தங்கப் புதையலாக மாறிய தமிழகம்..! புதைந்து கிடக்கும் தங்கம்..! ஆச்சரியத்தில் ஊர் மக்கள்..!

தங்கம் ஒரு விலைமதிப்பற்ற உலோகமாகும். இந்தியாவைப் பொறுத்தவரை தங்கம் முதலீடு என்பதைத் தாண்டி கௌரவத்தின் அடையாளமாக இருக்கிறது. இதன்மூலம், உலகின் மிகப்பெரிய தங்க நுகர்வோராகவும் இந்தியா வளர்ந்து வருகிறது. இருப்பினும், இந்தியாவும் தங்கம் உட்பட மிகப்பெரிய கனிம வளங்களைக் கொண்ட நாடாக கருதப்படுகிறது. அதாவது, இந்தியாவில் தங்கச் சுரங்கத்திற்கான பெரும் வாய்ப்புகள் இன்றும் உள்ளது.

முந்தைய காலங்களில் மண்ணுக்குள் புதைக்கப்பட்ட அல்லது புதையுண்ட தங்க புதையல்கள், நிலத்தை தோண்டும்போது கிடைப்பது வழக்கம். அந்தவகையில் தற்போது தமிழகத்தின் திருவண்ணாமலை, விருதுநகர் மாவட்டங்களில் பூமிக்கு அடியில் தங்கம் இருப்பதற்கான சாத்தியக் கூறுகள் அதிகம் உள்ளதாக தகவல்கள் வெளியாகியுள்ளன.

இதுதொடர்பாக சென்னையில் நிகழ்ச்சி ஒன்றில் கலந்து கொண்ட பின் செய்தியாளர்களிடம் பேசிய இந்திய புவியியல் ஆய்வு மைய இயக்குநர் விஜயகுமார், திருவண்ணாமலை, விருதுநகர், ராஜபாளையம் உள்ளிட்ட பகுதிகளில் தங்கம் இருப்பதற்கான சாத்தியக்கூறுகள் உள்ளன. செல்போன் பேட்டரிக்கு பயன்படுத்தப்படும் லித்தியம் கிடைப்பது கண்டறியப்பட்டுள்ளது. தங்கம் மற்றும் லித்தியம் குறித்து ஆய்வு செய்ய உள்ளதாகவும் தெரிவித்துள்ளார்.

மேலும், நாடு முழுவதும் உள்ள கனிம வளங்கள் குறித்து புவியியல் துறை சார்பில் ஆய்வு நடத்தப்பட்டதாகவும், அந்த ஆய்வின் அறிக்கை மத்திய அரசுக்கு அனுப்பி வைக்கப்பட்டுள்ளது என்றும் கூறினார். தமிழ்நாட்டில் நிலத்துக்கு அடியில் சுண்ணாம்புக் கற்கள் அதிகம் உள்ளன. கனிம வளங்கள் குறித்து ஆய்வு செய்தபோது, பேட்டரி தயாரிக்கப் பயன்படுத்தப்படும் லித்தியம் கிடைப்பது கண்டறியப்பட்டது. எனவே, தங்கம் மற்றும் லித்தியம் இருப்பது குறித்து ஆய்வு செய்யப்பட்டு வருவதாகவும் அவர் தெரிவித்தார்.

உலகிலேயே தமிழ்நாட்டு பெண்கள்தான் அதிக தங்கத்தை வைத்திருக்கிறார்கள் என்றும், தமிழக பெண்களிடம் 6,720 டன் தங்கம் இருப்பதாக கடந்த டிசம்பரில் சர்வதேச கோல்டு கவுன்சில் வெளியிட்டுள்ள அறிக்கையில் தெரியவந்தது. இதேபோல், இந்திய பெண்கள் மொத்தமாக 24,000 டன் தங்கத்தை ஆபரணங்கள் வடிவில் வைத்துள்ளதாக அந்த அறிக்கையில் தெரிவிக்கப்பட்டுள்ளது குறிப்பிடத்தக்கது. இந்தநிலையில், தமிழகத்தில் தற்போது பூமிக்கடியில் தங்கம் இருப்பதற்கான சாத்தியக்கூறுகள் அதிகம் இருப்பதாக வெளியான செய்தியால் மக்களிடையே ஆர்வத்தை ஏற்படுத்தி வருகிறது.