ரிலையன்ஸ் ரீடெயில் நிறுவனத்தில் ரூ3675 கோடி முதலீடு..2வது ரவுண்டுக்கு தயாராகும் ஜெனரல் அட்லாண்டிக்!

முகேஷ் அம்பானியின் ரிலையன்ஸ் ரீடெயில் நிறுவனம், தனது டிஜிட்டல் வணிகத்தினை விரிவுபடுத்தும் பொருட்டு தொடர்ச்சியாக முதலீடுகளை திரட்டி வருகின்றது.

அந்த வகையில் அமெரிக்காவைச் சேர்ந்த ஜெனரல் அட்லாண்டிக் நிறுவனம், இரண்டாவது முறையாக ரிலையன்ஸ் குழுமத்தில் முதலீடு செய்ய உள்ளது.

ரிலையன்ஸ் ரீடெயில் நிறுவனத்தின் 0.84% பங்குகளை, 3,675 கோடி ரூபாய்க்கு வாங்க உள்ளது.

ரிலையன்ஸ் சில்லறை வணிகத்தில் 3வது முதலீடு

ஜெனரல் அட்லாண்டிக் நிறுவனத்தின் இந்த முதலீடானது ரிலையன்ஸ் ரீடெயில் வணிகத்தில் செய்யப்படும் மூன்றாவது முதலீடு இதுவாகும். இந்தியாவில் மிகப்பெரிய அளவில் சில்லறை வர்த்தகத்தில் ஈடுபட்டு வரும் ரிலையன்ஸ் நிறுவனத்தில், முன்னதாக கேகேஆர் நிறுவனம் 754 மில்லியன் டாலர்களையும், இதே சில்வர் லேக் நிறுவனம் 1 பில்லியன் டாலர்களையும் முதலீடு செய்ய ஒப்பந்தம் செய்யப்பட்டுள்ளன.

ஜெனரல் அட்லாண்டிக்கின் 2வது முதலீடு

ஜெனரல் அட்லாண்டிக் நிறுவனத்தின் இந்த முதலீடு மூலம், ரிலையன்ஸ் ரீடெயில் நிறுவனத்தின் மொத்த மதிப்பு 4.28 லட்சம் கோடி ரூபாயாக அதிகரித்துள்ளது. ரிலையன்ஸ் நிறுவனத்தில் ஜெனரல் அட்லாண்டிக் நிறுவனத்தின் இரண்டாவது முதலீடாகும். இதற்கு முன்பாக ரிலையன்ஸ் நிறுவனத்தின் தொலைத் தொடர்பு வணிகமாக ஜியோவில் 6598.38 கோடி ரூபாயினை முதலீடு செய்துள்ளது குறிப்பிடத்தக்கது.

முதலீடு குறித்து மிக்க மகிழ்ச்சி

இது குறித்து ரிலையன்ஸ் இண்டஸ்ட்ரீஸ் நிறுவனத்தின் தலைவர் முகேஷ் அம்பானி, ஜெனரல் அட்லாண்டிக் நிறுவனத்துடனான உறவை நீட்டிப்பதில் மகிழ்ச்சி அடைவதாக தெரிவித்துள்ளார்.

இதே ஜெனரல் அட்லாண்டிக் நிறுவனம், ரிலையன்ஸ் சில்லறை வணிகத்தினை இந்தியா முழுவதும் மற்றும் உலகம் முழுவதும் கொண்டு கொண்டு செல்லும் என்று நம்புவதாக தெரிவித்துள்ளது.

 

இஷா அம்பானி என்ன சொல்கிறார்?

ரிலையன்ஸ் சில்லறை நிறுவனத்தின் தலைவர் இஷா அம்பானி இது குறித்து கூறுகையில், இரு நிறுவனங்களும் தொடர்ந்து இந்தியாவின் சில்லறை வணிக சூழலை மேம்படுத்துகின்றன.

சில்லறை துறையில் சாதகமான மாற்றத்தினை ஏற்படுத்தும் அம்பானியின் இந்த முயற்சிக்கு, ஜெனரல் அட்லாண்டிக் ஆதரவளிப்பதாக அந்த நிறுவனத்தின் தலைமை நிர்வாக அதிகாரி பில் ஃபோர்டு தெரிவித்துள்ளார்.

 

அதிகரிக்கும் போட்டி

இந்தியாவில் மிகப்பெரிய சந்தைகளைக் கொண்டுள்ள அமேசான் மற்றும் பிளிப்கார்ட் நிறுவனங்களுக்கு போட்டியாக உள்ள ரிலையன்ஸ் ரீடெயில் நிறுவனம் தனது வணிகத்தினை மேம்படுத்தி வருகின்றது. ரிலையன்ஸ் நிறுவனம் இந்த முதலீடுகள் திரட்டல் மூலம் தனது வணிகத்தை மேலும் மேலும் விரிவுபடுத்த ரிலையன்ஸ் முயன்று வருகின்றது. உண்மையில் மற்ற இகாமர்ஸ் நிறுவனங்களுக்கு விரைவில், ரிலையன்ஸ் சவாலாக மாறலாம்.