தங்கம் விலை உயர போகுதா? - மீண்டும் அதிகளவில் தங்கம் வாங்கும் மத்திய வங்கிகள் !!

நடப்பாண்டில் தங்கம் விலை வரலாறு காணாத உச்சத்தை எட்டியது. இதற்கு சீனா உள்ளிட்ட பல்வேறு நாடுகளின் மத்திய வங்கிகள் அதிகமாக தங்கம் வாங்கியதே காரணம். தற்போது தங்கம் விலை தன்னுடைய வரலாற்று உச்சத்தில் இருந்து சற்றே குறைந்துள்ளது.

தங்கம் விலை மேலும் குறைய வேண்டும் என சாமானிய மக்கள் எதிர்பார்த்து கொண்டிருக்கின்றனர். இத்தகைய சூழலில் உலக தங்க கவுன்சில் செப்டம்பர் மாத காலாண்டில் மத்திய நாடுகளின் வங்கிகள் எவ்வளவு தங்கத்தை வாங்கின என்பது குறித்த தகவல்களை வெளியிட்டு இருக்கிறது. நடப்பு ஆண்டில் ஜூலை முதல் செப்டம்பர் வரையிலான காலாண்டில் பல்வேறு நாடுகளின் வங்கிகள் மொத்தமாக 220 டன்கள் தங்கத்தை வாங்கி இருக்கின்றன. இது முந்தைய காலாண்டுடன் ஒப்பிடும்போது 28% அதிகம் என உலக தங்க கவுன்சில் அறிக்கை சுட்டிக்காட்டுகிறது .

இதுவே கடந்த ஆண்டு ஜூலை முதல் செப்டம்பர் வரையிலான காலாண்டில் 200 டன்களாக இருந்தது. எனவே அதற்கு ஆண்டு இதே காலகட்டத்துடன் ஒப்பிடுகையில் மத்திய வங்கிகள் 10% கூடுதலாக தங்கத்தை வாங்கியுள்ளன. உலக தங்க கவுன்சிலின் தரவுகளின் படி 2024ஆம் ஆண்டின் மூன்றாவது காலாண்டில் மத்திய வங்கிகள் 200 டன்கள் தங்கத்தையும் , நான்காவது காலாண்டில் அதிகபட்சமாக 365 டன்கள் தங்கத்தையும் வாங்கியுள்ளன.

இதன் பின்னர் நடப்பு ஆண்டில் முதல் காலாண்டில் இது 242 டன்கள் என்றும், இரண்டாவது காலாண்டில் 172 டன்கள் என்றும் குறைந்தது. ஆனால் மூன்றாவது காலாண்டில் மீண்டும் அதிக தங்கத்தை வாங்க தொடங்கியுள்ளன. இதே கால கட்டத்தில் உலகம் முழுவதும் தங்கத்தின் விலை பல மடங்கு உயர தொடங்கியதை நாம் காணலாம்.

இந்திய ரிசர்வ் வங்கியை பொறுத்தவரை ஏப்ரல் முதல் செப்டம்பர் வரையிலான காலகட்டத்தில் 600 கிலோ தங்கத்தை வாங்கி இருக்கிறது. தற்போது இந்திய ரிசர்வ் வங்கியின் வசம் 880 டன்கள் தங்கம் இருப்பு வைக்கப்பட்டிருக்கிறது. 2025 ஆம் ஆண்டு தொடங்கியிருந்து தற்போது வரை ஒட்டுமொத்தமாக பல்வேறு நாடுகளின் மத்திய வங்கிகளும் 634 டன்கள் தங்கத்தை வாங்கி இருக்கின்றன.

அதே போல கோல்டு ஈடிஎஃப்களில் முதலீடு செய்யும் போக்கு உலகளவில் அதிகரித்துள்ளது என உலக தங்க கவுன்சில் தெரிவிக்கிறது. அதாவது கடந்த ஆண்டை விட இந்த ஆண்டில் ஈடிஎஃப் முதலீடுகள் 134% உயர்வு கண்டுள்ளன. உலக அளவில் அதிக தங்கம் வைத்திருக்கும் நாடாக அமெரிக்கா இருக்கிறது/ அமெரிக்கா வசம் 8,000 டன்களுக்கும் அதிகமான தங்கம் இருக்கிறது.