மும்பை: கிறிஸ்துமஸ் மற்றும் புத்தாண்டு விழாக்கள் காரணமாக அமெரிக்கா, ஐரோப்பிய சந்தையில் தொடர் விடுமுறையின் மூலம் அதிகளவிலான வர்த்தகம் குறைந்துள்ளது. இதனால் இந்திய சந்தையில் அன்னிய முதலீட்டாளர்களின் முதலீடு குறைந்து சென்செக்ஸ் குறியீடு 170 புள்ளிகளை வரை சரிந்துள்ளது.
மேலும் அமெரிக்க மற்றும் ஐரோப்பிய சந்தையின் தொடர் விடுமுறையின் காரணமாக இந்திய ஐடி நிறுவனப் பங்குகளின் நிலை மோசமடைந்தது.
சென்செக்ஸ் குறியீடு
திங்கட்கிழமை வர்த்தகத்தில் 200 புள்ளிகள் வரை உயர்ந்த மும்பை பங்குச்சந்தையின் சென்செக்ஸ் குறியீடு இன்றைய வர்த்தகத்தில் 145.25 புள்ளிகள் வரை சரிந்துள்ளது.
வர்த்தகத் துவக்கத்தில் குறைந்த அளவிலான சரிவை சந்தித்த மும்பை பங்குச்சந்தை ஐரோப்பிய சந்தை துவங்கிய சில மணிநேரங்களில் சென்செக்ஸ் தொடர் சரிவைச் சந்தித்தது.
நிஃப்டி
செவ்வாய்க்கிழமை வர்த்தகத்தில் ப்ளூ சிப் பங்குகள் அதிகளவில் விற்பனை செய்யப்பட்டதால் நிஃப்டி குறியீடு 48.35 புள்ளிகள் வரை சரிந்து 7,786.10 புள்ளிகளை அடைந்தது.
ஐடி நிறுவனங்கள்
பொதுவாக இந்திய ஐடி நிறுவனங்களின் பெரும் அளவிலான வர்த்தகம் அமெரிக்க மற்றும் ஐரோப்பிய சந்தையைச் சார்ந்து உள்ளது. கிறிஸ்துமஸ் மற்றும் புத்தாண்டு விழாக்கள் மேற்கத்திய நாடுகளில் வெகு விமர்சியாகக் கொண்டாடப்படுவதால் 24 ஆம் தேதியில் இருந்து ஜனவரி 2ஆம் தேதி வரை அனைத்துத் தனியார் மற்றும் அரசு நிறுவனங்களுக்கு விடுமுறை அளிக்கப்பட உள்ளது.
இதன் காரணமாக இந்திய சந்தையில் ஐடி நிறுவனப் பங்குகளை முதலீட்டாளர்கள் அதிகளவிலான பங்குகளை விற்கத் துவங்கினர்.
தங்கம் விலை
இன்றைய நாணய சந்தை வர்த்தகத்தில் 24 கேரட் 1 கிராம் தங்கத்தின் விலை 14 ரூபாய் அதிகரித்து 2,573 ரூபாய்க்கும், 22 கேரட் 1 கிராம் தங்கம் 13 ரூபாய் அதிகரித்து 2,406 ரூபாய்க்கு விற்பனை செய்யப்படுகிறது.