அதிரடியாக விலை குறையப்போகும் கார்கள் விலை.. ஆல்டோ முதல் கிரெட்டா வரை இவ்வளவு குறையப்போகிறதா?

இந்திய அரசின் புதிய ஜிஎஸ்டி 2.0 சீர்திருத்தம், நுகர்வோர் மத்தியில் பெரும் எதிர்பார்ப்பை ஏற்படுத்தியுள்ளது. இந்த சீர்திருத்தம், சிறிய மற்றும் நடுத்தர கார்களின் விலையை கணிசமாகக் குறைக்கும் என்று எதிர்பார்க்கப்படுகிறது. இதன் மூலம், கடந்த சில ஆண்டுகளாக விற்பனை மந்தநிலையைச் சந்தித்து வரும் இந்திய வாகனத் துறைக்கு ஒரு புதிய உத்வேகம் கிடைக்கும் என்று நம்பப்படுகிறது.

ஜிஎஸ்டி 2.0 என்றால் என்ன?: ஆகஸ்ட் 15 அன்று பிரதமர் நரேந்திர மோடி தனது உரையில், எளிதாக்கப்பட்ட மற்றும் மறுசீரமைக்கப்பட்ட ஜிஎஸ்டி அமைப்பு குறித்து அறிவித்தார். இதற்கு ஜிஎஸ்டி 2.0 என பெயரிடப்பட்டுள்ளது. தற்போதுள்ள 5%, 12%, 18% மற்றும் 28% அடுக்குகளுக்குப் பதிலாக, பெரும்பாலான பொருட்களுக்கு இரண்டு முக்கிய அடுக்குகளை அறிமுகப்படுத்த அரசு திட்டமிட்டுள்ளது. அதன்படி, அத்தியாவசியப் பொருட்கள் மற்றும் சேவைகளுக்கு 5% வரியும், மற்ற பெரும்பாலான பொருட்களுக்கு 18% வரியும் விதிக்கப்படும். ஆடம்பரப் பொருட்களுக்கு மட்டும் 40% என்ற சிறப்பு வரி விகிதம் முன்மொழியப்பட்டுள்ளது.

ஆட்டோமொபைல் துறைக்கு என்ன பயன்?: ஜிஎஸ்டி 2.0 நடைமுறைக்கு வந்தால், பெரும்பாலான சிறிய மற்றும் நடுத்தர கார்கள் 18% வரி வரம்பிற்குள் கொண்டுவரப்படும். இது நுகர்வோர் வாகனங்களை வாங்கும்போது செலுத்த வேண்டிய ஜிஎஸ்டி வரியைக் குறைக்கும். அதேபோல், சொகுசு கார்களுக்கு 40% வரி விதிக்கப்பட்டாலும், தற்போதைய 50% வரி விகிதத்துடன் ஒப்பிடும்போது இதுவும் ஒரு குறைவான விகிதமே. இது ஒட்டுமொத்தமாக இந்தியாவில் அனைத்து பயணிகள் வாகனங்களின் விலையையும் குறைக்கும்.

தற்போது, பயணிகள் வாகனங்களுக்கு விதிக்கப்படும் ஜிஎஸ்டி வரி விதிப்பு மிகவும் சிக்கலானது. உதாரணமாக, 1,200 சிசி-க்கும் குறைவான என்ஜின் திறன் கொண்ட சிறிய பெட்ரோல் கார்களுக்கு 28% ஜிஎஸ்டி மற்றும் 1% செஸ் விதிக்கப்படுகிறது. SUV-க்களுக்கு 28% ஜிஎஸ்டியுடன் 22% செஸ் சேர்த்து, மொத்தமாக 50% வரி விதிக்கப்படுகிறது. ஜிஎஸ்டி 2.0 இந்த சிக்கலை நீக்கி, வாகன விலைகளை மலிவாக்கும் என்று எதிர்பார்க்கப்படுகிறது.

எந்தெந்த கார்கள் மலிவாகும்?: ஜிஎஸ்டி 2.0 அமலுக்கு வந்த பிறகு விலை குறைய வாய்ப்புள்ள 10 பிரபலமான கார்களின் பட்டியல் கொடுக்கப்பட்டுள்ளது.

மாருதி சுசுகி ஆல்டோ கே10: இந்தியாவின் மிகவும் மலிவு விலையில் கிடைக்கும் கார் இது. இதன் விலை ரூ.4.23 லட்சத்திலிருந்து (எக்ஸ்-ஷோரூம்) ரூ.3.89 லட்சமாக குறைய வாய்ப்புள்ளது.

ஹூண்டாய் கிராண்ட் ஐ10 நியோஸ்: இந்த 1.2 லிட்டர் என்ஜின் கொண்ட ஹேட்ச்பேக் ரூ.5.98 லட்சத்திலிருந்து (எக்ஸ்-ஷோரூம்) ரூ.5.51 லட்சமாக மலிவாக மாறலாம்.

மாருதி சுசுகி எஸ்-பிரஸ்ஸோ: உயரமான எஸ்யுவி தோற்றம் கொண்ட இந்த சிறிய ஹேட்ச்பேக் அதன் விலையில் குறைப்பைக் காணலாம்.

டாடா டியாகோ: பாதுகாப்பான ஹேட்ச்பேக்காகக் கருதப்படும் இந்த கார் ரூ.5.60 லட்சத்திலிருந்து ரூ.5.15 லட்சமாக குறைய வாய்ப்புள்ளது.

ரெனால்ட் க்விட்: மாருதி ஆல்டோ கே10-க்கு போட்டியாளரான இந்த ஹேட்ச்பேக்கின் விலையில் சுமார் ரூ.40,000 வரை குறைப்பு இருக்கலாம்.

டாடா நெக்ஸான்: இந்தியாவில் அதிகம் விற்பனையாகும் சப்-காம்பாக்ட் எஸ்யுவியான நெக்ஸான், ஜிஎஸ்டி 2.0-ஆல் பெரிய விலைக் குறைப்பைச் சந்திக்கும் என்று எதிர்பார்க்கப்படுகிறது.

ஹூண்டாய் க்ரெட்டா: பிரபலமான எஸ்யுவியான ஹூண்டாய் க்ரெட்டா, ஜிஎஸ்டி விகிதக் குறைப்பால் குறிப்பிடத்தக்க நன்மைகளைப் பெறும்.

மஹிந்திரா தார்: ஆஃப்-ரோடு கார்களில் ஒன்றான தார், புதிய வரி அமைப்பால் கணிசமான விலைக் குறைப்பைக் காணும்.

மஹிந்திரா ஸ்கார்பியோ N: இந்த எஸ்யுவி, ஜிஎஸ்டி 2.0 அமல்படுத்தப்பட்டவுடன் சுமார் ரு.3 லட்சம் வரை விலை குறையலாம் என்று எதிர்பார்க்கப்படுகிறது.

டொயோட்டா இன்னோவா கிரிஸ்டா: டொயோட்டாவின் முக்கிய வருவாய் ஈட்டும் வாகனமான இந்த எம்பிவி, ஜிஎஸ்டி விகித திருத்தத்துடன் பெரிய விலைக் குறைப்பைச் சந்திக்கும்.

இந்த விலை குறைப்பு, முதல் முறையாக கார் வாங்குபவர்களை மீண்டும் சந்தைக்கு ஈர்த்து, இந்திய வாகனத் துறையின் விற்பனையில் ஒரு பெரிய ஊக்கத்தை ஏற்படுத்தும் என்று எதிர்பார்க்கப்படுகிறது.