இந்தியா, சீனா-வை பந்தாடிய டிரம்ப்.. யாருக்கு எவ்வளவு வரி..?

உலக வர்த்தகத்தில் முக்கிய இடமாக இருக்கும் அமெரிக்கா, சமீபத்தில் புதிய வரி விதிகளை அறிமுகப்படுத்தியுள்ளது. இந்த வரி கட்டணங்கள் இந்தியா, சீனா, ஐரோப்பா மற்றும் பல்வேறு நாடுகளின் ஏற்றுமதிகளை பெரிதும் பாதிக்கக்கூடியவை. குறிப்பாக, இந்தியாவிற்கு 26% வரி, சீனாவிற்கு 34% வரி, வியட்நாமிற்கு 46% வரி உள்ளிட்ட பல நாடுகளுக்கு அதிக கட்டணங்கள் விதிக்கப்படுகின்றன.

இந்தியாவும் அமெரிக்காவும் உலகளவில் மிகப்பெரிய வர்த்தக பங்காளிகளாக இருக்கின்றன. 2024 ஆம் ஆண்டில் இரு நாடுகளுக்கிடையிலான மொத்த வர்த்தகம் 124 பில்லியன் அமெரிக்க டாலராக இருந்தது. இந்தியாவின் அமெரிக்காவிற்கான ஏற்றுமதி 81 பில்லியன் டாலராகவும், அமெரிக்காவிலிருந்து இந்தியா இறக்குமதி செய்த பொருட்கள் 44 பில்லியன் டாலராகவும் இருந்தன. இதன் மூலம் இந்தியாவிற்கு 37 பில்லியன் டாலர் வர்த்தக லாபம் கிடைத்தது.

அமெரிக்க ஜனாதிபதி டொனால்ட் டிரம்ப், இந்தியாவின் வர்த்தக நடைமுறைகள் குறித்து கருத்து தெரிவித்துள்ளார். அதோடு, இந்தியா அமெரிக்காவுக்கு விதிக்கும் வரிகளை குறைப்பதற்கான ஆலோசனைகளையும் முன்வைத்துள்ளார். "இந்தியா மிகக் கடினமான நாடு, பிரதமர் என் நண்பர், ஆனால் அவர்கள் எங்களை நியாயமாக நடத்தவில்லை" என்று டிரம்ப் கூறினார். இதனால் இந்தியா புதிய வரி விதிப்புகளை எதிர்கொள்ள வேண்டிய நிலை உருவாகியுள்ளது.

இந்தியா எதிர்கொள்ளும் 26% வரி - இந்தியாவிற்கு அமெரிக்கா விதித்துள்ள 26% வரி, பல்வேறு துறைகளில் தாக்கம் ஏற்படுத்தக் கூடியதாக இருக்கும். அமெரிக்காவிற்கு அதிகளவில் ஏற்றுமதி செய்யும் இந்திய நிறுவனங்கள் இதனால் மிகுந்த பாதிப்புக்கு உள்ளாகும். குறிப்பாக, தகவல் தொழில்நுட்பம், மருந்து, இரும்பு, இருபுற வாகனங்கள் போன்ற துறைகள் அதிகமாக பாதிக்கப்படலாம்.

இந்திய அரசு இந்த மாற்றத்திற்குத் தயாராக, புதிய வரி கொள்கைகளை ஆராய்ந்து வருகிறது. "இந்திய தொழில்துறைக்கு ஏற்படும் தாக்கத்தை மதிப்பீடு செய்யும் பணியில் அமைச்சகம் ஈடுபட்டுள்ளது" என்று அரசு தரப்பில் தெரிவிக்கப்பட்டுள்ளது.

