சென்னை, கோவை லெவலுக்கு கும்பகோணம்.. மால் + தியேட்டர் + 4 ஸ்டார் ஹோட்டல்.. எல்லாமே ஒரே இடத்தில்!

தமிழ்நாட்டின் அனைத்தும் 2ஆம் நிலை நகரங்களும் வேகமாக வளர்ச்சி அடைந்து வரும் வேளையில், ஒவ்வொரு நகரின் உள்கட்டமைப்பும் தொடர்ந்து மேம்பட்டு வருகிறது. அடிப்படை வசதிகளை தாண்டி தற்போது ஆடம்பர மற்றும் பொழுதுபோக்கு பிரிவில் புது புது கட்டமைப்புகள் உருவாக்கப்பட்டு வருகிறது.

அந்த வகையில் தமிழ்நாட்டின் முக்கிய கோயில் நகரங்களில் ஒன்றான கும்பகோணம், தற்போது புதிய வளர்ச்சி பாதையை நோக்கி நகர்ந்து கொண்டு வருகிறது.

கும்பகோணத்தில் செட்டிமண்டபம் பகுதியில் உருவாகி வரும் கும்பகோணம் பிரீமியர் மால், டெல்டா பகுதியின் மிகப்பெரிய ஷாப்பிங் மற்றும் பொழுதுபோக்கு மையமாக உருவெடுத்துள்ளது.

இந்த மாலின் சிறப்பு அம்சம் என்னவென்றால் ஒரே இடத்தில் மால் + தியேட்டர் + 4 ஸ்டார் ஹோட்டல் ஆகியவை அமைய உள்ளது. சுமார் 3.20 லட்சம் சதுர அடிக்கும் அதிகமான பரப்பளவு கொண்ட பிரம்மாண்ட வணிக வளாகமாக உருவெடுத்து வருகிறது.

பெரு நகரங்களை தாண்டி தற்போது சிறு நகரங்களிலும் மக்கள் அதிகளவில் பொருட்களையும், சேவைகளையும் வாங்க துவங்கியுள்ள காரணத்தால் பெரிய பெரிய பிராண்டுகள் கூட தற்போது சிறு நகரங்களை நோக்கி படையெடுத்து வருகிறது.

இதேபோல் பெரிய பிராண்டுகள் தங்களுடைய கடைகளை முக்கிய இடத்தில் வைப்பதற்காக சரியான இடத்தை தேடி வருவேளையில் மால்கள் முதன்மையாக சாய்ஸ் ஆக மாறுகிறது. இதை உண்மையாக்கும் வகையில் தற்போது இந்த மாலில் மெக்டொனால்டு, வெஸ்ட்சைட், பூமா, நைக் போன்ற நிறுவனங்கள் தங்களுடைய கடைகளை திறக்க ஒப்பந்தம் செய்துள்ளது.

வர்த்தகம் மற்றும் மூலம் உருவாகும் தேவை காரணமாக தற்போது மால் கலாச்சாரம் தமிழ்நாட்டில் பல 2ஆம், 3ஆம் நிலை நகரங்களுக்கு வருகிறது.

தற்போது கட்டப்பட்டு வரும் கும்பகோணம் பிரீமியர் மாலில் சுமார் 4 திரைகளை கொண்ட பிவிஆர் - ஐநாக்ஸ் மல்டிபிளெக்ஸ் தியேட்டரும் அமைய உள்ளது, ஓரே நேரத்தில் சுமார் 1000 பேர் படத்தை பார்க்கும் அளவுக்கு இந்த மால் அமைய உள்ளது.

இதேபோல் கும்பகோணம் ஒரு கோவில் நகரம் என்பதால் சுற்றுலா பயணிகளுக்கு மேம்பட்ட தங்குமிட வசதிகளுக்கான தேவை இந்த நகரத்தில் உருவாகியுள்ளது, இதேபோல் இந்தியாவில் தற்போது ஆன்மீக சுற்றுலா பிரபலமாகியிருக்கும் வேளையில், இதே மாலில் 66 அறைகள் கொண்ட ஹோட்டலை லெமென் ட்ரீ அமைத்து இதை அதன் கிளை நிறுவனமான Carnation Hotels நிர்வாகம் செய்ய உள்ளது.

இந்த ஹோட்டல் உடன் உணவகம், பேங்க்வெட் ஹால், ஸ்விமிங் பூல், பிட்னஸ் சென்டர் என பெருநகரங்களுக்கு இணையான சேவையை கொண்டு வர உள்ளது.