புதிய வரலாற்று உச்சத்தை தொட்ட நிஃப்டி 50.. எல்லா புகழும் ஐடி துறைக்கே..!!

நிஃப்டி 50 குறியீடு இன்று புதிய உச்சத்தைத் தொட்டு முதலீட்டாளர்களுக்கு இன்ப அதிர்ச்சி கொடுத்துள்ளது, அமெரிக்க மத்திய வங்கியான பெடரல் ரிசர்வ் வட்டி விகிதத்தைக் குறைக்கும் முடிவில் உறுதியானதில் இருந்து பங்குச்சந்தையில் அதிகப்படியான முதலீடுகள் குவியத் துவங்கியுள்ளது. இதே காலகட்டத்தில் பத்திர சந்தையில் இருந்த முதலீடுகள் குறைந்து அதன் லாப அளவீடுகள் குறைந்துள்ளது.

நிஃப்டி 50 குறியீடு புதிய உச்சத்தை எட்டி வெறும் 18 வர்த்தக நாளில் புதன்கிழமை தனது முந்தைய உச்சமான 25,078ஐ தாண்டி 25,114.05 புள்ளிகளை இன்று எட்டியுள்ளது. இதற்கிடையில், சென்செக்ஸ், அதன் புதிய உயரமான 82,129ஐ தொடுவதற்கு 143 புள்ளிகள் மட்டுமே குறைவாக உள்ளது.

தேசிய பங்குச்சந்தையின் நிஃப்டி 50 குறியீடு 12.30 மணிக்கு 81.65 புள்ளிகள் உயர்ந்து 25,099.40 ரூபாயாக உள்ளது, இதேபோல் சென்செக்ஸ் குறியீடு 244.6 புள்ளிகள் உயர்ந்து 81,956.22 புள்ளிகளை எட்டியுள்ளது. இன்றைய வர்த்தக உயர்வுக்கு முதலும் முக்கியமான காரணம் அமெரிக்காவில் பென்ச்மார்க் வட்டி விகிதத்தைக் குறைக்கும் காரணத்தால் ஐடி துறை நிறுவனங்கள் அதிகப்படியான வர்த்தகத்தைப் பெறும் காரணத்தால் இத்துறை பங்குகள் அதிகளவில் உயர்ந்து நிஃப்டி 50 புதிய உச்சத்திற்குத் தொட முக்கியமான காரணமாக இருந்தது.

இன்றைய வர்த்தகத்தில் துறை ரீதியாக பார்க்கும் போது, நிஃப்டி IT மற்றும் நிஃப்டி ஃபார்மா இரண்டும் 52 வார உயர்வை எட்டியது. நிஃப்டி IT 2.36% உயர்ந்து 42,711 ஆக இருந்தது. இதில் LTIMindtree, விப்ரோ, Coforge மற்றும் Mphasis ஆகியவை அதிகளவில் உயர்ந்தன. நிஃப்டி ஃபார்மா 0.5% உயர்ந்து 22,856 ஆக இருந்தது. இதில் கிரானுல்ஸ், சைடஸ் லைஃப் மற்றும் பயோகான் ஆகியவை அதிகமாக உயர்ந்தது.

இதேவேளையில் சென்செக்ஸ் குறியீட்டில் பார்க்கும் போது மஹிந்திரா & மஹிந்திரா, டாடா மோட்டார்ஸ், பவர் கிரிட், டைட்டன், சன் ஃபார்மா மற்றும் ரிலையன்ஸ் இண்டஸ்ட்ரீஸ் ஆகியவை லாபத்துடன் திறந்து இக்குறியீட்டுக்கு வலு சேர்த்தது. அதே சமயம் HCL டெக், ICICI வங்கி, TCS, Bajaj Finserv மற்றும் டாடா ஸ்டீல் ஆகியவை சரிவுடன் துவங்கி உயர துவங்கியுள்ளது.

மேலும் NBCC நிறுவனத்தின் இயக்குநர் குழு, தனது பங்குதாரர்களுக்கு போனஸ் பங்குகளை வழங்குவது குறித்து ஆகஸ்ட் 31 அன்று கூட்டம் நடத்த உள்ளதால், இந்த பங்குகள் 8%க்கும் அதிகமாக உயர்ந்தது.