அடி மேல் அடி.. 23 ஆண்டுகளில் நிகழாத மோசமான நிலையை நோக்கி நிஃப்டி.. காப்பாற்றுமா பட்ஜெட்?..

இந்திய பங்குச் சந்தைகளுக்கு கடந்த ஆண்டு ஒரு பொன்னான ஆண்டாக அமைந்தது. தேசிய பங்குச் சந்தையின் குறியீட்டு எண் நிப்டி கடந்த செப்டம்பரில் புதிய உச்சத்தை தொட்டது. ஆனால் அதன் பிறகு தொடர்ந்து 3 மாதங்களாக சரிவை சந்தித்தது. இந்நிலையில் தொடர்ந்து 4வது மாதமாக ஜனவரியிலும் நிப்டி வீழ்ச்சி பாதையில் உள்ளது.

இந்த மாதமும் நிப்டி சரிவை சந்திக்கும் என்பது கிட்டத்தட்ட உறுதி. இந்நிலையில் இது தொடர்பாக நிபுணர்கள் கூறுகையில், தொடர்ந்து 4 மாதங்களாக நிப்டி சரிவை சந்திப்பது என்பது கடந்த 23 ஆண்டுகளில் பதிவாகாத ஒரு விதிவிலக்கான நிகழ்வாகும்.

இதற்கு முன் 2001ல் இது போல் நடந்திருந்தது. 2001ம் ஆண்டில் நிப்டி ஜூலை முதல் செப்டம்பர் வரையிலான 4 மாதங்களில் சராசரியாக 6 சதவீதம் சரிவை சந்தித்தது. இருப்பினும் அடுத்த மூன்று மாதங்களில் 5 சதவீதம் ஏற்றம் கண்டது. 2000ம் ஆண்டு முதல் இதுவரையிலான காலத்தில், 3 மாதங்கள் தொடர்ச்சியாக 13 முறை நிப்டி சரிவை கண்டுள்ளது.

அதேசமயம், 70 சதவீத சமயம், அடுத்த 3 மாதங்களில் நிப்டி சராசரியாக 3 சதவீதம் ஏற்றம் கண்டதை கண்டுள்ளது. கடந்த 2019ம் ஆண்டு முதல் ஜனவரியில் நிப்டி சரிவை சந்திப்பது வாடிக்கையான நிகழ்வாக உள்ளது.

பிப்ரவரி மாதத்தில் சந்தையின் போக்கு எப்படி இருக்கும் என்பது, பெரும்பாலும், பட்ஜெட் அறிவிப்புகள், ரிசர்வ் வங்கி கொள்கை, டிரம்பின் வர்த்தக கொள்கைகள், அன்னிய முதலீட்டாளர்களின் முதலீடு மற்றும் நிறுவனங்களின் 3வது காலாண்டு நிதி நிலை முடிவுகள் பொறுத்தே அமையும். கடந்த கால வரலாற்றை பார்க்கும்போது பொதுவாக பிப்ரவரி மாதமும் எதிர்மறையாக இருந்ததை காட்டுகிறது.

2010ம் ஆண்டு முதல் தாக்கல் செய்யப்பட்ட 18 பட்ஜெட் அமர்வுகளில், பட்ஜெட்டுக்கு பிறகு 12 முறை நிப்டி ஏற்றம் கண்டுள்ளது. பட்ஜெட்டுக்கு ஒரு வாரத்துக்கு முன்பு நிப்டி ஒரு சதவீத்துக்கு மேல் வீழ்ச்சி அடையும் போதெல்லாம், பட்ஜெட்டுக்கு பிறகு ஏற்றம் கண்டு எழுச்சி கண்டுள்ளது என தெரிவித்தனர்.

பட்ஜெட் எதிர்பார்ப்புகள் குறித்து மோர்கன் ஸ்டான்லி ஆய்வாளர்கள் கூறுகையில், நுகர்வு அதிகரிக்கவும், உள்கட்டமைப்பு செலவினங்களை அதிகரிக்கவும் பட்ஜெட்டில் நேரடி வரிகள் குறைக்கப்படும் என எதிர்பார்க்கப்படுகிறது. விவசாயம், வீட்டுவசதி, ரயில்வே, பாதுகாப்பு, மின்னணுவியல், ஜவுளி, வாகன துணை நிறுவனங்கள்,உணவு பதப்படுத்துதல் மற்றும் புதுப்பிக்கத்தக்க உள்ளிட்ட துறைகளில் தாக்கத்தை ஏற்படுத்தும் அறிவிப்புகளை எதிர்பார்க்கிறோம்.

அதேசமயம் அறிவிப்புகள் மட்டுமே வருமான வாய்ப்பை உருவாக்கா என்பதை மனதில் கொள்ள வேண்டும். பட்ஜெட்டில் உண்மையான செலவினங்களை மொத்த உள்நாட்டு உற்பத்தியில் ஒரு சதவீதமாகவும், முந்தைய ஆண்டைக் காட்டிலும் அது எவ்வாறு மாறுகிறது என்பதையும் பார்ப்பது அவசியம் என தெரிவித்தனர்.

யுபிஎஸ் இந்தியாவின் அனுபவ் அகர்வால் கூறுகையில், 2025-26ம் நிதியாண்டில் நிதி பற்றாக்குறை மொத்த உள்நாட்டு உற்பத்தியில் 4.5 சதவீதத்துக்கும் குறைவாக கட்டுப்படுத்தப்பட வேண்டுமானால், மூலதன செலவினங்கள் மற்றும் நுகர்வு ஊக்குவிப்பு குறைக்கப்படலாம் என்பதால், சந்தைகளில் பட்ஜெட்டின் தாக்கம் மந்தமாக இருக்கும் என்று தெரிவித்தார்.

ஆக்சிஸ் செக்யூரிட்டீஸ் கூறுகையில், எதிர்வரும் பட்ஜெட் வளர்ச்சி சார்ந்த பட்ஜெட்டாக இருக்கும். பொது உள்கட்டமைப்பின் வளர்ச்சியை மேம்படுத்துவதற்காக மூலதன செலவினங்களை அதிகரிப்பதில் பட்ஜெட்டில் முக்கியத்துவம் அளிக்கப்படும் என எதிர்பார்க்கப்படுகிறது என தெரிவித்தது.

Disclaimer: This article is strictly for informational purposes only. It is not a solicitation to buy, sell in precious metal products, commodities, securities or other financial instruments. Greynium Information Technologies Pvt Ltd, its subsidiaries, associates and the author of this article do not accept culpability for losses and/or damages arising based on information in this article.

Story written by: Subramanian