சத்தமில்லாமல் அடித்துக்கொள்ளும் டாடா, ரிலையன்ஸ்.. மக்களுக்கு தான் ஜாக்பாட்..!!

இந்திய வர்த்தக வரலாற்றில் பல இடத்தில் டாடா-வும் அம்பானியும் நேருக்கு நேர் போட்டிப்போட்டு தருணங்கள் மிகவும் குறைவு என்றாலும், ஒவ்வொன்றும் முக்கியமானது. அந்த வகையில் கடந்த 5 வருடத்தில் இரு சாம்ராஜ்ஜியங்களும் ரீடைல் சந்தையை கைப்பற்றும் திட்டத்துடன் களத்தில் இறங்கியுள்ளது.

ரிலையன்ஸ் ரீடைல் தனது புதிய பிராண்ட் 'யூஸ்டா’ (Yousta) மூலம் இந்தியாவில் புதிதாக உருவாகியுள்ள வேல்யூ பேஷன் பிரிவில் நுழைந்துள்ளது. ஸ்டைலான மற்றும் மலிவு விலையில் ஆடைகளை வழங்குவது தான் இந்த வேல்யூ பேஷன் பிரிவு, இதில் தற்போது டாடா குழுமத்தின் பிரபலமான பிராண்டாக மாறியிருக்கும் ஜூடியோ பிராண்டின் வெற்றியில் பங்குப்போட ரிலையன்ஸ் Yousta பிராண்ட் மிகப்பெரிய அளவில் விரிவாக்கம் செய்து வருகிறது.

2023 ஆம் ஆண்டு ஆகஸ்ட் மாதம் தொடங்கப்பட்ட யூஸ்டா, அதன் முதல் ஆண்டிலேயே 50 கடைகளைத் திறந்து குறிப்பிடத்தக்க சாதனையை அடைந்துள்ளது. இங்கு பெரும்பாலான பொருட்கள் ரூ.499 க்கும் குறைவாக விலை நிர்ணயிக்கப்பட்டுள்ளது, அனைத்து பொருட்களுக்கும் 999 ரூபாய்க்கு உள்ளேயே விலை நிர்ணய செய்யப்பட்டு அதிகப்படியான வாடிக்கையாளர்களை ஈர்க்கும் இலக்குடன், ஜூடியோவின் மாடலை பின்பற்றி நடக்கிறது.

ரிலையன்ஸ் ரீடைல், Yousta பிராண்டின் மூலம் ஒவ்வொரு வாரமும் புது புது கலெக்ஷன்-ஐ அறிமுகம் செய்யவும், தினமும் பயன்படுத்தும் யுனிசெக்ஸ் ஆடைகளையும், character merchandise ஆகிய பொருட்கள் வழங்க திட்டமிட்டு உள்ளது. ஜூடியோ-வின் வெற்றியைப் பின்பற்ற விரும்பும் Yousta பிராண்டின் அப்படியே காப்பி அடிக்க துவங்கியுள்ளது.

இதேபோல் Yousta பிராண்டின் ஜூடியோ போலவே பிரான்சைஸ் மாதிரியுடன் இணைந்து, செலவுகளைக் குறைத்து வரைவாக விரிவாக்கத்தை துரிதப்படுத்த முடிவு செய்துள்ளது.

இதற்காக ரிலையன்ஸ் இண்டஸ்ட்ரீஸ் கடந்த நிதியாண்டில் ரிலையன்ஸ் ரீடைல்-க்கு ரூ.14,839 கோடி ரூபாயை கடனாக கொடுத்துள்ளது. கடந்த பத்து ஆண்டுகளில் பெறப்பட்ட மிகப்பெரிய முதலீடாக இது உள்ளது. இது ரீடைல் துறையில் மலிவுவிலை பேஷனுக்கு அதிகரித்து வரும் தேவையைப் பயன்படுத்திக் கொள்ளும் நோக்கத்தில் முதலீடு செய்யப்பட்டு உள்ளது.

இந்தியாவில் வேல்யூ பேஷன் பிரிவு விரைவாக விரிவடைந்து வருவதால், ரிலையன்ஸ் ரீடைலின் யூஸ்டா மற்றும் டாடா குழுமத்தின் ஜூடியோ இடையேயான போட்டி தீவிரமடைய உள்ளது. சமீபத்தில் டாடா ஜூடியோ அழகு சாதன பொருட்களுக்காக தனிப்பட்ட கடையை திறந்தது குறிப்பிடத்தக்கது.