டெஸ்லா-வுக்கு ஒரு கும்பிடு.. 17 ஆண்டுகளுக்கு பின் திடீர் பதவி விலகல்..யார் இந்த வினீத்..?

அமெரிக்கா: எலான் மஸ்கிற்கு சொந்தமான மின்சார கார் உற்பத்தி நிறுவனமான டெஸ்லாவில் கிட்டத்தட்ட 17 ஆண்டு காலம் தலைமை பொறுப்பை ஏற்று நடத்தி வந்த இந்தியாவை பூர்வீகமாகக் கொண்ட வினீத் மேத்தா திடீரென தன்னுடைய வேலையை ராஜினாமா செய்திருக்கிறார்.

டெஸ்லா நிறுவனத்தின் பேட்டரி கட்டமைப்பு துறைக்கு தலைவராக பதவி வகித்து வந்தவர் தான் வினீத் மேத்தா. 17 ஆண்டுகாலம் இந்த பொறுப்பினை ஏற்று நடத்தி வந்த அவர் தன்னுடைய வேலையை ராஜினாமா செய்திருக்கிறார். 2007 ஆம் ஆண்டு டெஸ்லா நிறுவனத்தில் இவர் பணிக்கு சேர்ந்தார் . அப்போது டெஸ்லா நிறுவனத்தின் மின்சார கார்களுக்கான பேட்டரிகளை வடிவமைத்து தந்து எலான் மஸ்கின் கவனத்தை ஈர்த்தார். இதனை அடுத்து அவருக்கு பேட்டரி பிரிவுக்கான தலைமை பொறுப்பு வழங்கப்பட்டது.

17 ஆண்டு காலம் இந்த பொறுப்பை வகித்து வந்த அவர் டெஸ்லாவை விட்டு வெளியேறி இருக்கிறார். இதற்கு முன்பு பவர் ட்ரெயின் பிரிவின் தலைவராக இருந்த ட்ரியோ பேக்லினோவும் டெஸ்லா நிறுவனத்தில் இருந்து வெளியேறினார். அவர் கடந்தாண்டு ஏப்ரல் மாதம் வெளியேறின நிலையில் ஓராண்டு கழித்து வினீத் மேத்தா தன்னுடைய பதவியை ராஜினாமா செய்து இருக்கிறார்.

டெஸ்லா நிறுவனம் பல்வேறு சவால்களை சந்தித்திருக்கும் இந்த வேலையில் தான் முக்கிய பொறுப்புகளில் இருப்பவர்களின் ராஜினாமா அரங்கேறி வருகிறது. உலகிலேயே நம்பர் ஒன் மின்சார கார் உற்பத்தி , விற்பனை நிறுவனமாக இருந்த டெஸ்லா தன்னுடைய இடத்தை இழந்துவிட்டது. டெஸ்லாவுக்கு போட்டியாக உருவான சீனாவின் பிஒய்டி நிறுவனம் தற்போது மின்சார கார்கள் விற்பனையில் முதலிடத்தை பிடித்து விட்டது.

சர்வதேச அளவில் டெஸ்லா நிறுவனம் விற்பனை சரிவை சந்தித்திருக்கும் நிலையில் அதன் தலைமை செயல் அதிகாரியாக இருக்கக்கூடிய எலான் மஸ்க் டிரம்ப் நிர்வாகத்தில் தனக்கு வழங்கப்படும் பொறுப்புகளை கவனித்து வருகிறார். இதன் காரணமாக டெஸ்லா நிறுவன முதலீட்டாளர்கள் பலரும் எலான் மஸ்க் தலைமை செயல் அதிகாரி பதவியில் இருந்து விலக வேண்டும் அல்லது அரசின் பொறுப்புகளை கைவிட்டு விட்டு முழுவதுமாக டெஸ்லா நிறுவனத்தை கவனிக்க தொடங்க வேண்டும் என கூறுகின்றனர்.

2025 ஆம் ஆண்டின் முதல் காலாண்டில் டெஸ்லா நிறுவனத்தின் விற்பனை 13 சதவீதம் வரை சரிவடைந்து இருக்கிறது . நிறுவனத்தின் பங்கு மதிப்பும் இந்த ஆண்டு தொடங்கியதில் இருந்து தற்போது வரை 30 சதவீதம் வரை வீழ்ச்சி கண்டிருக்கிறது . இந்த நிலையில் தான் தலைமை பொறுப்புகளில் இருப்பவர்கள் பலரும் ராஜினாமா செய்து வருகின்றனர்.