எச்சரித்த இந்திய வானிலை மையம்.. சந்தோஷத்தில் ஏசி தயாரிப்பு நிறுவனங்கள்..

பொதுவாக நம் நாட்டில் மார்ச் முதல் மே வரையிலான காலத்தில் வெப்பநிலை அதிகமாக இருக்கும். சூரியனின் அனல் கக்கும் வெப்பத்தால் கோடைக்காலம் தொடங்கி விட்டாலே ஏசி உள்ளிட்ட குளிர்விக்கும் பொருட்களுக்கான தேவை அதிகரிக்கும். ஏசி தயாரிப்பு நிறுவனங்கள் தங்களது விற்பனைக்கு இந்த கோடைக்காலத்தையே மலை போல் நம்பி இருக்கின்றன. இந்த சூழ்நிலையில், இந்திய வானிலை மையத்தின் ஒரு அறிக்கை ஏசி தயாரிப்பு நிறுவனங்களுக்கு விற்பனை குறித்து பெரிய நம்பிக்கையை கொடுத்துள்ளது.

பொதுவாக பிப்ரவரி மாதத்தில் பெரிய அளவில் வெப்பத்தின் தாக்கம் இருக்காது. ஆனால் கடந்த பிப்ரவரியில் வழக்கத்துக்கு மாறாக வெப்பம் அதிகமாக இருந்தது. இந்த சூழ்நிலையில், கோடைக்காலத்தில் வழக்கத்தை விட அதிக வெப்பநிலை இருக்கும் என்று இந்திய வானிலை மையம் கணித்துள்ளது. இது தொடர்பாக, 2025 பிப்ரவரி 28ம் தேதியன்று இந்திய வானிலை ஆய்வு மையம் வெளியிட்ட அறிக்கையில், மார்ச் முதல் மே வரையிலான மாதங்களில் இந்தியாவின் வடமேற்கு மற்றும் தீபகற்பத்தின் சில பகுதிகளை தவிர்த்து, பெரும்பாலான பகுதிகளில் இயல்பை விட அதிக வெப்பநிலை இருக்கும் என்று தெரிவித்துள்ளது.

குறிப்பாக, மத்திய மற்றும் வடக்கு பகுதிகளில் வெப்பஅலை நாட்கள் எண்ணிக்கையில் அதிகரிப்பு ஏற்படும் என்று வானிலை மையம் எச்சரித்துள்ளது. இந்திய வானிலை மையத்தின் கணிப்பை தொடர்ந்து, கோடைக்கால தேவை அதிகரிக்கும் என்ற எதிர்ப்பார்ப்புகளின் காரணமாக, நேற்று மும்பை பங்குச் சந்தையில் ஏசி நிறுவன பங்குகளின் விலை 9 சதவீதம் வரை உயர்ந்தது. பங்குச் சந்தையில் நேற்று வர்த்தகத்தின் இடையே ப்ளூ ஸ்டார் லிமிடெட் பங்கு விலை 9 சதவீதம் வரை உயர்ந்து ரூ.2,216.70ஐ எட்டியது.

மற்றொரு ஏசி தயாரிப்பு நிறுவனமான வோல்டாஸ் பங்கு விலை 3.33 சதவீதம் உயர்ந்து ரூ.1,410.95வரை சென்றது. ஜான்சன் கண்ட்ரோல்ஸ்-ஹிட்டாச்சி ஏர் கண்டிஷனிங் இந்தியா லிமிடெட் பங்கு விலை 2 சதவீதம் உயர்ந்து அன்றைய அதிகபட்சமான ரூ.1,680ஐ தொட்டது. வலுவான கோடைக் காலம் ஏர் கண்டிஷனிங் துறையில் உள்ள நிறுவனங்களுக்கு அதிக வருவாய் அளிக்கக்கூடும் என்பதால், முதலீட்டாளர்கள் வெப்பநிலை போக்குகள் மற்றும் நுகர்வோர் செலவு முறைகளை உன்னிப்பாக கவனித்து வருகின்றனர்.

Story Written :Subramanian

Disclaimer: This article is strictly for informational purposes only. It is not a solicitation to buy, sell in precious metal products, commodities, securities or other financial instruments. Greynium Information Technologies Pvt Ltd, its subsidiaries, associates and the author of this article do not accept culpability for losses and/or damages arising based on information in this article.