ஈஸிஜெட் உள்ளிட்ட 19 நிறுவனங்களின் தலைமை செயல் அதிகாரிகள் கொண்ட குழு உருவாக்கப்பட்டுள்ளது. இதில் ஜேக் மா அவர்களும் தற்போது இடம்பெற்றுள்ளார்.
சீனா - பிரிட்டன் நட்புறவு..
உலகின் 2 ஆவது மிகப்பெரிய பொருளாதாரம் கொண்ட நாடாகக் கருதப்படும் சீனாவுடன், பொருளாதார ரீதியில் நட்புறவை பேண இங்கிலாந்து முடிவு செய்துள்ளதாக இங்கிலாந்து பிரதமர் அலுவலகம் தெரிவித்துள்ளது.