200 ஊழியர்களை பணிநீக்கம் செய்த புக் மை ஷோ.. கண்ணீரில் ஊழியர்கள்..!

கொரோனா தொற்றுக் காரணமாக நீண்ட காலமாக இந்தியாவில் சினிமா தியேட்டர் இயக்குவதில் பலவிதமான கட்டுப்பாடுகள் விதிக்கப்பட்டு வரும் நிலையில் சினிமா துறை அதிகளவிலான பாதிப்பு அடைந்து வருகிறது. இதற்கிடையில் ஆன்லைன் சினிமா டிக்கெட் விற்பனை சேவை நிறுவனமான புக் மை ஷோ வர்த்தகம் இல்லாமல் கடுமையாகப் பாதித்துள்ளது.

இதன் வாயிலாகப் புக் மை ஷோ தனது நிதிநிலையைச் சமாளிக்கவும், தொடர்ந்து சேவை அளிக்கும் வகையில் மாற வேண்டும் என இலக்குடன் சுமார் 200 ஊழியர்களைப் பணிநீக்கம் செய்துள்ளது. இதுகுறித்து புக் மை ஷோ நிறுவனத்தின் துணை நிறுவனர் மற்றும் சிஇஓ-வான ஆசிஷ் டிவிட்டரில் தெரிவித்துள்ளார்.

புக் மை ஷோ நிறுவனம்

கொரோனா மூலம் பெரும் வர்த்தகத்தை இழந்த புக் மை ஷோ 2வது முறையாக ஊழியர்களைப் பணிநீக்கம் செய்துள்ளது. லாக்டவுன் காரணமாகச் சினிமா ரிலீஸ் எண்ணிக்கையும் பெரிய அளவில் குறைந்து. இதனால் சினிமா துறை மட்டும் அல்லாமல் சினிமா துறை சார்ந்து இருக்கும் நிறுவனங்களும் பாதிக்கப்பட்டு உள்ளது.

80 சதவீத வர்த்தகம் இழப்பு

அதேபோல் கடந்த ஒரு வருடம் லாக்டவுன் காரணமாகத் தியேட்டர்கள் பெரும்பாலான நேரம் மூடப்பட்டு இருந்த காரணத்தால் நிறுவனத்தை நிலையாக நடத்த முடியாமல் முடங்கியுள்ளது. இதனால் புக் மை ஷோ கடந்த ஒரு வருடத்தில் சுமார் 80 சதவீத வர்த்தகத்தை இழந்துள்ளது.

மொத்தம் 470 ஊழியர்கள் பணிநீக்கம்

கடந்த வருடம் மே மாதம் புக் மை ஷோ சுமார் 270 ஊழியர்களைப் பணிநீக்கம் செய்த நிலையில், தற்போது புதிதாக 200 ஊழியர்களைப் பணிநீக்கம் செய்துள்ளது. இதன் மூலம் 2020ல் 1500 ஊழியர்களை வைத்திருந்த புக் மை ஷோ தற்போது 1000 ஆகக் குறைந்துள்ளது.

புக் மை ஷோ சிஇஓ டிவீட்

ஊழியர்கள் பணிநீக்கம் குறித்துப் புக் மை ஷோ நிறுவனத்தின் துணை நிறுவனர் மற்றும் சிஇஓ-வான ஆசிஷ் தனது டிவிட்டரில் கோவிட் பல பாடங்களைக் கற்றுக்கொடுத்துள்ளது. இன்று புதிதாக ஒன்று கற்றுக்கொண்டேன். தற்போது பணிநீக்கம் செய்யப்படும் 200 ஊழியர்களும் மிகவும் திறமையானவர்கள். அனைவருக்கும் புக் மை ஷோ நிறுவனத்தில் பணியாற்றியதிற்கு நன்றி தெரிவித்துள்ளனர் என டிவீட் செய்துள்ளார்.