ஓரே நாளில் கிராமிற்கு 32 ரூபாய் உயர்ந்தது தங்கம் விலை!

மும்பை: அமெரிக்கப் பெடரல் வங்கியின் வட்டி விகித உயர்வு முடிவுகள் டிசம்பர் மாதத்திற்கு ஒத்திவைத்ததன் மூலம் சர்வதேச நாணய சந்தையில் தங்கம் மற்றும் வெள்ளி மீதான முதலீடு தொடர்ந்து அதிகரித்து வருகிறது.

இதன் காரணமாகக் கடந்த 3 நாட்களாகத் தங்கம் விலை தொடர் உயர்வு பாதையில் உள்ளது.

வெள்ளிக்கிழமை வர்த்தக முடிவில் தங்கம் நிலை கிராமிற்கு 32 ரூபாய் வரை உயர்ந்து 1 மாத விலை சரிவை ஈடு செய்தது.

இந்நிலையில் இன்றைய வர்த்தகத்தில் 24 கேரட் 1 கிராம் தங்கத்தின் விலை 32 ரூபாய் உயர்ந்து 2,708 ரூபாயை எட்டியுள்ளது. அதேபோல் 22 கேரட் 1 கிராம் தங்கத்தின் விலை 31 ரூபாய் வரை உயர்ந்து 2,532 ரூபாய்க்கு விற்பனை செய்யப்படுகிறது.

தங்கத்தை போலவே வெள்ளியின் விலையும் இன்று ஏறுமுகத்திலேயே இருந்தது. வெள்ளிக்கிழமை வர்த்தக முடிவில் 1 கிலோ பார் வெள்ளியின் விலை 310 ரூபாய் உயர்ந்து 35,850 ரூபாய்க்கு விற்கப்படுகிறது.