சீனாவுக்கு 34% வரி - அமெரிக்காவின் மிகப்பெரிய நடவடிக்கை:அமெரிக்கா மற்றும் சீனா இடையிலான வர்த்தக மோதல் ஏற்கனவே பல ஆண்டுகளாக நீடிக்கிறது. அமெரிக்காவின் புதிய அறிவிப்பின் கீழ், சீனாவுக்கு 34% வரி விதிக்கப்படும். இது ஏற்கனவே வர்த்தக தடைகள் கொண்ட சீன பொருளாதாரத்திற்குப் பெரும் அதிர்ச்சியைக் கொடுக்கும். சீனாவும் தனது பகுதிகளில் பதிலடி கொடுக்கும் வாய்ப்பு உள்ளது. கடந்த காலங்களில் சீனா, அமெரிக்காவிலிருந்து இறக்குமதி செய்யும் பொருட்களுக்கு அதிக வரிகளை விதித்துள்ளது. இதற்கு பதிலளிக்க, டிரம்ப் நிர்வாகம் புதிய கட்டணங்களை அறிவித்துள்ளது.

இந்தியாவும் சீனாவும் மட்டுமல்ல, உலகத்தின் பல நாடுகளும் அமெரிக்காவின் புதிய வரி கொள்கைகளால் பாதிக்கப்படுகின்றன. ஐரோப்பிய ஒன்றியம் (EU) - 20%, வியட்நாம் - 46%, தென் கொரியா - 25%, ஜப்பான் - 24%, தைவான் - 32%, இங்கிலாந்து - 10%, சுவிட்சர்லாந்து - 34%, கம்போடியா - 49% (மிக அதிக வரி), தென்னாப்பிரிக்கா - 30%, இந்தோனேசியா - 32%, பிரேசில் மற்றும் சிங்கப்பூர் - 10% ஆகிய நாடுகளும் பாதிக்கப்படுகின்றன. இந்த வரி கட்டணங்கள் ஏப்ரல் 9 ஆம் தேதி முதல் அமலுக்கு வரும். வெள்ளை மாளிமை (White house) இதனை "தேசிய அவசரநிலை" என்ற வகையில் அறிவித்துள்ளது.

அமெரிக்காவின் புதிய வரி கட்டணங்கள், உலகளாவிய பொருளாதாரத்தில் மிகப்பெரிய மாற்றங்களை உருவாக்கக் கூடியவை. இந்த நடவடிக்கைகள் இந்தியா, சீனா, ஐரோப்பா மற்றும் பிற நாடுகளின் வர்த்தக நிதி நிலையை பாதிக்கும். உலகளாவிய வர்த்தகத் தடைகள் அதிகரிக்கலாம். இந்தியாவின் ஏற்றுமதி குறையலாம். சீனாவின் பொருளாதாரம் மேலும் சிரமத்திற்கு உள்ளாகலாம். விவசாயம், உற்பத்தி, தகவல் தொழில்நுட்பம் போன்ற துறைகள் பாதிக்கப்படும். மொத்தமாக, விலைவாசி உயரும் வாய்ப்பு உள்ளது.

இந்திய அரசு, அமெரிக்காவுடன் இந்த புதிய வரி கொள்கை தொடர்பாக தொடர்ந்து பேச்சுவார்த்தைகளை நடத்தி வருகிறது. இந்தியா 23 பில்லியன் டாலர் மதிப்புள்ள அமெரிக்க இறக்குமதிகளில் சிலவற்றிற்கு வரிச் சலுகைகள் அளிக்கத் தயாராக உள்ளதாக தகவல்கள் வெளியாகியுள்ளன. இது இந்தியாவிற்கும் அமெரிக்காவிற்கும் இடையிலான வர்த்தக உறவை தொடர்ந்து உறுதியானதாக வைத்திருக்க உதவும். இந்தியாவும், உலக நாடுகளும், அமெரிக்காவின் புதிய வரி கட்டணங்களுக்கு எதிராக எவ்வாறு பதிலளிக்க போகின்றன என்பதே எதிர்கால பொருளாதார நிலையை தீர்மானிக்கலாம்.