சென்செக்ஸ் 600 புள்ளிகளுக்கு மேல் சரிவு.. நிஃப்டி 14,700 கீழ் வர்த்தகம்.. என்ன காரணம்?

நடப்பு வாரத்தின் முதல் வர்த்தக நாளான இன்று, இந்திய சந்தைகள் சற்று சரிவில் காணப்படுகின்றன. கடந்த வெள்ளிக்கிழமையன்று புனித வெள்ளி காரணமாக இந்திய சந்தைககளுக்கு விடுமுறை அளிக்கப்பட்டிருந்தது.

இந்தியாவில் தற்போது இரண்டாம் கட்ட கொரோனா பரவலின் தாக்கம் வேகமாக பரவி வருகின்றது. இதன் காரணமாக பொருளாதாரம் என்னவாகுமோ என்ற கவலையும் எழுந்துள்ளது.

கடந்த ஆண்டு கடுமையான வீழ்ச்சிக்கு பின்னர் தற்போது தான் பொருளாதாரம் மீண்டு வந்து கொண்டுள்ள நிலையில், தற்போது மீண்டும் என்னவாகுமோ என கவலையளித்துள்ளது. ஆக முதலீட்டாளர்கள் இதனையும் கவனித்து வருகின்றனர்.

இந்திய சந்தைகள் தொடக்கம்

குறிப்பாக இன்று ப்ரீ ஓபனிங் சந்தையில் சற்று ஏற்றத்தில் காணப்பட்டது. அப்போது சென்செக்ஸ் 87.95 புள்ளிகள் அதிகரித்து, 50,117.78 புள்ளிகளாகவும், இதே நிஃப்டி 8.60 புள்ளிகள் அதிகரித்து, 14,876 புள்ளிகளாகவும் காணப்பட்டது. எனினும் தொடக்கத்தில் சந்தைகள் சரிவினைக் கண்டன. குறிப்பாக சென்செக்ஸ் 305.03 புள்ளிகள் குறைந்து, 49,724.80 புள்ளிகளாகவும், இதே நிஃப்டி 82 புள்ளிகள் குறைந்து, 14,785.40 புள்ளிகளாகவும் காணப்பட்டது. இதற்கிடையில் 688 பங்குகள் ஏற்றத்திலும், 719 பங்குகள் சரிவிலும், 107 பங்குகள் மாற்றமில்லாமலும் காணப்பட்டது.

நிஃப்டி குறியீடு

இதற்கிடையில் சென்செக்ஸ் மற்றும் நிஃப்டி குறியீட்டில் உள்ள சில குறியீடுகள் தவிர, பெரும்பாலான குறியீடுகள் சிவப்பு நிறத்திலேயே காணப்படுகின்றன. குறிப்பாக நிஃப்டி குறியீட்டில் உள்ள இன்ஃபோசிஸ், விப்ரோ, ஹெச்சிஎல் டெக், பிரிட்டானியா, ஸ்ரீ சிமெண்ட்ஸ் உள்ளிட்ட பங்குகள் டாப் கெயினர்களாகவும், இதே பஜாஜ் பைனான்ஸ், இந்தஸிந்த் வங்கி, ஆக்ஸிஸ் வங்கி, எஸ்பிஐ, ஹெச்டிஎஃப்சி உள்ளிட்ட பங்குகள் டாப் லூசர்களாகவும் உள்ளன.

சென்செக்ஸ் குறியீடு

இதே சென்செக்ஸ் குறியீட்டில் உள்ள இன்ஃபோசிஸ், ஹெச்சிஎல் டெக், டிசிஎஸ், டெக் மகேந்திரா, அல்ட்ராடெக் சிமெண்ட் உள்ளிட்ட பங்குகள் டாப் கெயினராகவும், இதே பஜாஜ் பைனான்ஸ், இந்தஸிந்த் வங்கி, ஆக்ஸிஸ் வங்கி, எஸ்பிஐ, பஜாஜ் பின்செர்வ் உள்ளிட்ட பங்குகள் டாப் லூசராகவும் உள்ளன.

ரூபாய் மதிப்பு

இன்று ஐடி துறை பங்குகள நல்ல ஏற்றத்துடன் காணப்படுகின்றது. இது நான்காவது காலாண்டில் நல்ல அறிக்கையினை காட்டலாம் என முதலீட்டாளர்கள் ஐடி துறை பங்குகளில் கவனம் செலுத்தி வருகின்றனர்.

இதற்கிடையில் தற்போது சென்செக்ஸ் 647.99 புள்ளிகள் குறைந்து, 49,381.84 புள்ளிகளாகவும், இதே நிஃப்டி 171.20 புள்ளிகள் குறைந்து, 14,696.20 புள்ளிகளாகவும் காணப்படுகிறது.