பெங்களுரூ: உலக சந்தையில் நிலவும் மந்தமான வர்த்தகத்தாலும், தங்கத்தின் தேவை குறைந்ததாலும் புல்லியன் சந்தையில் வியாழக்கிழமை 10 கிராம் தங்கத்தின் விலை 120 ரூபாய் குறைந்து 28,300 ரூபாய் என்ற விலையில் வர்த்தகம் செய்யப்படுகிறது.

தங்கத்தை போல வெள்ளியின் விலையிலும் இன்றைய வர்த்தகத்தில் சரிவை சந்தித்தது, ஒரு கிலோ வெள்ளியின் விலை 420 ரூபாய் சரிந்து 39,100 ரூபாய்க்கு விற்கப்பட்டது.

விலை சரிவை குறித்து வர்த்தகர்கள் கூறுகையில் உள்நாட்டுச் சந்தையில் தங்கம் மற்றும் தங்க நகைகளின் தேவை குறைந்ததாலும், உலக சந்தையில் நிலவும் மந்தமான வர்த்தகத்தாலும், டாலர் மதிப்பு உயர்வதாலும் இன்று தங்கம் மற்றும் வெள்ளியின் விலை சரிந்துள்ளது.

மேலும் உள்நாட்டு தங்கத்தின் விலை நிர்ணயம் செய்யும் சிங்கப்பூர் சந்தையில் தங்கத்தின் விலை 0.5 சதவீதம் சரிந்து ஒரு அவுன்ஸ் தங்கத்தின் விலை 1,278.27 டாலர் என்ற விலையில் விற்கப்பட்டது. இதேபோல் வெள்ளியின் விலையிலும் 0.9 சதவீதம் சரிவு கண்டது.

இன்றைய வர்த்தக நிலவரப்படி அமெரிக்க டாலருக்கு எதிரான இந்தியா ரூபாயின் மதிப்பு 61.70 ரூபாயாக உள்ளது.

மேலும் இந்திய சந்தை தவிர உலக சந்தைகள் அனைத்தும் வியாழக்கிழமை சரிவிலேயே முடிவடைந்துள்ளது. இதில் குறிப்பாக ஹாங்காங், ஜப்பான் மற்றும் சீனா ஆகிய நாடுகள் அனைத்தும் சரிவிலேயே முடிவடைந்துள்ளது. மேலும் ஜெர்மனி, பிரான்ஸ் மற்றும் யு.கே சந்தைகள் சிரிவிலேயே வர்த்தகம் செய்யப்படுவது குறிப்பிடதக்கது.