தங்கம், வெள்ளி விலைகள் சரிவு.. MCX-ல் வெள்ளி பியூச்சர்ஸ் தரைதட்டியது.. நிபுணர்களின் முக்கிய அட்வைஸ்..!

தங்கம் மற்றும் வெள்ளி விலைகள் கடந்த சில நாட்களாக கணிசமான அளவில் சரிந்துள்ளன. உலக அளவில் நிலவிய பதற்றம் காரணமாக பெரிய அளவில் உயர்ந்திருந்த உலோகங்களின் விலை இப்போது கீழ்நோக்கி செல்கிறது. இந்த வாரத்தில் தங்கம் விலை கணிசமாகக் குறைந்துள்ளது. இது பொதுமக்களுக்கு பெரும் நிம்மதியை கொடுத்துள்ளது.

பிப்ரவரி 10-ஆம் தேதி உலக சந்தைகளில் ஏற்பட்ட அதிகமான விற்பனையால் இந்தியாவிலும் தங்கம் மற்றும் வெள்ளி விலைகள் குறைந்தன. நேற்றைய வர்த்தகத்தில் வலுவான உயர்வு காணப்பட்ட நிலையில், சர்வதேச சந்தையில் இருந்து வந்த பலவீனமான விற்பனை சிக்னல் தங்கம், வெள்ளி உலோகங்களில் விலையை குறைத்துள்ளன. இதன் விளைவாக மல்டி கமாடிட்டி எக்ஸ்சேஞ்ச் (MCX) இல் தங்கம் மற்றும் வெள்ளி விலைகள் 1% முதல் 2% வரை சரிந்தன.

சர்வதேச சந்தை நிலவரம்
உலகின் முக்கிய தங்க விலை குறியீடான COMEX-இல் தங்கம் ஒரு அவுன்ஸுக்கு 5,050 டாலருக்குக் கீழே இறங்கியது. தற்போது சுமார் 1% இழப்புடன் வர்த்தகமாகிறது. இரண்டு நாட்கள் தொடர்ச்சியாக லாபம் பார்த்த ஸ்பாட் வெள்ளி விலைக்கு நஷ்டம் ஏற்பட்டது. அமெரிக்க டாலர் வலுப்பெற்றதாலும், முதலீட்டாளர்கள் லாபம் பதிவு செய்யும் காரணத்தாலும், வெள்ளி விலை ஒரு அவுன்ஸுக்கு 81 டாலர் அளவில் சுமார் 2.3% சரிந்துள்ளது.

இந்திய சந்தையில் தாக்கம்
இந்த உலகளாவிய போக்கு இந்திய சந்தையிலும் பிரதிபலித்ததுள்ளது. பிப்ரவரி 10-ஆம் தேதி MCX-இல் தங்கம் விலை சுமார் ரூ.1.55 லட்சம் அளவைத் தொட்ட பிறகு சரிய துவங்கியது. MCX வெள்ளி விலை முக்கியமான ரூ.2.7 லட்சம் அளவுக்குக் கீழே இறங்கியது. வர்த்தகம் தொடங்கிய சில நிமிடங்களிலேயே விற்பனை அழுத்தம் அதிகரித்ததால் தங்கம், வெள்ளி விலைகள் குறைந்தன.

மார்ச் 2026 காலாவதியாகும் MCX வெள்ளி ஃபியூச்சர்ஸ் 2.2% சரிந்து 10 கிராமுக்கு ரூ.2,57,523-ஆக வர்த்தகமானது. இன்ட்ராடேயில் ₹2,56,908 வரை இறங்கியது. இதனால் ரூ.2.6 லட்சம் என்ற முக்கிய ஆதரவு நிலையை இழந்துள்ளது. ஏப்ரல் 2026 காலாவதியாகும் MCX தங்க ஃபியூச்சர்ஸ் 1% குறைந்து 10 கிராமுக்கு ரூ.1,55,394-ஆக வர்த்தகமாகிறது. இன்ட்ராடேயில் ரூ.1,55,997 வரை இறங்கியது.

விலை சரிவுக்கான காரணங்கள்
அமெரிக்க வெள்ளை மாளிகை பொருளாதார ஆலோசகர் கெவின் ஹாசெட், அமெரிக்காவில் வேலைவாய்ப்பு வளர்ச்சி மந்தமடையும் அபாயம் உள்ளதாகக் கூறியது முதலீட்டு சந்தையை கடுமையாக பாதித்துள்ளது. வரும் நாட்களில் வெளியாகும் அமெரிக்காவின் நான்-ஃபார்ம் பேரோல்ஸ் அறிக்கை, இந்தியா மற்றும் அமெரிக்காவின் CPI பணவீக்க தரவுகள் ஆகியவை தங்கம், வெள்ளி விலைக்கு மிக முக்கியமானவை. இவை அமெரிக்க ஃபெடரல் ரிசர்வ் மற்றும் இந்திய ரிசர்வ் வங்கியின் அடுத்த வட்டி விகித முடிவுகளை பாதிக்கும் என்பதால் உலோக சந்தைக்கு இது பெரும் பாதிப்பை ஏற்படுத்தும்.

2026-இல் அமெரிக்க ஃபெடரல் ரிசர்வ் இரண்டு முறை 25 அடிப்படைப் புள்ளி வட்டி விகிதக் குறைப்பு செய்யக்கூடும் என்று முதலீட்டு சந்தை எதிர்பார்க்கிறது. இது நீண்டகால அடிப்படையில் தங்கம் மற்றும் வெள்ளி விலைக்கு ஆதரவாக அமையும். அமெரிக்கா-ஈரான் இடையே தொடரும் அரசியல் பதற்றம் பாதுகாப்பான சொத்துகளுக்கான தேவையை அதிகரிக்கிறது.

சீனா ஜனவரி மாதத்தில் தொடர்ச்சியாக 15-ஆவது மாதமாக தங்கம் வாங்கியுள்ளது. இது உலக அளவில் தங்கத்துக்கான தேவை வலுவாக உள்ளதை காட்டுகிறது.

தற்போது சந்தையில் குறுகிய கால ஏற்ற இறக்கங்கள் தொடரக்கூடும் என்றாலும், நடுத்தர காலத்தில் தங்கம் மற்றும் வெள்ளி மீதான முதலீட்டாளர்களின் ஆர்வம் தொடரும் என்று சந்தை நிபுணர்கள் கருதுகின்றனர். சாமானிய மக்களுக்கு இந்த விலை சரிவு சற்று நிம்மதியை அளித்துள்ளது. இருப்பினும், நீண்டகால முதலீட்டுக்கு இந்த உலோகங்கள் இன்னும் ஈர்க்கக்கூடியவையாகவே உள்ளன என நிபுணர்கள் தெரிவித்துள்ளனர்.