5% சரிவில் ரிலையன்ஸ் இண்டஸ்ட்ரீஸ் பங்குகள்.. காலாண்டு முடிவின் எதிரொலி..!

இந்தியாவின் முன்னணி வர்த்தகக் குழுமம் ஆக விளங்கும் ரிலையன்ஸ் இண்டஸ்ட்ரீஸ் டிசம்பர் 31ஆம் தேதி உடன் முடிந்த காலாண்டில் சந்தை கணிப்புகளை உடைத்து சுமார் 12.5 சதவீத வளர்ச்சியில் சுமார் 13,101 கோடி ரூபாய் அளவிலான லாபத்தைப் பெற்ற ரிலையன்ஸ் இண்டஸ்ட்ரீஸ் வருவாய் அளவீட்டில் சுமார் 22 சதவீதம் சரிவை அடைந்தது.

2019 டிசம்பர் காலாண்டு முடிவில் 1,60,447 கோடி ரூபாய் அளவிலான வருவாயைப் பெற்ற நிலையில், 2020 டிசம்பர் காலாண்டில் 1,28,450 கோடி ரூபாய் அளவிலான வருவாய் மட்டுமே பெற்றுள்ளது. இது கிட்டதட்ட 22 சதவீதம் குறைவாகும்.

ரிலையன்ஸ் இண்டஸ்ட்ரீஸ் குழுமத்தின் இந்த வருவாய் சரிவுக்கு முக்கியக் காரணம் இக்குழுமத்தின் கச்சா எண்ணெய் சுத்திகரிப்பு மற்றும் ரீடைல் எரிபொருள் வர்த்தகத்தில் ஏற்பட்ட பாதிப்பு தான். 2020ஆம் ஆண்டு ஆரம்பத்தில் ஏற்பட்ட சரிவில் இருந்து இருந்து ஆண்டு இறுதி வரையிலும் மீள முடியாமல் தவித்து வருகிறது.

கடந்த ஆண்டுக் கச்சா எண்ணெய் சுத்திகரிப்புப் பிரிவு மட்டும் 1.19 லட்சம் கோடி ரூபாய் அளவிலான வருமானத்தைப் பெற்ற நிலையில் தற்போது 83,838 கோடி ரூபாய் வருவாய் மட்டுமே பெற்றுள்ளது.

இதன் எதிரொலியாகத் திங்கட்கிழமை வர்த்தகத்தில் முகேஷ் அம்பானி தலைமை வகிக்கும் ரிலையன்ஸ் இண்டஸ்ட்ரீஸ் நிறுவனப் பங்குகளின் மதிப்பு வர்த்தக முடிவில் 5.36 சதவீதம் வரையில் சரிந்து 1,939.70 ரூபாயாகக் குறைந்துள்ளது. இதனால் ரிலையன்ஸ் இண்டஸ்ட்ரீஸ் முதலீட்டாளர்கள் இன்று அதிகளவிலான இழப்பை எதிர்கொண்டனர்.

இன்றைய சரிவின் மூலம் ரிலையன்ஸ் இண்டஸ்ட்ரீஸ் நிறுவனத்தின் மொத்த சந்தை மதிப்பு சுமார் 12.29 லட்சம் கோடி ரூபாயாகக் குறைந்துள்ளது. இதோடு கிரெடிட் சூசி நிறுவனம் ரிலையன்ஸ் பங்குகளை நியூட்டரல் கால் ஆக அறிவித்துள்ளது குறிப்பிடத்தக்கது.