லாபம்

என்.சந்திரசேகரன் தலைமை வகிக்கும் டிசிஎஸ் நிறுவனம் 2016ஆம் நிதியாண்டின் முதல் காலாண்டில் சந்தைக் கணிப்புகளையும் தாண்டி 6,318 கோடி ரூபாய் லாபத்தை அடைந்துள்ளது. இது கடந்த காலாண்டை ஒப்பிடுகையில் 0.36 சதவீதம் குறைவாக இருந்தாலும், இதன் அளவு சந்தை கணிப்புகளை விட அதிகமாகும்.

வருவாய்

2015ஆம் 4வது காலாண்டை ஒப்பிடுகையில் 2016ஆம் ஆண்டில் முதல் காலாண்டில் டிசிஎஸ் நிறுவனத்தின் வருவாய் 3 சதவீதம் உயர்ந்து 29,305 கோடி ரூபாயாக உயர்ந்துள்ளது.

டாலர் வருவாய் அளவுகளில் இதன் அளவு 3.7 சதவீதம் அதிகமாகும். ஏப்ரல் - ஜூன் மாத காலகட்டத்தில் டாலர் வருவாய் மதிப்பு 4,362 மில்லியன் டாலராக உள்ளது.

டிஜிட்டல் வருவாய்

டிசிஎஸ் நிறுவனத்தின் 15.9 சதவீத வருவாய் இந்நிறுவனத்தின் டிஜிட்டல் வர்த்தகம் மூலம் கிடைத்துள்ளது. இப்பிரிவு சார்ந்த தொழில்நுட்பத்தில் சுமார் 1.65 லட்சம் ஊழியர்களுக்குப் பயிற்சி அளிக்கப்பட்டுள்ளதாகவும் டிசிஎஸ் தெரிவித்துள்ளது.

புதிய தொழில்நுட்பம்

வருவாய், லாப அளவில் உயர்விற்கு ஏற்ப நிறுவனம் சந்தை தேவைக்கு இணங்க கிளவுட், பிக் டேட்டா அண்ட் அனலிடிக்ஸ் பிரிவின் வர்த்தகம் சிறப்பான வளர்ச்சியை அடைந்துள்ளது என என். சந்திரசேகரன் செய்தியாளர்களுக்குத் தெரிவித்தார்.

ஊழியர்கள் வெளியேற்பு

கடந்த 3 காலாண்டுகளாக இந்நிறுவனத்தின் ஊழியர்கள் வெளியேற்பு அளவு குறைந்து வருகிறது. இது இந்நிறுவனத்தின் நிலையான வர்த்தகம் மற்றும் வளர்ச்சிக்கு முக்கியக் காரணமாக அமைந்துள்ளது.

2016ஆம் ஆண்டின் முதல் காலாண்டில் இந்நிறுவனத்தின் ஊழியர்கள் வெளியேற்பு அளவு 13.6 சதவீதமாகக் குறைந்துள்ளது.

ஊழியர்கள் எண்ணிக்கை

ஜூன் 2016ஆம் ஆண்டு முடிவில் இந்நிறுவனத்தின் ஊழியர்கள் எண்ணிக்கை 3.62 லட்சமாக உள்ளது. ஏப்ரல்-ஜூன் காலகட்டத்தில் இந்நிறுவனத்தில் சுமார் 17,792 பேர் இணைந்துள்ளனர்.

முதல் காலாண்டு

இக்காலாண்டில் டிசிஎஸ் நிறுவனம் 20 மில்லியன் டாலர் திட்டத்தில் 6 வாடிக்கையாளர், 50 மில்லியன் டாலர் திட்டத்தில் 4 வாடிக்கையாளர்களையும் பெற்றுள்ளது.

பங்குதாரர்கள்

2016ஆம் ஆண்டு முதல் காலாண்டு முடிவுகளை வெளியிட்ட டிசிஎஸ் நிறுவனம் தனது பங்குதாரர்களுக்கு ஒரு பங்கிற்கு 6.50 ரூபாய் என்ற ஈவுத்தொகையை அறிவித்துள்ளது.

பங்குகள்

இன்றைய வர்த்தகத்தில் டிசிஎஸ் நிறுவனத்தின் பங்குகள் மும்பை பங்குச்சந்தையில் 1.15 சதவீதம் உயர்ந்து 2,520.30 ரூபாய்க்கு வர்த்தகம் செய்யப்படுகிறது.

பிரிக்ஸிட்

மேலும் பிரிக்ஸிட் மூலம் டிசிஎஸ் நிறுவனம் இதுவரை எவ்விதமான பாதிப்புகளையும் எதிர்கொள்ளவில்லை என டிசிஎஸ் நிறுவனத்தின் சீஇஓ என்.சந்திரசேகரன் தெரிவித்துள்ளார்.