ஈரான் கொடுத்த சர்ப்ரைஸ்.. ஜப்பானுக்கு செம ஹேப்பி.. ஒரே நேரத்தில் 10 கப்பல்!

உலக எண்ணெய் வர்த்தகத்தின் முக்கிய வழித்தடமாக இருக்கும் ஹார்முஸ் ஜலசந்தியில் நீண்ட நாட்களாக வெளியேற முடியாமல் முடங்கியிருக்கும் பெரும் கப்பல் கூட்டம் இப்போது தனது பயணத்தை தொடங்கியுள்ளது.

ஈரான் ஒப்புதல் கொடுத்த பாதையில் ஜப்பான் தொடர்புடைய 10 கப்பல்கள், அதில் 6 விஎல்சிசி (மிகப் பெரிய எண்ணெய் கப்பல்கள்) உட்பட, சுமார் 1.2 கோடி பேரல் சவுதி, ஐக்கிய அரபு அமீரகம் மற்றும் கத்தார் நாட்டின் கச்சா எண்ணெயை கொண்டு செல்கின்றன. இந்தக் கப்பல்கள் சுமார் 100 நாட்களாக ஹார்முஸ் பாதையில் சிக்கியிருந்த நிலையில் இப்போது வெளியேறியுள்ளன.

பெரிய ஜப்பான் எண்ணெய் சப்ளை

இஸ்ரேல் - ஈரான் போர் தொடங்கியதிலிருந்து ஜப்பான் தொடர்புடைய எண்ணெய் கப்பல்கள் இவ்வளவு அதிக எண்ணிக்கையில் முதல் முறையாக இந்தப் பாதையில் செல்கின்றன. ஈரான் புரட்சிக் காவல் படை (ஐஆர்ஜிசி) அமெரிக்க ஆதரவு ஓமன் பாதையை மூடியதைத் தொடர்ந்து, இந்தக் கப்பல்கள் ஈரான் அனுமதித்த பாதையைப் பயன்படுத்தி சென்றுள்ளன. ஓமன் பாதையில் தற்போது மிகக் குறைந்த அளவிலேயே கப்பல் போக்குவரத்து நடைபெறுவதாகத் தகவல்கள் தெரிவிக்கின்றன.

ஹார்முஸ் ஜலசந்தி மூலம் உலகின் பெரும்பாலான எண்ணெய் வர்த்தகம் நடைபெறுவதால், இந்தக் கப்பல்களின் இயக்கம் சர்வதேச எண்ணெய் சந்தைக்கு சற்று நிம்மதியை அளித்துள்ளது. ஜப்பான் போன்ற ஆசிய நாடுகள் எண்ணெய் இறக்குமதியை பெரிதும் சார்ந்துள்ள நிலையில், இந்த புதிய சப்ளை ஆசிய நாடுகளின் எரிபொருள் தேவையை பூர்த்தி செய்ய உதவும். இருப்பினும், ஜலசந்தியில் தொடரும் பதற்றம் விலை ஏற்றத்தை ஏற்படுத்தும் அபாயம் இன்னும் நீடிக்கிறது.

போர் தாக்கத்தால் ஏற்பட்ட தாமதம்

கடந்த சில மாதங்களாக ஹார்முஸ் ஜலசந்தியில் ஏற்பட்ட தடைகள் காரணமாக பல கப்பல்கள் நீண்ட நாட்கள் காத்திருக்க வேண்டியிருந்தது. ஈரான் மற்றும் அமெரிக்க-இஸ்ரேல் இடையேயான மோதல் இந்தப் பகுதியில் கப்பல் போக்குவரத்தை பாதித்துள்ளது. தற்போது ஈரான் பாதையில் கப்பல்கள் செல்ல அனுமதி கிடைத்திருப்பது, சர்வதேச கப்பல் நிறுவனங்களுக்கு புதிய நம்பிக்கையை ஏற்படுத்தியுள்ளது.

இந்த நிகழ்வு உலகப் பொருளாதாரத்தின் மீது ஹார்முஸ் ஜலசந்தியின் முக்கியத்துவத்தை மீண்டும் நினைவூட்டுகிறது. இந்தியா உள்ளிட்ட பல நாடுகளும் இந்தப் பகுதியிலிருந்து எண்ணெய் இறக்குமதி செய்வதால், இங்கு ஏற்படும் மாற்றங்கள் உள்நாட்டு எரிபொருள் விலைகளையும் பாதிக்கும். சர்வதேச அரசியல் சூழல் அடுத்த கட்டத்தை எப்படி நிர்ணயிக்கும் என்பதைப் பொறுத்தே எண்ணெய் சந்தையின் எதிர்காலம் அமையும்.