யூடியூப் , இன்ஸ்டாகிராமுக்கு மாறிய மக்கள்.. டிஆர்பி இல்லாததால் மூடப்படும் மியூசிக் சேனல்கள்!!

தற்போது எங்கு பார்த்தாலும் யாரை பார்த்தாலும் கைகளில் போன் வைத்து கொண்டு இன்ஸ்டாகிராம் , யூடியூப் வீடியோக்களை தான் பார்த்து கொண்டிருக்கிறார்கள். வீட்டில் டிவி ஓடினால் கூட போன் பார்க்கும் மக்களே அதிகம் உள்ளனர். இதனால் தொலைக்காட்சி நிறுவனங்களுக்கு முன்பை போன வியூவர்ஷிப் கிடைப்பதில்லை.

சரியாக 40 ஆண்டுகளுக்குப் பிறகு, பிரிட்டனில் உள்ள MTV அதன் 24 மணி நேர பாப் வீடியோ சேனல்களின் ஒளிபரப்பை நிறுத்தவுள்ளது. இதன் மூலம் இசைத் தொலைக்காட்சியின் ஒரு சகாப்தம் முடிவுக்கு வரவுள்ளது. பிபிசி வெளியிட்ட தகவலின்படி, MTV Music, MTV 80s, MTV 90s, Club MTV மற்றும் MTV Live ஆகிய சேனல்கள் டிசம்பர் 31, 2025-க்குப் பிறகு ஒளிபரப்பப்பட மாட்டாது.

இருப்பினும், முக்கியச் சேனலான MTV HD தொடர்ந்து இயங்கும். இது 'நேக்கட் டேட்டிங் யுகே' மற்றும் 'ஜியோர்டி ஷோர்' போன்ற ரியாலிட்டி நிகழ்ச்சிகளில் கவனம் செலுத்தும். இந்த திடீர் மாற்றத்திற்கான காரணம் என்னவென்றால், நுகர்வோர் இப்போது இசை வீடியோக்களுக்காக தொலைக்காட்சியை விட யூடியூப் மற்றும் பிற சமூக ஊடக தளங்களையே அதிகம் பயன்படுத்துகின்றனர் என்று ஊடக நிறுவனங்கள் தெரிவிக்கின்றன.

MTV-ன் தாய் நிறுவனமான பாரமவுண்ட் குளோபலின் செய்தித் தொடர்பாளர் இது குறித்து கருத்து தெரிவிக்க மறுத்துவிட்டார். முன்னாள் MTV VJ சிமோன் ஏஞ்சல், இந்த நடவடிக்கை மனதை நொறுக்கும் செயல் என்று குறிப்பிட்டார். ஒரு காலத்தில் இசை மூலம் உலகளாவிய பார்வையாளர்களை MTV எப்படி ஒன்றிணைத்தது என்பதையும் அவர் நினைவு கூர்ந்தார்.

"எல்லாம் ஒன்றிணையும் இடமாக MTV இருந்தது. எனவே இது உண்மையில் என் மனதை நொறுக்கிறது," என்று அவர் பிபிசி நியூஸிடம் தெரிவித்தார். MTV 1981-ல் அமெரிக்காவில் தொடங்கப்பட்டது. பின்னர் 1987-ல் ஐரோப்பாவிற்கும், 1997-ல் பிரிட்டனுக்கும் பரவியது. மைக்கேல் ஜாக்சனின் "த்ரில்லர்" அறிமுகம் மற்றும் 1985-ல் நடந்த லைவ் எய்ட் போன்ற மறக்க முடியாத தருணங்களைக் காட்டி, பாப் கலாச்சாரத்தை MTV கணிசமாக அனைவரிடம் கொண்டு சேர்த்தது.

கேட் டீலி மற்றும் ஜேன் லோவ் போன்ற பல தொகுப்பாளர்கள் இந்த தொலைக்காட்சி சேனல் மூலம் தங்கள் வாழ்க்கையைத் தொடங்கினர். சமீபகாலமாக, MTV இசையிலிருந்து விலகி, ரியாலிட்டி நிகழ்ச்சிகளில் அதிக கவனம் செலுத்துகிறது. பிரிட்டனில் உள்ள MTV சேனல் 2011-ல் இசை நிகழ்ச்சிகளை நிறுத்தியது.

பாரமவுண்ட் உலகளவில் $500 மில்லியன் வரை செலவுகளைக் குறைப்பதற்கான ஒரு பெரிய முயற்சியின் ஒரு பகுதியாக இது பார்க்கப்படுகிறது. ஆஸ்திரேலியா, போலந்து, பிரான்ஸ் மற்றும் பிரேசில் ஆகிய நாடுகளிலும் MTV-ன் இசைச் சேனல்கள் மூடப்படும் என்று தகவல்கள் தெரிவிக்கின்றன. இந்த ஆண்டு தொடக்கத்தில், ஸ்கைடான்ஸ் மீடியாவுடனான அதன் இணைப்பு ஜூலையில் அங்கீகரிக்கப்பட்டதால், MTV ஐரோப்பா இசை விருதுகளை (EMAs) பாரமவுண்ட் நிறுத்திவைத்தது.