தங்க விலை நிலவரம்

22 கேரட் 10 கிராம் ஆபரணத் தங்கத்தின் விலை (Gold Price) கடந்த ஆகஸ்ட் 01, 2019 அன்று 33,150 ரூபாயாக இருந்தது. இப்போது அதே 22 கேரட் 10 கிராம் தங்கத்தின் விலை 36,030 ரூபாய்க்கு மேல் விற்கப்பட்டு வருகின்றன. 24 கேரட் 10 கிராம் ஆபரணத் தங்கத்தின் விலை (Gold Price) கடந்த ஆகஸ்ட் 01, 2019 அன்று 36,160 ரூபாயாக இருந்தது. இப்போது அதே 24 கேரட் 10 கிராம் தங்கத்தின் விலை 39,400 ரூபாய்க்கு மேல் விற்கப்பட்டு வருகின்றன.

22 கேரட் 19% அதிகம்

2019-ம் ஆண்டு உண்மையாகவே தங்கத்துக்கான ஆண்டு தான் போல. சுமாராக கடந்த 2013 - 14 ஆண்டுகளில் இருந்து 2018-ம் ஆண்டு வரை காணாத விலை ஏற்றத்தை, இந்த 2019-ம் ஆண்டின் ஜனவரி தொடங்கி ஆகஸ்ட் வரையான 7 மாத காலங்களிலேயே நல்ல விலை ஏற்றம் கண்டிருக்கிறது. 22 கேரட் 10 கிராம் ஆபரணத் தங்கத்தின் விலை கடந்த ஜனவரி 01, 2019 அன்று 30,170 ரூபாயாக இருந்தது.

ஆபரணத் தங்கம்

இப்போது அதே 22 கேரட் 10 கிராம் தங்கத்தின் விலை (Gold Price) 36,030 ரூபாய்க்கு மேல் விற்கப்பட்டு வருகின்றன. ஆக சுமார் 19 சதவிகிதம் விலை ஏற்றம் கண்டிருக்கிறது. 22 கேரட் 10 கிராம் ஆபரணத் தங்கத்தின் விலையே இந்த ஏற்றம் கண்டிருக்கிறது என்றால்... 24 கேரட் 10 கிராம் ஆபரணத் தங்கத்தின் விலை என்ன ஏற்றம் கண்டிருக்கும்..? வாருங்கள் அதையும் கணக்கு போட்டு பார்த்துவிடுவோம்.

சொக்கத் தங்கம்

24 கேரட் சொக்கத் தங்கம் 10 கிராமின் விலை கடந்த ஜனவரி 01, 2019 அன்று 31,650 ரூபாயாக இருந்தது. இப்போது அதே 24 கேரட் 10 கிராம் தங்கத்தின் விலை 39,400 ரூபாய்க்கு மேல் விற்கப்பட்டு வருகின்றன. ஆக சொக்கத் தங்கத்தின் விலை சுமார் 24 சதவிகிதம் இந்த ஜனவரி 2019 தொடங்கி இன்று வரை விலை ஏற்றம் கண்டிருக்கின்றன. வெறும் ஏழு மத காலத்தில் 24 சதவிகித விலை ஏற்றம் என்பதை இன்னும் நம்மால் ஜீரணித்துக் கொள்ள முடியவில்லை.

விலை ஏற்றப் போக்கு

கடந்த ஜனவரி 01, 2019-ல் 31,650 ரூபாய்க்கு விற்கத் தொடங்கிய 24 கேரட் 10 கிராம் தங்கத்தின் விலை பிப்ரவரி 20, 2019 அன்று 35,130 என்கிற புதிய உச்சத்தைத் தொட்டது. பிப்ரவரி முதல் ஜூன் 20, 2019 வரை 24 கேரட் 10 கிராம் தங்கத்தின் விலை இந்த 35,130 என்கிற உச்சத்தைக் கடக்கவில்லை. ஆக தங்கத்தின் விலை ஏற்றத்தில் இது தான் இந்த 2019-ம் வருடத்தின் முதல் பெரிய ஏற்றம்.

இரண்டாம் ஏற்றம்

ஜூன் 21, 2019 அன்று தான் மீண்டும் தங்கத்தின் விலை ஏற்றம் காணத் தொடங்குகிறது. ஜூன் 21, 2019 அன்று 24 கேரட் 10 கிராம் தங்கத்தின் விலை 35,380 என்கிற உச்சம் தொடுகிறது. அதன் பின் தங்கத்தின் விலை (Gold Price) இன்று வரை நிதானமாக ஏற்றம் கண்டு இன்று ஆகஸ்ட் 13, 2019 வரை 39,400 என்கிற உச்ச விலையில் விற்கப்பட்டு வருகின்றன.

உலக பொருளாதாரம்

உலக பொருளாதாரம் அடுத்த ஒன்பது மாதங்களில் ஒரு recession-ல் சிக்கலாம் எனச் சொல்கிறார்கள். அப்படி உலக பொருளாதாரம் ரெசசனில் சிக்கினால் தங்கத்தின் விலை (Gold Price) இன்னும் அதிகரிக்கலாம் என்கிறார்கள் தங்க அனலிஸ்டுகள். ஆக இந்த 2019-ல் தங்கச்சி கல்யாணம், மகள் திருமணத்துக்கு நகை வாங்குபவர்கள் இப்போது தங்கம் விற்கும் விலைக்கே வாங்கிப் போட யோசியுங்கள்.