காஸ்ட்லி காரை வாங்கிட்டு ஃபீல் பண்ணாதீங்க, இந்த சீன தம்பியின் ஐடியா மாஸ்.. தினமும் ரூ.59000 வருமானம்

சீனாவை சேர்ந்த ஒரு இளைஞர் தன்னுடைய ஆடம்பர காரை டாக்சியாக மாற்றி வாடகைக்கு விட்டு ஒரு நாளைக்கு 59 ஆயிரம் ரூபாய் வரை வருமானம் ஈட்டுவது அனைவரையும் ஆச்சரியத்தில் ஆழ்த்தியுள்ளது.

சீனாவை சேர்ந்த யுவான் என்ற முப்பது வயது இளைஞர் தன்னுடைய ஆடம்பர காரை வாடகை காராக மாற்றியிருக்கிறார் அண்மையில் இவர் மெர்சிடிஸ் நிறுவனத்தின் Maybach S480 காரை வாங்கி இருக்கிறார். இந்திய ரூபாயின் மதிப்பில் இது 1.80 கோடி ரூபாய் ஆகும். கடந்த நவம்பர் 1ஆம் தேதி இந்த காரை வாங்கி அவர் பயன்படுத்தியிருக்கிறார். இதனை அடுத்து சமூக வலைதள பக்கத்தில் இந்த கார் குறித்தும் இந்த காரின் சிறப்புகள் குறித்தும் இதில் பயணம் செய்வது மிகச் சிறந்த ஒரு அனுபவத்தை தரும் என்பதும் குறித்தும் தொடர்ச்சியாக வீடியோக்களை வெளியிட்டு வந்தார்.

இந்த சூழலில் அவர் தன்னுடைய இந்த ஆடம்பர காரை வாடகை காராக மாற்றியிருக்கிறார். இந்த வாடகை காரில் ஒரு முறை பயணம் செய்வதற்கு இவர் 59 ஆயிரம் ரூபாய் வசூல் செய்வதாக அந்நாட்டு ஊடகங்கள் செய்து வெளியிட்டுள்ளன. இதற்காக அவர் சமூக வலைத்தள பக்கத்தில் "Old Yuan Drives a Maybach for Ride-Hailing" என்ற பெயரில் ஒரு பக்கத்தை திறந்து இருக்கிறார். இதனை ஒரு லட்சத்துக்கும் அதிகமானவர்கள் பின் தொடர்கிறார்கள்.

யுவான் கடந்த 2019 ஆம் ஆண்டில் இருந்தே இதுபோல ஆடம்பர கார்களை வாங்கிய அவற்றை வாடகைக்கு விட்டு வருகிறாராம். ஏப்ரல் 13ஆம் தேதி இவர் தன்னுடைய சமூக வலைதள பக்கத்தில் வெளியிட்டுள்ள பதிவில் தன்னுடைய ஒரு நாள் எப்படி செல்கிறது என குறிப்பிட்டு இருக்கிறார். அந்த ஒரு நாளில் தன்னுடைய காரை வாடகைக்கு பயன்படுத்தி 40000 ரூபாயை சம்பாதித்து இருப்பதாக தெரிவித்திருக்கிறார்.

தற்போதைக்கு இந்த கார் பெய்ஜிங் மற்றும் ஷாங்காய் நகரில் மட்டுமே வாடகைக்கு கிடைக்கும் என அவர் தெரிவித்திருக்கிறார். ஒரு இணையதளத்திற்கு பேட்டி அளித்திருக்க அவர் காரை வாங்குவதற்காக அவர் 79.7 லட்சம் ரூபாயை டவுன் பேமெண்டாக செலுத்தினாராம். 58.6 லட்சம் ரூபாயை 6 ஆண்டுகளாக தான் சேமித்து வைத்திருந்த பணத்தை எடுத்து வழங்கியிருக்கிறார். மீதமுள்ள பணத்தை கடனாக வாங்கி இருக்கிறார் இதற்காக அவர் ஒரு மாதத்திற்கு 1.7 லட்சம் ரூபாயை ஈஎம்ஐ-ஆக செலுத்துகிறாராம்.

பலருக்கும் இதுபோன்ற உயர் ரக காரில் பயணம் செய்ய வேண்டும் ,சொந்தமாக வாங்க வேண்டும் என்ற ஆசை இருக்கும் .ஆனால் இதன் விலை அவர்களின் ஆசையை நிறைவேற்ற விடாமல் செய்துவிடுகிறது. இது போன்ற காரில் பயணம் செய்வதற்கான ஒரு வாய்ப்பை வழங்க வேண்டும் என்பதற்காகவே இவற்றை வாடகை காராக மாற்றியிருக்கிறேன் என தெரிவித்துள்ளார்.

தனக்கு வரும் வருமானத்தை வைத்துக்கொண்டு மாதாந்திர ஈஎம்ஐ செலுத்துவதாகவும் மீதமுள்ள பணத்தில் தான் சௌகரியமான வாழ்க்கை வாழ்வதாகவும் கூறியுள்ளார். இந்த காருக்காக ஒரு மாதத்திற்கு 35 ஆயிரம் ரூபாய்க்கு எரிபொருள் போடுவதாகவும் அவர் தெரிவித்துள்ளார்.