40 வயதிற்குள் இவ்வளவு செய்ய முடியுமா.. 2 இந்தியர்களுடன் பில்லியனர்கள் பட்டியல்: ஃபோர்ப்ஸ்

நியூயார்க்: உலகின் முன்னணி வர்த்தகப் பத்திரிக்கை நிறுவனமான ஃபோர்ப்ஸ், அமெரிக்காவில் 40 வயதுக்குள் உள்ள பணக்கார தொழில் முனைவோர்கள் பட்டியலை வெளியிட்டுள்ளது.

இந்தப் பட்டியலில் எப்போதும் அமெரிக்கர்களும் பிற நாட்டவர்களும் ஆதிக்கம் செலுத்தி வந்த நிலையில் இந்த வரும் 2 இந்தியர்கள் இப்பட்டியலில் இடம்பெற்றுள்ளனர்.

விவேக் ராமசாமி

ஃபோர்ப்ஸ் நிறுவனம் வெளியிட்டுள்ள இந்தப் பட்டியலில் இந்திய வம்சாவளியைச் சேர்ந்த 33 வயதுடைய விவேக் ராமசாமி 50 கோடி டாலர் மதிப்புடன் 33 வது இடத்தில் உள்ளார். அல்சைமர் நோய்க்கான மருந்து தயாரிக்கும் எக்ஸோவன்ட் சைன்ஸ் நிறுவனத்தின் தலைவர் ஆவார்.

அபூர்வா மேத்தா

அபூர்வா மேத்தா 40 கோடி டாலர் மதிப்புடன் 40 வது இடத்தில் உள்ளார். 29 வயதுடைய அபூர்வா மேத்தா இன்ஸ்டாகார்ட் என்ற நிறுவனத்தின் சீஇஓ ஆவார்.

மார்க் ஜூகர்பெர்க்

மேலும் இப்பட்டியலில் பேஸ்புக் நிறுவனத்தின் சீஇஓவான மார்க் ஜூக்கர்பெர்க் முதலிடத்தைப் பிடித்துள்ளார். மார்க் ஜூகர்பெர்க்கின் சொத்து மதிப்பு 4,710 கோடி டாலர் என ஃபோர்ப்ஸ் பத்திரிக்கை தெரிவித்துள்ளது.

டஸ்டின் மோஸ்கோவிட்ஸ்

இவரைத் தொடர்ந்து பேஸ்புக் நிறுவனத்தின் துணை நிறுவனரான டஸ்டின் மோஸ்கோவிட்ஸ் இரண்டாவது இடத்திலும் ஜான் கோம் மூன்றாவது இடத்திலும் உள்ளனர்.16 வயதில் அமெரிக்காவிற்கு வந்த ஜான் கோம் வாட்ஸ்அப் செயலியை தொடங்கியவர் ஆவார்.

எலிசபெத் ஹோம்ஸ்

இப்பட்டியலில் எலிசபெத் ஹோம்ஸ் என்ற ஒரே பெண் மட்டும் இடம் பிடித்துள்ளார். இவர் 19 வயதிலேயே இரத்தம் சோதனை செய்யும் நிறுவனத்தைத் தொடங்கியவர் ஆவார்.

பால்மர் லக்கி

இந்தப் பட்டியலில் இடம்பிடித்துள்ள மிகச் சிறிய வயதுடையவர் பால்மர் லக்கி. 21 வயதுடைய இவரது சொத்து மதிப்பு 70 கோடி டாலராகும்.