அமெரிக்க டாலர் செயலிழந்தால் இனி பிசினஸ் செய்ய முடியாது.. பிரிக்ஸ் நாடுகளை எச்சரித்த டிரம்ப்..!!

அமெரிக்க டாலரை வலுவிழக்கச் செய்ய சில நாடுகள் நடவடிக்கை எடுத்தால், 100 சதவீத வரி விதிக்கப்படும் என புதிதாக தேர்ந்தெடுக்கப்பட்டுள்ள அமெரிக்க அதிபரான டொனால்ட் டிரம்ப் எச்சரித்துள்ளார். பிரேசில், ரஷ்யா, இந்தியா, சீனா, தென்னாப்பிரிக்கா, எகிப்து, எத்தியோப்பியா, ஈரான் மற்றும் ஐக்கிய அரபு எமிரேட்ஸ் உள்ளிட்ட பிரிக்ஸ் நாடுகளுக்கு அவர் இந்த அச்சுறுத்தலை விடுத்துள்ளார். துருக்கி, அஜர்பைஜான் மற்றும் மலேசியா ஆகிய நாடுகளும் இந்தக் குழுவில் உறுப்பினராக விண்ணப்பித்துள்ளன. மேலும் பல நாடுகளும் இதில் சேர விருப்பம் தெரிவித்துள்ளன.

உலகளாவிய வர்த்தகத்தில் அமெரிக்க டாலர் முக்கிய இடத்தைப் பெற்றுள்ளது. இது உலகில் அதிகம் பயன்படுத்தப்படும் நாணயமாகும். சர்வதேச நாணய நிதியத்தின் (IMF) கூற்றுப்படி, உலகளாவிய அந்நியச் செலாவணி கையிருப்பில் டாலர் சுமார் 58 சதவீதத்தைக் கொண்டுள்ளது. மேலும் எண்ணெய் போன்ற முக்கிய பொருட்களும் டாலர்களில் வர்த்தகம் செய்யப்படுகின்றன. இருப்பினும், பிரிக்ஸ் நாடுகளின் மொத்த உள்நாட்டு உற்பத்தி தொடர்ந்து அதிகரித்து வருகிறது. மேலும் இந்த நாடுகள் டாலருக்கு பதிலாக பிற நாணயங்களில் வர்த்தகம் செய்ய திட்டமிட்டுள்ளன. இது டி-டாலரைசேஷன் என்று அழைக்கப்படுகிறது. இது டாலரின் ஆதிக்கத்திற்கு சவால் விடலாம் என்று கூறப்படுகிறது.

பிரிக்ஸ் மற்றும் பிற வளரும் நாடுகள் அமெரிக்க டாலர் மீதான அமெரிக்காவின் கட்டுப்பாட்டை பொருளாதார ரீதியாக பலவீனப்படுத்துகிறது என்று கூறுகின்றன. இந்த நாடுகள் புதிய கரன்சியை உருவாக்க மாட்டோம் அல்லது அமெரிக்க டாலருக்கு பதிலாக எந்த கரன்சியையும் ஆதரிக்க மாட்டோம் என்று உறுதியளிக்க வேண்டும் என்று டிரம்ப் தனது ட்ரூத் சோஷியல் பதிவில் கூறியுள்ளார். அப்படிச் செய்யாவிட்டால், அவர்கள் மீது 100 சதவீத வரி விதிக்கப்பட்டு, அமெரிக்க சந்தையில் வியாபாரம் செய்ய முடியாது என கூறியுள்ளார்.

ரஷ்ய ஜனாதிபதி விளாடிமிர் புடின், அக்டோபர் மாதம் நடந்த பிரிக்ஸ் மாநாட்டில் அமெரிக்கா டாலரை ஆயுதமாக்கியது என்று குற்றம் சாட்டினார். இது பெரும் தவறு என்று கூறினார். வணிகம் செய்வதிலிருந்து அமெரிக்கா தடுத்தால், ரஷ்யா வேறு வழிகளைத் தேடுவதைத் தவிர வேறு வழியில்லை என்று புடின் கூறினார்.

உலக வர்த்தகத்தில் அமெரிக்க டாலருக்கு எந்த நாடும் சவால் விட முடியாது என்று டிரம்ப் கூறினார். டாலரை மாற்ற முயற்சிக்கும் எந்த நாடும் அமெரிக்காவிடம் விடைபெற தயாராக இருக்க வேண்டும் என்றார். எதிர்காலத்தில் அமெரிக்க டாலர் அதன் உலகளாவிய கையிருப்பு நாணய நிலையை தக்கவைத்து மற்ற நாணயங்களில் ஆதிக்கம் செலுத்தும் என்று நிபுணர்கள் நம்புகின்றனர்.

மெக்சிகோ மற்றும் கனடாவில் இருந்து இறக்குமதி செய்யப்படும் பொருட்களுக்கு முறையே 25 சதவீதம் மற்றும் 10 சதவீதம் கூடுதல் வரி விதிக்கப்படும் என டிரம்ப் மிரட்டிய நிலையில் இந்த எச்சரிக்கையும் விடப்பட்டுள்ளது. சட்டவிரோத குடியேற்றம் மற்றும் போதைப்பொருள் கடத்தலை தடுக்க இந்த நடவடிக்கை எடுக்கப்பட்டுள்ளது.

சமீபத்தில், டிரம்ப் மெக்சிகோ ஜனாதிபதி கிளாடியா ஷீன்பாமுடன் பேசிய நிலையில், அவர் நம்பிக்கை அளிப்பதாக தெரிவித்துள்ளதாக கூறப்படுகிறது. அதே நேரத்தில், கனடாவின் பிரதமர் ஜஸ்டின் ட்ரூடோ, டிரம்பை சந்தித்த பிறகு உறுதியான உத்தரவாதம் ஏதுமின்றி திரும்பினார் என்று கூறப்படுகிறது.