தீபாவளிக்கு முன்பு இப்படியொரு அறிவிப்பா.. கண்ணீரில் Byju's ஊழியர்கள்..!!

பெங்களூரை தலைமையிடமாகக் கொண்டு இயங்கி வரும் எட்டெக் நிறுவனமான BYJU'S பல நிர்வாகப் பிரச்சனை, நிதி நெருக்கடி, கடன் பிரச்சனைகள் எனத் தலை முதல் கால் வரையில் பிரச்சனைகளின் கூடாரமாக இருந்து வருகிறது. BYJU'S நிர்வாகத்தைச் சீர்படுத்தவும், அதன் கீழ் இருக்கும் நிறுவனங்களின் நிர்வாகத்தை மறுசீரமைப்புச் செய்ய முடிவெடுக்கப்பட்டது.

இதற்காகப் பைஜூ ரவீந்திரன் மற்றும் திவ்யா கோகுல்நாத் ஆகியோர் அடங்கிய BYJU'S நிர்வாகக் குழு சமீபத்தில் பைஜூஸ் நிறுவனத்தின் இந்திய வர்த்தகத்தின் புதிய சிஇஓ-வாக அர்ஜூன் மோகன் நியமிக்கப்பட்டார். இவருக்குக் கொடுக்கப்பட்ட முக்கியமான டாஸ்க் நிறுவனத்தை எப்படியாவது லாபகரமான நிலைக்குக் கொண்டு வர வேண்டும் என்பது தான்.

அர்ஜூன் மோகன் நிர்வாகத்தின் கீழ் பைஜூஸ் நிறுவனத்தில் பெரும் நிர்வாக மாற்றம் மறுசீரமைப்பு பணிகளின் ஒரு பகுதியாக அக்டோபர் மாதம் மட்டுமே கன்டென்ட் மற்றும் மார்கெட்டிங் குழுக்களில் இருந்து கிட்டத்தட்ட 600 ஊழியர்களைப் பணிநீக்கம் செய்யப்பட்டு உள்ளதாகத் தகவல் வெளியாகியுள்ளது.

இந்த நடவடிக்கையில் மார்கெட்டிங் குழுவை காட்டிலும் இந்நிறுவனத்தின் முதுகெலும்பாக இருக்கும் கன்டென்ட் மற்றும் வீடியோ குழுவில் அதிகப் பணிநீக்கம் செய்யப்பட்டு உள்ளதும் தெரிய வந்துள்ளது, ஏனெனில் இதற்கு முன்பு சில வர்த்தகத்தில் மார்கெட்டிங் பிரிவு மொத்தமாக மூடப்பட்டது குறிப்பிடத்தக்கது.

இதனால் கன்டென்ட் தயாரிப்பு குழுவின் ஒரு பகுதியாக இருந்த ஆசிரியர்கள் மற்றும் கல்வியாளர்களும் இந்தப் பணிநீக்க நடவடிக்கையால் பாதிக்கப்பட்டுள்ளனர். தீபாவளி பண்டிக்கைக்கு முன்பு வெளியான இந்த அறிவிப்பு 600 ஊழியர்களின் குடும்பத்தைச் சோகத்தைத் தாண்டி பலரின் வாழ்க்கை தலைகீழாகப் புரட்டிப்போடப்பட்டு இருக்கும்.

BYJU இன் புதிய இந்தியா தலைமை நிர்வாக அதிகாரி அர்ஜுன் மோகன் தலைமையில் மேற்கொள்ளப்பட்ட ஆட்குறைப்பு நடவடிக்கையின் ஒரு பகுதியாகத் தற்போதைய பணிநீக்கங்கள் நடந்துள்ளது உறுதியாகியுள்ளது. பைஜுஸ் நிறுவனத்தின் மார்கெட்டிங் பிரிவின் தலைவர் அதித் மேத்தா, கன்டென்ட் தலைவர் ஆஷீஷ் ஷர்மா மற்றும் பிற பிரிவுகளின் தலைவர்கள் நிறுவனத்திலிருந்து வெளியேறுவதாக அறிவிப்புகள் வந்த பின்னர் 600 ஊழியர்கள் பணிநீக்கம் அறிவிப்புகள் வந்துள்ளது.

அர்ஜுன் மோகன் தலைமையிலான மறுசீரமைப்பு நடவடிக்கையில் பைஜூஸ் நிறுவனத்தில் 4500 முதல் 5500 ஊழியர்கள் வரையில் பணியில் இருந்து நீக்கப்படுவதாகவும், பணிநீக்கம் செய்யப்படும் ஊழியர்களின் பட்டியலில் நிரந்தர ஊழியர்களும், ஒப்பந்த ஊழியர்களும் அடங்குவார்கள் எனக் கடந்த மாதம் தெரிவிக்கப்பட்டு இருந்தது குறிப்பிடத்தக்கது.