உங்கள் விலை மதிப்புள்ள பொருட்கள், ஆவணங்கள் போன்றவற்றை வங்கி லாக்கர்களில் வைப்பது பாதுகாப்பானது. ஆனால் லாக்கரை வாடகைக்கு எடுக்க மற்றும் தேவைப்படும் போது திறந்து பார்க்கக் கட்டணங்கள் வசூலிக்கப்படுவது குறிப்பிடத்தக்கது.

பெரும்பாலான வங்கிகளில் வருடத்திற்கு 12 முறை வரை இலவசமாக லாக்கரை திறந்து பார்க்க அனுமதிக்கப்படுகிறது. இந்த வரம்பைத் தாண்டும் போது கட்டணங்கள் வசூலிக்கப்படுகிறது.

வாடிக்கையாளர்களுடன் நட்புறவை அதிகரிக்க முன்பு வருடத்திற்கு 12 முறை இலவசமாக தங்கள் லாக்கரை பார்த்துக்கொள்ளலாம் என்று இருந்ததை வரம்பற்ற முறையில் இலவசமாக பார்த்துக் கொள்ளலாம் என்று பஞ்சாப் நேஷ்னல் வங்கி அறிவித்துள்ளது.

சென்ற மாதம் வரை வருடத்திற்கு 12 முறைக்கு மேல் லாக்கரை திறக்க விரும்புவோருக்கு ஒரு முறை திறந்து பார்க்க ரூ.50 கட்டணமாக வசூலித்து வந்தது. பெரும்பாலான தேசிய வங்கிகளில் இந்தக் கட்டணம் வசூலிக்கப்பட்டு வரும் நிலையில் பஞ்சாப் நேஷ்னல் வங்கி லாக்கர் கட்டணத்தை முழுவதுமாக மாற்றியுள்ளது.

இதற்கு வாடிக்கையாளர்களிடம் நல்ல வரவேற்பு கிடைத்துள்ளதாகவும், நட்புறவை அதிகரிக்க உதவுவதாகவும் மற்றும் வாடிக்கையாளர்களை ஊக்குவிக்கும் விதமாகவும் உள்ளதாக வங்கி அதிகாரி ஒருவர் தெரிவித்தார்.

பஞ்சாப் நேஷ்னல் வங்கியின் லாக்கர் செயல்பாட்டு வழிமுறைகளின் படி அதிக ஆபத்து லாக்கர் வாடிக்கையாளர்கள் வருடத்திற்குக் குறைந்தது ஒரு முறையும், நடுத்தர ஆபத்து லாக்கர் வாடிக்கையாளர்கள் மூன்று வருடத்திற்கு ஒரு முறையும் கண்டிப்பாக திறந்து பார்க்க வேண்டும்.

அவ்வாறு பார்க்கவில்லை எனில் சில காலங்களில் லாக்கர்களை நிறுவனம் உடைத்துத் திறந்து விடும்.