அமெரிக்க அதிபர் டிரம்புக்கு என்ன ஆச்சு ? வெள்ளை மாளிகை வெளியிட்ட பரபரப்பு மருத்துவ அறிக்கை!!

அமெரிக்க அதிபராக பதவி வகித்து வரக்கூடியவர் டொனால்ட் டிரம்ப். அமெரிக்க அதிபர் பதவியேறிய மிக வயதான நபர் என்ற பெருமை இவருக்கு உண்டு.

சில மாதங்களுக்கு முன்னர் டிரம்ப் இறந்து விட்டதாக சமூக வலைத்தளங்களில் தகவல் பரவியது . இதனை அடுத்து டிரம்புக்கு அரியவகை நோய் இருப்பதாகவும் கை கால்கள் வீக்கம் அடைந்து இருப்பதாகவும் புகைப்படங்களோடு நெட்டிசன்கள் சமூக வலைத்தளங்களில் பதிவிட்டனர். இந்த சூழலில் தான் டிரம்பின் உடல்நிலை தொடர்பான ஒரு அறிக்கையை வெள்ளை மாளிகை வெளியிட்டு இருக்கிறது .

அமெரிக்க அதிபராக பதவி வகிப்பவர்களின் உடல் நிலையை அவ்வப்போது பரிசோதனை செய்து அவர்களின் உடல்நிலை எப்படி இருக்கிறது என்பது குறித்து அறிக்கையை வெள்ளை மாளிகை வெளியிடுவது வழக்கம். அந்த வகையில் தற்போது டிரம்பின் உடல்நிலை தொடர்பான அறிக்கை வெளியிடப்பட்டிருக்கிறது.

டிரம்பின் உடல்நிலை சிறப்பான முறையில் இருப்பதாக தெரிவிக்கப்பட்டிருக்கிறது .வால்டர் ரீடு மருத்துவ மையத்தில் டிரம்பின் உடல் முழு பரிசோதனை செய்யப்பட்டதாகவும் அதில் அவர் ஒரு அதிபராக அனைத்து வேலைகளையும் மேற்கொள்வதற்கு ஃபிட்டாக இருக்கிறார் என அறிக்கை தரப்பட்டிருக்கிறது . எந்த ஒரு கட்டுப்பாடுகளும் இல்லாமல் டிரம்ப் ஒரு அதிபராக தன்னுடைய அன்றாட வேலைகளை தொடர்ச்சியாக மேற்கொள்ளலாம் என அந்த அறிக்கையில் குறிப்பிடப்பட்டிருக்கிறது.

மேலும் டிரம்பின் இதயம் மிக வலுவாக இருக்கிறதாம், இசிஜி மூலம் அவருடைய இதய செயல்பாடுகளை ஆய்வு செய்ததில் அவருடைய உடல் வயதை விட அவருடைய இதயத்தின் வயது 14 ஆண்டுகள் இளமையாக இருக்கிறது என தெரிவிக்கப்பட்டிருக்கிறது. இதயம் மட்டும் இல்லாமல் நுரையீரல் , நரம்பு மற்றும் அனைத்து உடல் பாகங்களும் முறையாக செயல்படுகின்றன என அந்த அறிக்கையில் குறிப்பிடப்பட்டிருக்கிறது.

அமெரிக்க அதிபர் பதவி ஏறிய மிக வயதான நபர் என்ற பெருமை டிரம்புக்கு கிடைத்திருக்கிறது. 79 வயதாகும் டிரம்ப் இரண்டாவது முறையாக அமெரிக்க அதிபராக பதவி வகித்து வருகிறார். இந்த ஆண்டில் மட்டும் இரண்டாவது முறையாக அவருக்கு முழு உடல் பரிசோதனை என்பது செய்யப்பட்டிருக்கிறது. ஏப்ரல் மாதத்தை தொடர்ந்து தற்போது அக்டோபர் மாதத்தில் இரண்டாவது பரிசோதனை மேற்கொண்டு இருக்கிறார் .

முன்னதாக சில நரம்பியல் பிரச்சனை காரணமாக சில மாதங்களுக்கு முன்பு அவருடைய கால்களில் வீக்கம் இருந்ததை வெள்ளை மாளிகையே அதிகாரப்பூர்வமாக வெளியிட்டது. ஆனால் இது வயதாவதால் ஏற்படக்கூடிய பிரச்சனை என்பதால் பயப்படுவதற்கு ஒன்றும் தேவையில்லை என கூறியது. வர்த்தக போர், அதிரடி அறிவிப்புகள் டிரம்ப் தன்னுடைய செயல்பாடுகளால் நாள்தோறும் செய்திகளில் இடம்பிடிப்பவர்.