ஒரு மாத சரிவில் தங்கம் விலை.. கண்ணீரெல்லாம் புன்னகையாக மாறியது.. சான்ஸை மிஸ் பண்ணிடாதீங்க..!

இஸ்ரேல்-ஈரான் மோதல் முடிவு, உலகளாவிய பங்கு சந்தை முதலீடுகள் மற்றும் பொருளாதாரத்தின் மீதான நம்பிக்கையை அதிகரித்துள்ளது. இதனால் தங்கம் போன்ற பாதுகாப்பான முதலீடுகளின் தேவை பெரிய அளவில் குறைந்துள்ளது. இதன் எதிரொலியாக இந்திய சந்தையிலும் சரி, சர்வதேச சந்தையிலும் சரி தங்கம் விலை பெரிய அளவில் குறைந்துள்ளது.

இன்று ரீடைல் சந்தையில் 10 கிராம் 22 கேரட் தங்கம் விலை 850 ரூபாய் குறைந்து 89,850 ரூபாயாக உள்ளது, இதுவே 24 கேரட் தங்கம் விலை 930 ரூபாய் குறைந்து 98,020 ரூபாயாக உயர்ந்துள்ளது. தங்கம் விலை கடந்த 7 நாளில் கிராமுக்கு 300 ரூபாய் குறைந்து ஒரு மாத சரிவை எட்டியுள்ளது.

இதேபோல் ரீடைல் சந்தையில் இன்று ஆபரண தங்கம் விலை ஒரு சவரன் 744 ரூபாய் குறைந்து 78,416 ரூபாயாக உள்ளது. வெள்ளி விலை கிலோவுக்கு 100 ரூபாய் குறைந்து 1,17,900 ரூபாயாக உள்ளது. பிளாட்டினம் விலை 10 கிராம் 120 ரூபாய் உயர்ந்து 38,220 ரூபாயாக உள்ளது.

இந்தியாவின் மல்டி கமாடிட்டி எக்ஸ்சேஞ்சில் (எம்சிஎக்ஸ்) தங்கத்தின் விலை, ஜூன் 16, 2025 அன்று பதிவான உச்சபட்ச விலையான ₹1,01,078-லிருந்து 5% குறைந்து, 10 கிராமுக்கு 95,320-ஆக சரிந்துள்ளது. இந்த ரூ.5,758 வீழ்ச்சி, இஸ்ரேல்-ஈரான் போர் முடிவு அறிவிப்பு மற்றும் பங்குச் சந்தை உயர்வால் ஏற்பட்ட சரிவாகும். சர்வதேச சந்தையில் தங்கத்தின் விலை ஒரு அவுன்ஸ் 24 கேரட் தங்கம் விலை 3,282-3,283 டாலராக குறைந்து ஒரு மாத குறைந்தபட்ச அளவை எட்டியுள்ளது.

வெள்ளிக்கிழமை, அமெரிக்காவின் தனிநபர் நுகர்வு செலவு (PCE) விலை குறியீடு தரவு வெளியாக உள்ளது, இது அமெரிக்க மத்திய வங்கியின் (Fed) வட்டி விகித முடிவுகளை பாதிக்கும் வாய்ப்பு உள்ளது. இதேபோல் இந்த தரவு அமெரிக்க டாலரின் வலிமையை தீர்மானிக்கும் காரணியாக உள்ளது. இதனால் இந்த தரவுகள் வெளியான பின்பு தங்கத்தின் விலை கூடுதலாக சரியலாம்.

தங்க விலை வீழ்ச்சி, இந்திய முதலீட்டாளர்களுக்கு ஜாக்பாட் ஆக மாறியுள்ளது. இந்தியாவில் தங்கத்தை நகைகள் மற்றும் முதலீட்டு சொத்தாக பார்க்கப்படும் காரணத்தால் சீனாவுக்கு அடுத்தப்படியாக தங்க ரீடைல் வர்த்தகத்தை இந்தியா கொண்டுள்ளது.

இந்திய மக்கள் தங்கத்தில் முதலீடு செய்யும் முன், உலகளாவிய பொருளாதார குறியீடுகள் மற்றும் சந்தை நிலைமைகளை உன்னிப்பாக கவனித்து அதன் பின்பு முதலீடு செய்ய வேண்டும். தங்கம் ஒரு பாதுகாப்பு முதலீடாக இருந்தாலும், விலை ஏற்ற இறக்கங்கள் ஆபத்தை கொண்டுள்ளது.