4 ஆண்டுகளில் 630% லாபம் கொடுத்த ஆனந்த் ரதி வெல்த்.. ஒரே நாளில் 50 சதவீதம் வீழ்ந்த பங்கு விலை..

ஆனந்த் ரதி வெல்த் நிறுவனம் இந்தியாவின் முன்னணி வங்கி சாரா செல்வ தீர்வு நிறுவனங்களில் ஒன்றாகும். மேலும், இந்நிறுவனம் நாட்டின் டாப் 3 வங்கி சாரா மியூச்சுவல் பண்ட விநியோகஸ்தர்களில் ஒருவராகும் உள்ளது. இந்நிறுவனம் தனது வாடிக்கையாளர்களுக்கு, வெல்த் தீர்வுகள், நிதி தயாரிப்பு திட்டங்கள் விநியோகம் மற்றும் தொழில்நுட்ப தீர்வுகள் உள்ளிட்டவற்றை வழங்கி வருகிறது. இந்நிறுவனம் தொடர்ந்து நிலையாக லாபம் ஈட்டி வருகிறது. மேலும், இந்நிறுவன பங்குக்கு முதலீட்டாளர்கள் மத்தியில் நல்ல டிமாண்ட் உள்ளது.

கடந்த 4 ஆண்டுகளில் ஆனந்த் ரதி வெல்த் நிறுவன பங்கு முதலீட்டாளர்களுக்கு 630 சதவீதம் மல்டிபேக்கர் ஆதாயத்தை வழங்கியுள்ளது. இதனால் ஆனந்த் ரதி வெல்த் நிறுவன பங்கின் மீது முதலீட்டாளர்கள் எப்போதும் ஒரு கண் வைத்து இருப்பர். இந்த சூழந்நிலையில், சில தரகு நிறுவனங்களின் செயலிகளில் ஆனந்த் ரதி வெல்த் நிறுவன பங்கின் விலை இன்று ஒரே நாளில் 50 சதவீதம் சரிந்துள்ளதாக காட்டியது. இதனை பார்த்த உடனே பலரும் வியப்பில் ஆழ்ந்தனர். ஆனால் உண்மையில் பங்கு விலை 50 சதவீதம் குறையவில்லை.

கடந்த செவ்வாய்க்கிழமையன்று மும்பை பங்குச் சந்தையில் வர்த்தகத்தின் முடிவில் ரூ.4,060.35ஆக இருந்தது. ஆனால், 1:1 போனஸ் சரிசெய்தலுக்கு பிறகு இன்று பங்குச் சந்தையில் இப்பங்கின் விலை ரூ.1,979.95ல் தொடங்கியது. முந்தை வர்த்தக தினத்தின் முடிவு விலை ரூ.2,030.40ஆக காட்டியது. ஆனால் சில தரகு செயலிகளில் நேற்றைய பங்கு விலையில் சரிசெய்யபடாத நிலையை (பழைய விலையான ரூ.4,060.35) காட்டியது. இதனால் அந்த செயலிகளில் ஆன்ந்த் ரதி வெல்த் நிறுவன பங்கு விலை இன்று 50 சதவீதத்துக்கு மேல் குறைந்தது போல் காட்டியது.

மும்பை பங்குச் சந்தையில் இன்று வர்த்தகத்தின் முடிவில் ஆனந்த் ரதி வெல்த் நிறுவன பங்கின் விலை முந்தைய வர்த்தக தினத்தை காட்டிலும் 6.67 சதவீதம் குறைந்து ரூ.1,894.85ல் முடிவுற்றது. அதேசமயம் சில தரகு நிறுவனங்களின் செயலிகளில் ஆனந்த் ரதி வெல்த் நிறுவன பங்கின் விலை முந்தைய வர்த்தக தினத்தை காட்டிலும் 53.27 சதவீதம் குறைந்து ரூ.1,895.70ல் முடிவுற்றது. முந்தைய வர்த்தக தினத்தின் முடிவு விலையை சரிசெய்யப்படாததே இதற்கு காரணம்.

கடந்த ஜனவரி 13ம் தேதியன்று இந்நிறுவனத்தின் இயக்குனர்கள் குழு தனது பங்குதாரர்களுக்கு 1:1 என்ற விகிதத்தில் போனஸ் பங்குகளை வழங்க உள்ளதாக அறிவித்தது. கடந்த மாதம் 18ம் தேதியன்று தேசிய பங்குச் சந்தை மற்றும் மும்பை பங்கு சந்தை ஆகியவற்றிடமிருந்தும் இதற்கான ஒப்புதலை இந்நிறுவனம் பெற்றது. கடந்த மாதம் 21ம் தேதியன்று ஆனந்த் ரதி வெல்த் நிறுவனத்தின் தனது போனஸ் ஒதுக்கீட்டு குழு மார்ச் 5ம் தேதியை போனஸ் பங்கு வெளியீட்டுக்கான பதிவு தேதியாக அறிவித்தது.

Story written by: Subramanian

Disclaimer: This article is strictly for informational purposes only. It is not a solicitation to buy, sell in precious metal products, commodities, securities or other financial instruments. Greynium Information Technologies Pvt Ltd, its subsidiaries, associates and the author of this article do not accept culpability for losses and/or damages arising based on information in this article.