நீங்க ஒரு அடி வச்சா நாங்க 10 அடி வைப்போம்.. அமெரிக்காவை மிஞ்சும் சீனா..!

சாட் ஜிபிடிக்கு போட்டியாக சீனா உருவாக்கிய டீப் சீக் குறித்து தான் உலகம் முழுவதும் தற்போது பேசப்பட்டு வருகிறது. அமெரிக்கா உள்ளிட்ட நாடுகளை சேர்ந்த பெரிய நிறுவனங்களின் கண்டுபிடிப்புகளை காப்பி அடித்து அதே போன்ற ஒரு பொருளை உருவாக்கி விடும் என பெயர் பெற்றது தான் சீனா. ஆனால் காபிகேட்டாக இருந்த சீனா தற்போது புதுமையான கண்டுபிடிப்புகளின் நாடாக மாறி வருகிறது. இதற்கு உதாரணமாக பல்வேறு அண்மைக்கால அறிவிப்புகளை கூறலாம்.

கடந்த மாதம் தான் சீனா தன்னுடைய புதிய இரும்பு உருவாக்கும் தொழில்நுட்பத்தை அறிமுகம் செய்தது. இதன் மூலம் மற்ற நாடுகளை விட தங்கள் நாடு 3,600 மடங்கு வேகமாக இரும்பினை உருவாக்க முடியும் என சீனா இந்த உலகிற்கு நிரூபனம் செய்தது.

இந்த அறிவிப்பு வெளியான சில மாதத்திலேயே புதிய வகையான போர் விமானத்தை அறிமுகம் செய்தது. ஆறாவது தலைமுறை மாடல் கொண்ட இந்த போர் விமானம் உலகிலேயே சக்தி வாய்ந்த ஒரு போர் விமானம் என கருதப்படுகிறது.

அடுத்த சில மாதங்களிலேயே ஒரு நொடிக்கு 100 கிகாபைட்ஸ் அளவிலான டேட்டா டிரான்ஸ்மிஷன் திறன் கொண்ட சேட்டிலைட் டு கிரவுண்ட் லேசர் கம்யூனிகேஷன் என்ற சாதனையையும் சீனா நிகழ்த்தி காட்டியது.

எலான் மஸ்கின் ஸ்டார்லிங்க் செயற்கை கோள்களை விட சீனாவின் இந்த செயற்கைக்கோள் தகவல் தொடர்பு பல மடங்கு வேகமாக இருக்கிறது. இவ்வாறு அமெரிக்கா ஒரு அடி எடுத்து வைத்தால் அதை தாண்டி பல அடி எடுத்து வைத்து அனைவரையும் வியக்க வைக்கிறது சீனா.

ஒரு காலத்தில் சீனா என்றாலே காப்பி அடித்து பொருட்களை உருவாக்கும் நாடு என இருந்த பெயரை அந்நாட்டை சேர்ந்த தொழில்நுட்ப நிபுணர்கள் தற்போது மாற்றி அமைத்துள்ளனர் .அப்படித்தான் சாட்ஜிபிடி உள்ளிட்ட செயற்கை நுண்ணறிவு செயலிகளுக்கு போட்டியாக சீனா உருவாக்கிய டீப் சீக் செயலி உலகம் முழுவதும் தற்போது தொழில்நுட்ப நிறுவனங்களுக்கெல்லாம் பெரிய அச்சத்தை ஏற்படுத்தி இருக்கிறது.

சீனா அரசு மேற்கத்திய தொழில்நுட்பங்களை உள்நாட்டிற்கு கொண்டு வந்து அதற்கு ஈடாக சீனர்களுக்கு தொழில் பயிற்சி வழங்கியது இதற்கு முக்கிய காரணம் என சொல்லப்படுகிறது. 10 ஆண்டுகளுக்கு முன்பு இருந்த சீனா வேறு ,தற்போது இருக்கக்கூடிய சீனா வேறு என்கின்றனர் சர்வதேச நிபுணர்கள்.

அலிபாபா ,டென்சன்ட், ஸியோமி உள்ளிட்ட நிறுவனங்கள் மேற்கத்திய நிறுவனங்களின் மாடல்களை உள்வாங்கிக் கொண்டு புதுப்புது கண்டுபிடிப்புகளை அறிமுகம் செய்த வண்ணம் இருக்கின்றன.

வாட்ஸ் அப்பை அடிப்படையாகக் கொண்டு உருவாக்கப்பட்டதுதான் வீசாட் செயலி. ஆனால் டென்சன்ட் நிறுவனம் வீசாட் செயலியை உள்ளூர் மக்களுக்கு ஏற்ற வகையில் மாற்றி அமைத்து. தற்போது அமெரிக்கா உள்ளிட்ட நாடுகளிலும் கூட அது புகழ்பெற்ற செயலியாக மாறி இருக்கிறது. மெடா உள்ளிட்ட பெரு நிறுவனங்கள் எல்லாம் வீசாட் மாடலை அடிப்படையாகக் கொண்டு தங்களுடைய செயல்பாட்டை மாற்றி வருகின்றன.

டிக்டாக் செயலி அமெரிக்காவில் மிக பிரபலமாக இருப்பதையும் இதற்கு ஒரு உதாரணமாக கூறலாம். தங்கள் நாட்டில் அதிக அளவில் ஸ்டெம் எனப்படும் அறிவியல், தொழில்நுட்பம், பொறியியல் மற்றும் கணித பிரிவில் ஏராளமான மாணவர்களை சேர்ந்து கல்வி பயில வைத்தது தொழில்நுட்ப வளர்ச்சிக்கு காரணமாக அமைந்திருக்கிறது.

சர்வதேச சொத்துரிமை கழகம் வெளியிடும் தகவலின் படி பார்க்கும்போது உலக அளவில் ஜெனரேட்டிவ் ஏஐ தொழில்நுட்பத்திற்கான பேடண்ட் எனப்படும் உரிமம் கோரி விண்ணப்பம் செய்யும் கண்டுபிடிப்பாளர்கள் அதிகம் சீனர்களாகத்தான் இருக்கின்றனர். செயற்கை நுண்ணறிவு தொழில்நுட்பத்தில் மிக தீவிரமாக சீன அரசு இயங்கி வருவதும் அது சார்ந்த ஆராய்ச்சிகளை ஊக்குவிப்பதும் இதற்கு காரணம்.

சில ஆண்டுகளுக்கு முன்பு வரை சீனர்கள் தொழில்நுட்ப ரீதியிலான படிப்புகளுக்கும் ஆராய்ச்சிகளுக்கும் அமெரிக்காவிற்கு தான் சென்றனர். ஆனால் தற்போது பலரும் சீனாவிலேயே தங்களின் ஆய்வுகளை மேற்கொள்கின்றனர்.

இதற்கு சீன அரசு ஆய்வுகளை ஊக்குவிப்பது காரணமாகும். சில செயலிகள் மூலம் மேற்கத்திய தகவல்களை உளவு பார்த்தும் சீனா இந்த கண்டுபிடிப்புகளை கொண்டு வருவதாக குற்றச்சாட்டுகள் இருக்கின்றன. இருந்தாலும் எந்த ஒரு கண்டுபிடிப்பிலும் அசைக்க முடியாத ஒரு நாடாக சீனா மாறி வருகிறது.

Story written by: Devika