இந்திய பங்குச்சந்தைகளுக்கு விடிவு காலம்!! இவங்க உள்ள வந்துட்டாங்க இனிமே ஏற்றம் தான்!!

வெளிநாட்டு முதலீட்டு நிறுவனங்கள் தொடர்ச்சியாக இந்திய பங்குச்சந்தைகளில் பங்குகளை விற்பனை செய்து வந்தன. இதனால் பங்குச்சந்தைகள் பெரும் சரிவடைந்து அதில் இருந்து மீள முடியாமல் தவித்தன. ஆனால் இந்த வாரம் அது மாறியுள்ளது.

அக்டோபர் 6 முதல் அக்டோபர் 10 வரையிலான காலகட்டத்தில் வெளிநாட்டு முதலீட்டாளர்களால் ரூ.1,751 கோடி நிகர முதலீடு செய்யப்பட்டுள்ளது என தேசிய பாதுகாப்பு வைப்பகத்தின் (NSDL) தரவுகள் தெரிவிக்கின்றன. கடந்த சில மாதங்களாக தொடர்ந்து விற்பனை அழுத்தம் இருந்தபோதிலும், உள்நாட்டு நிறுவன முதலீட்டாளர்கள் (DIIs) சந்தைக்கு ஆதரவாக இருந்தனர். வெளிநாட்டு முதலீட்டாளர்களின் விற்பனையை ஈடுகட்டி, ஒட்டுமொத்த சந்தை நிலைத்தன்மையை பராமரிக்க இவர்கள் உதவினர்.

ரெலிகேர் புரோக்கிங்கின் ஆராய்ச்சிப் பிரிவின் மூத்த துணைத் தலைவர் அஜித் மிஸ்ரா அக்டோபர் 6-10 வரையிலான வாரத்தில், வெளிநாட்டு நிறுவன முதலீட்டாளர்கள் (FIIs) தங்கள் வர்த்தக நடவடிக்கைகளில் ஒரு திடீர் மாற்றத்தைக் காட்டினர். முதல் இரண்டு நாட்களில் (அக்டோபர் 6 மற்றும் 7 ஆகிய தேதிகளில்) ரூ.1,584.48 கோடி மற்றும் ரூ. 1,471.74 கோடி என கணிசமான விற்பனைக்குப் பிறகு, அடுத்த மூன்று நாட்களில் வெளிநாட்டு முதலீட்டாளர்கள் தீவிரமாக வாங்கத் தொடங்கினர் என கூறுகிறார்.

மேலும் அவர்கள் ரூ.1,663.65 கோடி, ரூ.737.82 கோடி மற்றும் ரூ.2,406.54 கோடி என முதலீடு செய்தனர். இதன் விளைவாக, இந்த வாரம் மொத்த நிகர முதலீடு ரூ.1,751.79 கோடியாக உயர்ந்தது. இந்த மாற்றம் இந்திய பங்குகள் மீதான வெளிநாட்டு முதலீட்டாளர்களின் நம்பிக்கையை மேம்படுத்துவதைக் காட்டுகிறது, என்கிறார்.

NSDL தரவுகளின்படி, இந்த வாரம் வெளிநாட்டு போர்ட்ஃபோலியோ முதலீட்டாளர்கள் (FPIs) செய்த நேர்மறையான முதலீடுகளால், அக்டோபரில் இந்திய சந்தைகளில் இருந்து ஏற்பட்ட நிகர வெளியேற்றம் தற்போது ரூ.2,091 கோடியாக குறைந்துள்ளது.

இதற்கு மாறாக, செப்டம்பர் மாதத்தில் FPIகள் ரூ.23,885 கோடி நிகர வெளியேற்றத்தை பதிவு செய்தன. இந்த ஆண்டு இதுவரை, வெளிநாட்டு முதலீட்டாளர்கள் இந்திய சந்தைகளில் இருந்து மொத்தம் ரூ. 1,56,611 கோடியை திரும்பப் பெற்றுள்ளனர்.

FPI செயல்பாட்டில் ஏற்பட்ட இந்த சமீபத்திய மாற்றம், இந்திய பங்குகள் மீதான வெளிநாட்டு நம்பிக்கையை மீண்டும் சுட்டிக்காட்டுகிறது. இருப்பினும், இந்த நேர்மறையான போக்கின் நிலைத்தன்மை தொடர்ச்சியான முதலீடுகள், வலுவான கார்ப்பரேட் வருவாய்கள் மற்றும் நிலையான உலகளாவிய நிலைமைகளைப் பொறுத்தது.

Disclaimer: இந்த செய்தியில் இருக்கும் கருத்துகள் மற்றும் பரிந்துரைகள் தனிப்பட்ட ஆய்வாளர்கள் அல்லது நிறுவனங்களின் சொந்த கருத்துகளாகும், இவை Goodreturns.in அல்லது Greynium Information Technologies Private Limited (இவை இரண்டும் "நாங்கள்" என குறிப்பிடப்படுகிறது) ஆகியவற்றின் கருத்துகளைப் பிரதிபலிக்கவில்லை. உள்ளடக்கத்தின் துல்லியம், முழுமை அல்லது நம்பகத்தன்மைக்கு நாங்கள் எந்தவொரு உத்தரவாதம் அளிக்கவோ, அங்கீகரிக்கவோ அல்லது பொறுப்பேற்கவோ மாட்டோம். மேலும், முதலீட்டு ஆலோசனை அல்லது பங்குகளை வாங்கவோ விற்கவோ எந்த வித தூண்டுதலையும், ஊக்கத்தையும் நாங்கள் வழங்கவில்லை. அனைத்து தகவல்களும் புரிதல் நோக்கங்களுக்காக மட்டுமே வழங்கப்படுகின்றன. எந்தவொரு முதலீட்டு முடிவுகளை எடுப்பதற்கு முன்பும், அங்கீகரிக்கப்பட்ட நிதி ஆலோசகர்களிடமிருந்து தனிப்பட்ட முறையில் சரிபார்க்கப்பட வேண்டும்.