தேர்தல் சீசனில் வளர்ச்சி அடைந்த பென்னி பங்குகள்.. நீங்க வாங்கி இருக்கீங்களா?

இந்தியாவில் நாடாளுமன்றத் தேர்தலுக்கான முதல் கட்ட வாக்குப்பதிவு தொடங்கியதிலிருந்து தற்போது வரை பல்வேறு நிறுவனங்களின் பங்கு மதிப்புகள் பெருமளவில் உயர்வு கண்டுள்ளன.

அந்த வகையில் கடந்த ஏப்ரல் 19ஆம் தேதி முதல் தற்போது வரை கணிசமான லாபத்தை பெற்று தந்த பென்னி ஸ்டாக்குகள் குறித்து இந்த கட்டுரையில் நாம் விரிவாக தெரிந்து கொள்ளலாம்..

கடந்த ஆறு வார காலத்தில் அதாவது ஏப்ரல் 19ஆம் தேதி முதல் கட்ட வாக்குப்பதிவு தொடங்கியதில் இருந்து தற்போது வரை சில பென்னி ஸ்டாக்குகள் முதலீட்டாளர்களுக்கு 100 முதல் 230 சதவீதம் வரை லாபத்தை பெற்று தந்துள்ளன.

AceEquity நிறுவனம் வெளியிட்டுள்ள தகவல்களின் அடிப்படையில் இந்திய பங்குச்சந்தையில் உள்ள 31 பங்குகள் 50 சதவீதம் வரை உயர்வு கண்டுள்ளன. இதில் பென்னி ஸ்டாகுகள் என பார்க்கும் போது, ஹெல்தி லைஃப் அக்ரி டெக் லிமிடெட் (Healthy Life Agritec Ltd) நிறுவனத்தின் பங்கு மதிப்பானது ஏப்ரல் 19ஆம் தேதி ரூ. 4.90 ஆக இருந்து தற்போது 252 சதவீதம் அதிகரித்து ரூ. 17.28 என உயர்ந்துள்ளது.சந்தையின் போக்குகளே தங்கள் நிறுவனத்தின் பங்கு மதிப்பு உயர்வுக்கு காரணம் என இந்நிறுவனம் தெரிவித்துள்ளது.

சன்சிட்டி சிந்தெடிக்ஸ் (Suncity Synthetics) ஜோத்பூரை தலைமையிடமாக கொண்டு நைலான் மற்றும் பாலியஸ்டர் உற்பத்தியில் ஈடுபட்டுள்ள இந்நிறுவனத்தின் ஒரு பங்கு மதிப்பு ரூ.7.58 இல் இருந்து ரூ. 25.17 என 232 சதவீகிதம் வளர்ச்சி அடைந்துள்ளது.

ஜோதி இன்ஃபிராவென்ச்சர்ஸ் (Jyothi Infraventures Ltd) :இந்நிறுவனத்தின் பங்கு மதிப்பு ஏப்ரல் 19ஆம் தேதி ரூ.10.12 என இருந்தது. தற்போது இதன் ஒரு பங்கு மதிப்பு ரூ.24.01 என உயர்ந்துள்ளது. இந்நிறுவனத்தில் விற்பனை எதுவும் நடக்கவில்லை என்றும் 1.87 கோடி ரூபாய் நஷ்டம் அடைந்திருப்பதாகவும் தகவல் வெளியிட்டுள்ள நிலையிலும் இதன் பங்கு மதிப்பு உயர்ந்துள்ளது.

மெர்குரி டிரேட் லிங்க்ஸ்( Mercury Trade Links Ltd: ஏப்ரல் 19ஆம் தேதி முதல் கட்ட வாக்குப்பதிவு தொடங்கிய போது இதன் ஒரு பங்கு மதிப்பு ரூ.4.75ஆக இருந்து தற்போது ரூ.11.40 என அதிகரித்துள்ளது.

ரேட்டன் இந்தியா பவர் ( RattanIndia Power Ltd): அண்மை காலமாக பவர் பங்குகள் கணிசமாக உயர்ந்து வருகின்றன. அந்த வகையில் இந்நிறுவனத்தின் பங்கு மதிப்பு தேர்தல் சீசனின் தொடக்கத்தில் ரூ.8 என இருந்து தற்போது ரூ.19.15 என உயர்ந்துள்ளது.

கோத்தாரி இண்டஸ்ட்ரியல் கார்ப்பரேஷன் (Kothari Industrial Corporation Ltd): ஏப்ரல் 19இல் ரூ.2.87 ஆக இருந்த இதன் ஒரு பங்கின் மதிப்பு 6 வார காலத்தில் ரூ.5.87 என அதிகரித்துள்ளது.

ஐஸ்ட்ரீட் நெட்வொர்க் (iStreet Network Ltd ): ரூ.1.95 என இருந்த இந்நிறுவனத்தின் பங்கு மதிப்பு கடந்த 6 வாரங்களில் மட்டும் ரூ. 4.45 என அதிகரித்துள்ளது.

இவ்வாறு ஆறு வார தேர்தல் சீசனில் உயர்ந்துள்ள நிறுவனங்களில் ரேட்டன் இந்தியா பவர் மட்டுமே 10,000 கோடி சந்தை மூலதனம் கொண்ட மிடில் கேப் பங்கு, மற்ற அனைத்துமே ஸ்மால் கேப் பங்குகள் தான்.

Story Written by: Devika