Blinkit, Swiggy Instamart மூலம் தங்கம், வெள்ளி டெலிவரி.. 10 நிமிடத்தில் வீட்டுக்கே வரும்..!!

இந்து பாரம்பரியத்தின்படி தங்கம் மற்றும் வெள்ளி வாங்க மிகவும் மங்களகரமான நாளாக கருதப்படும் தன்தேரஸ் பண்டிகை, இந்த ஆண்டு இன்று (அக்டோபர் 18) கொண்டாடப்படுகிறது. இந்த சுப தினத்தை முன்னிட்டு, நகைக் கடைகளில் மக்கள் கூட்டம் அலைமோதும் நிலையில், முன்னணி ஆன்லைன் தளங்கள் வாடிக்கையாளர்களுக்கு ஒரு புதிய வசதியைக் கொண்டு வந்துள்ளன. அதுதான் மின்னல் வேக டெலிவரியில் தங்கம் மற்றும் வெள்ளி விற்பனை.

வீட்டில் இருந்தபடியே சில நிமிடங்களில் சுத்தமான தங்கத்தை வாங்குவதற்கான சிறப்புச் சலுகைகளை Blinkit, Swiggy Instamart, Zepto போன்ற ஆன்லைன் தளங்கள் அறிவித்துள்ளன.

10 நிமிடத்தில் வீட்டுக்கே வரும் தங்கம் : தன்தேரஸ் பண்டிகையை முன்னிட்டு Blinkit நிறுவனம், MMTC-PAMP உடன் கைகோர்த்துள்ளது. இதன் மூலம், வாடிக்கையாளர்கள் தங்களுக்குத் தேவையான தங்கம் மற்றும் வெள்ளியை ஆர்டர் செய்து, 10 நிமிடங்களில் தங்கள் வீட்டு வாசலிலேயே பெற்றுக் கொள்ளலாம்.

Blinkit செயலி மூலம், வாடிக்கையாளர்கள் MMTC-PAMP வழங்கும் 24 காரட் 999.9 + தூய்மை கொண்ட 1 கிராம் லோட்டஸ் தங்கக் கட்டி, 0.5 கிராம் லோட்டஸ் தங்க நாணயம் மற்றும் 10 கிராம் லட்சுமி கணேஷ் வெள்ளி நாணயம் ஆகியவற்றை வாங்கலாம்.

அதேபோல், Blinkit மூலம் டெலிவரி செய்யப்படும் ஒவ்வொரு தங்கப் பொருளும், ஓப்பன் பாக்ஸ் டெலிவரி முறை மற்றும் பாதுகாப்பான பேக்கிங் உட்பட கடுமையான பாதுகாப்பு நெறிமுறைகளைப் பின்பற்றுகிறது. இதனால், வாடிக்கையாளர்கள் பொருளின் தூய்மையைச் சரிபார்த்துக் கொள்ள முடியும்.

ஸ்விகி இன்ஸ்டாமார்ட்டின் பிரம்மாண்ட கூட்டணி : Swiggy Instamart-ம், தன்தேரஸ் சலுகையாகத் தேர்ந்தெடுக்கப்பட்ட மெட்ரோ நகரங்களில் தங்கம் மற்றும் வெள்ளி டெலிவரி செய்வதற்கான சிறப்புச் சலுகையை அறிவித்துள்ளது. இங்கு 0.1 கிராம் முதல் 10 கிராம் வரையிலான தங்கம் மற்றும் வெள்ளி நாணயங்கள், அத்துடன் 1 கிலோ வெள்ளி கட்டிகள் வரை சில நிமிடங்களில் டெலிவரி பெறலாம்.

இந்த சலுகைக்காக Swiggy Instamart, கல்யாண் ஜுவல்லர்ஸ், மலபார் கோல்ட் அண்ட் டைமண்ட்ஸ், முத்தூட் எக்ஸிம், MMTC-PAMP, மியா பை தனிஷ்க், Voylla மற்றும் Gullak போன்ற புதிய நிறுவனங்களுடன் ஒப்பந்தம் செய்து, சான்றளிக்கப்பட்ட தங்க நாணயங்களை விற்பனை செய்கிறது.

அதேசமயம் Zepto, BigBasket, Amazon போன்ற முன்னணி ஆன்லைன் தளங்களும் தன்தேரஸ் பண்டிகைக்கு தங்கம் விற்பனை செய்வதில் மும்முரம் காட்டி வருகின்றன. Zepto தளத்திலும் தங்க நாணயங்களை ஆர்டர் செய்து சில நிமிடங்களில் டெலிவரி பெறலாம்.

அதேபோல், டாடாவுக்குச் சொந்தமான BigBasket, தனிஷ்க் உடன் கூட்டு சேர்ந்து, 22 காரட் தங்க நாணயங்கள் மற்றும் 10 கிராம் லட்சுமி கணேஷ் வெள்ளி நாணயங்களை விற்பனை செய்கிறது. மேலும், அமேசான் தளம் Caratlane, PN Gadgil, Joyalukkas, PC Chandra, மலபார் கோல்ட் அண்ட் டைமண்ட்ஸ் போன்ற பிராண்டுகளின் 5 லட்சத்திற்கும் அதிகமான நகைகள் மற்றும் தங்கப் பொருட்களை விற்பனைக்கு வைத்துள்ளது. மேலும், நகைகளுக்கு 20% வரை தள்ளுபடி மற்றும் வங்கிக் கார்டுகளுக்கு 10% உடனடித் தள்ளுபடி போன்ற சலுகைகளையும் அமேசான் அறிவித்துள்ளது.

பாரம்பரிய கடைகள் மற்றும் சலுகைகள் : தனிஷ்க், கல்யாண் ஜுவல்லர்ஸ், மலபார் கோல்ட் அன்ட் டைமண்ட்ஸ் போன்ற முன்னணி நகை பிராண்டுகளின் கடைகளிலும் தன்தேரஸ் சலுகைகள் உள்ளன. சில கடைகள் செய் கூலியில் 100% வரை தள்ளுபடி வழங்குகின்றன.

ஆன்லைன் டெலிவரியில் ஆர்வம் இல்லாதவர்கள், வழக்கம்போல் அருகில் உள்ள உள்ளூர் நகைக்கடைகளிலும் தங்கம் வாங்கலாம். ஆனால், நீங்கள் வாங்கும் தங்கத்திற்கு ஹால்மார்க் சான்றிதழ் உள்ளதா என்பதை உறுதிப்படுத்திக் கொள்வது அவசியம்.