உங்களுக்கு சிப்ஸ் பிடிக்குமா..? 12% ஜிஎஸ்டி கட்ட தயாராகுங்க..!

இந்தியாவில் இருக்கும் பல நொறுக்கு தீனிகளில் மிக முக்கியமான ஒன்று சிப்ஸ். பல சுவைகளில் இருக்கும் சிப்ஸ் பெரியவர்கள் முதல் சிறியவர்கள் வரையில் அனைவரும் விரும்பி சாப்பிடும் உணவு வகைகளில் ஒன்று. சிப்ஸ்-க்கு 12 சதவீதம் வரி விதிக்க ஜிஎஸ்டி கேரளா பென்ச் முடிவு செய்துள்ளது.

பிராண்டட் சிப்ஸ் மற்றும் நொறுக்கு தீனிக்கு ஏற்கனவே வரி விதிக்கப்பட்டு வருகிறது, உதாரணமாகக் குழந்தைகள் அனைவரும் விரும்பி சாப்பிடும் லேஸ் சிப்ஸ்-க்கு 12 சதவீதம் வரி விதிப்பு நடைமுறையில் உள்ளது.

பிராண்டட் அல்லாத சிப்ஸ்

இதேபோல் தற்போது பிராண்டட் அல்லாத சிப்ஸ்-க்கு நம்கீன் எனப் பிரிவில் 5 சதவீதம் வரையில் மட்டுமே வரி விதிக்கப்பட்டு வந்த நிலையில், தற்போது இதற்கும் 12 சதவீதம் வரி விதிக்கப்படும் என ஜிஎஸ்டி அத்தாரிட்டி பார் அட்வான்ஸ் ரூலிங்க்ஸ்-ன் கேரளா பென்ச் அறிவித்துள்ளது.

பாலக்காடு கே.சாமிநாதன்

கே.சாமிநாதன் என்கிற பாலக்காடு-ஐ சேர்ந்த வியாபாரி ஒருவர் பல்வேறு சிப்ஸ், அல்வா, வறுத்த முந்திரி, வறுத்த கடலை வகைகளைப் பிராண்டட் அல்லாத பொருட்களாக விற்பனை செய்து வருகிறார்.சாமிநாதன் தான் விற்பனை செய்யும் அனைத்து பொருட்களும் நம்கீன் வகையைச் சார்ந்தது அதனால் 5 சதவீதம் ஜிஎஸ்டி வரி மட்டும் விதிக்க வேண்டும் எனக் கோரிக்கை விடுத்தார் .

கேரளா பென்ச்

இதற்கு ஜிஎஸ்டி அத்தாரிட்டி பார் அட்வான்ஸ் ரூலிங்க்ஸ்-ன் கேரளா பென்ச், அல்வா-க்கு மட்டுமே 5 சதவீத வரி பொருந்தும் மற்றவை வறுத்த முந்திரி, வறுத்த கடலை ஆகியவற்றுக்குப் பிராண்டட் பொருளாக இல்லாவிட்டாலும் 12 சதவீதம் வரி பொருந்தும் என விளக்கம் அளித்துள்ளது.

12 சதவீத ஜிஎஸ்டி வரி

28.06.2017 வெளியான மத்திய வரி விதிப்பு உத்தரவின் படி சாமிநாதன் விற்பனை செய்யும் அனைத்துவிதமான பலாப்பழ சிப்ஸ், வாழைப்பழ சிப்ஸ், உருளைக்கிழங்கு சிபஸ், கிழங்கு சிப்ஸ், வறுத்த முந்திரி ஆகியவை 12 சதவீத வரியின் கீழ் (6% -CGST + 6% - SGST) பொருந்தும் எனத் தெரிவித்துள்ளது கேரளா பென்ச்.