தங்கத்தை வாங்கிக் குவிக்கும் முதலீட்டாளர்கள்.. மீண்டும் உச்சம் தொடும் விலை.. என்ன காரணம் தெரியுமா..?

கடந்த சில வாரங்களாக தங்கத்தின் விலை தொடர்ந்து ஏறுமுகத்தில் சென்று கொண்டிருக்கிறது. தங்கத்தின் இந்த திடீர் விலை ஏற்றத்திற்கு காரணம், அமெரிக்காவில் உள்ள மத்திய வங்கி (ஃபெடரல் ரிசர்வ்) விரைவில் வட்டி விகிதங்களை குறைக்கப் போகிறது என்ற பலமான எதிர்பார்ப்புதான்.

இந்திய சந்தை மட்டுமல்லாமல், உலகச் சந்தை முழுவதிலும் முதலீட்டாளர்கள் போட்டி போட்டுக் கொண்டு தங்கத்தை வாங்குவதால், மல்டி கமாடிட்டி எக்ஸ்சேஞ்சில் (MCX) தங்கம் விலை தொடர்ந்து 4-வது மாதமாக வெற்றிப் பாதையில் பயணித்து வருகிறது.

அந்த வகையில், கடந்த வெள்ளிக்கிழமை நிலவரப்படி, பிப்ரவரி 2026-க்கான தங்கத்தின் விலை 10 கிராமுக்கு ரூ.1,29,599 ஆக உயர்ந்து முடிந்தது. இது ஒரே நாளில் ரூ.1,932 (1.51%) அதிகம் ஆகும். இதன் மூலம், தங்கம் அதன் வரலாற்று உச்ச விலையான ரூ.1,32,294-ஐ (அக்டோபர் 17, 2025) நெருங்கி, வெறும் ரூ.2,700 வித்தியாசத்தில் உள்ளது.

வட்டி விகித குறைப்பால் டாலர் பலவீனம் : தற்போது சந்தையில் நிலவும் ஏற்றத்திற்கு முக்கியக் காரணம், ஃபெடரல் ரிசர்வ் வட்டி விகிதங்களை 25 புள்ளிகள் (0.25%) குறைக்க 87% வாய்ப்பு இருப்பதாக ஆய்வாளர்கள் கணித்திருப்பதுதான். வட்டி விகிதங்கள் குறைக்கப்படும்போது, அமெரிக்க டாலரின் மதிப்பு தானாகவே குறையும். இதனால், முதலீட்டாளர்கள் டாலரில் முதலீடு செய்வதைவிட, பாதுகாப்பான முதலீடாக கருதப்படும் தங்கத்தின் பக்கம் திரும்புவார்கள்.

இது தங்கத்தின் தேவையை அதிகரித்து, விலையை உயர்த்துகிறது. மேலும், உலகளாவிய பங்குச் சந்தைகளில் நிலவும் நிச்சயமற்ற தன்மையும், அரசியல் குழப்பங்களும் (டொனால்ட் டிரம்ப் நிர்வாகத்தின் கீழ்) முதலீட்டாளர்களை பாதுகாப்பிற்காக தங்கத்தில் முதலீடு செய்யத் தூண்டுகின்றன.

சர்வதேச சந்தையில், 24 கேரட் தங்கம் (ஒரு அவுன்ஸ்) 4,224 அமெரிக்க டாலருக்கு மேல் வர்த்தகமாகிறது. அடுத்த மாதம் டிசம்பரில் ஃபெடரல் ரிசர்வ் வட்டி விகிதத்தைக் குறைக்கும் என்ற எதிர்பார்ப்பு கடந்த வாரம் 71% ஆக இருந்த நிலையில், இப்போது அது கிட்டத்தட்ட 87% ஆக உயர்ந்துள்ளது.

உள்ளூர் சந்தை நிலவரம் : உள்நாட்டு சந்தையிலும் தங்கம் விலை ஏற்றம் கண்டு வருகிறது. டிசம்பர் மாதத்திற்கான தங்கத்தின் விலை வெள்ளிக்கிழமை அன்று 10 கிராமுக்கு ரூ.1,26,960 ஆக உயர்ந்தது. சர்வதேச பொருளாதார நிச்சயமற்ற தன்மையுடன், இந்தியாவில் திருமணப் பருவத்திற்கான வாங்குதல்கள் அதிகரித்துள்ளது, சில்லறை வர்த்தகர்களின் தொடர்ச்சியான தேவை மற்றும் பாதுகாப்பான முதலீட்டின் மீதான விருப்பம் ஆகியவை தங்கத்தின் விலையைத் தொடர்ந்து உயர்த்துகின்றன என்று சந்தை நிபுணர்கள் கருத்து தெரிவிக்கின்றனர்.

அடுத்து என்ன நடக்கும்..?: சந்தை வல்லுநர்களின் தொழில்நுட்பப் பகுப்பாய்வின்படி, சர்வதேச அளவில் தங்கம் 4,240 அமெரிக்க டாலர் என்ற முக்கிய தடையை தாண்டினால், அது அதன் முந்தைய உச்சமான 4,400 அமெரிக்க டாலர் வரை உயர வாய்ப்புள்ளது. அதேபோல, இந்திய சந்தையில் MCX தங்கம் ரூ.1,27,800-ஐ நெருங்குகிறது.

இந்த விலையைத் தாண்டி உறுதியாக நிலைநிறுத்தப்பட்டால், தங்கம் ரூ.1,29,000 முதல் ரூ.1,30,500 வரையிலான இலக்கை எட்டும் வாய்ப்பு உள்ளது. ஆனால், விலை ரூ.1,25,300-க்குக் கீழே குறைந்தால் மட்டுமே சற்றுச் சரிவு இருக்கும். அதுவரை, தங்கத்தின் போக்கு வலுவாக ஏற்றத்திலேயே இருக்கும் என்று நிபுணர்கள் கூறியுள்ளனர்.