தங்கம், வெள்ளி விலை திடீரென சரிய என்ன காரணம்..? முதலீட்டாளர்கள் கவனிக்க வேண்டிய விஷயங்கள்..!!

தங்கம் மற்றும் வெள்ளி விலை கடந்த இரண்டு மாதங்களாக உயர்ந்து வந்த நிலையில், தற்போது சற்று சரிவைக் கண்டுள்ளது. இந்த திடீர் சரிவுக்கு பொருளாதாரம் மட்டுமின்றி, உலக அரசியல் காரணிகளும் முக்கியப் பங்கு வகிப்பதாக சந்தை நிபுணர்கள் தெரிவிக்கின்றனர்.

"இந்த விலை சரிவுக்கு முதன்மைக் காரணம், அமெரிக்க டாலரின் குறியீடு வலுவடைந்ததும், சீனா மற்றும் இந்தியாவுடனான வர்த்தகப் பேச்சுவார்த்தைகளில் ஏற்பட்ட சாதகமான முன்னேற்றங்களும்தான்" என்று மேத்தா ஈக்விட்டீஸ் லிமிடெட்டின் கமாடிட்டிஸ் துணைத் தலைவர் ராகுல் கலாந்திரி கூறியுள்ளார்.

தொடர்ந்து அவர் கூறுகையில், காசா அமைதிப் பேச்சுவார்த்தையின் முன்னேற்றம் குறித்த உணர்வு, சந்தை முழுவதும் லாபப் பதிவு செய்ய வழிவகுத்ததாக தெரிவித்துள்ளார். அதாவது, உலகளாவிய பயமும், நிச்சயமற்ற தன்மையும் குறையும்போதும், அமெரிக்க டாலர் வலுப்பெறும்போதும், முதலீட்டாளர்கள் தங்கம் போன்ற பாதுகாப்பான புகலிடங்களில் இருந்து வெளியேறி லாபம் பார்க்கத் தொடங்குகின்றனர்.

இருப்பினும், இந்த ஏற்றம்-இறக்கம் அத்துடன் முடிந்துவிடவில்லை. பணவீக்கத் தரவு குறைந்தது மற்றும் அமெரிக்க மத்திய வங்கியின் வட்டிக் குறைப்பு எதிர்பார்ப்புகள் ஆகியவை தங்கம் மற்றும் வெள்ளிக்கு மீண்டும் ஆதரவு அளித்துள்ளன. இதனால் குறைந்த விலையில் தங்கம் வாங்குவது மீண்டும் தொடங்கியதாக அவர் குறிப்பிட்டுள்ளார்.

தற்போது சந்தையின் ஒட்டுமொத்த கவனமும் இந்த வாரம் நடைபெறவிருக்கும் மத்திய வங்கிகளின் செயல்பாடுகளின் மீது திரும்பியுள்ளது. பணவீக்கத் தரவு பலவீனமடைந்துள்ளதால், அமெரிக்க ஃபெடரல் ரிசர்வ் வங்கி 25 அடிப்படைப் புள்ளிகள் (bps) வட்டி விகிதத்தைக் குறைக்க வாய்ப்புள்ளது என்று எதிர்பார்க்கப்படுகிறது. ஐரோப்பிய மத்திய வங்கி (ECB) மற்றும் பாங்க் ஆஃப் ஜப்பான் (BoJ) ஆகியவை தங்கள் வட்டி விகிதங்களில் மாற்றமின்றி நீடிக்கலாம் என்று எதிர்பார்க்கப்படுகிறது.

இதற்கிடையே, ஆஸ்பெக்ட் புல்லியன் & ரிஃபைனரியின் தலைமைச் செயல் அதிகாரி தர்ஷன் தேசாய் கூறுகையில், "அமெரிக்கா - சீனா வர்த்தக ஒப்பந்தம் குறித்த நம்பிக்கை மற்றும் டாலரின் வலுவூட்டல் காரணமாக, தங்கம் விலை தொடர்ந்து சரிந்து வருகிறது" என்று அவர் குறிப்பிட்டார்.

இந்த வாரம் சந்தைக்கு மிகவும் முக்கியமான ஒன்று என்றும், அமெரிக்க அதிபர் டொனால்ட் டிரம்ப் மற்றும் சீன அதிபர் ஜி ஜின்பிங் இடையேயான சந்திப்பு, ஃபெட் வங்கியின் அறிவிப்பு மற்றும் முக்கிய தொழில்நுட்ப நிறுவனங்களின் காலாண்டு முடிவுகள் ஆகியவை தங்கத்தின் விலையில் நிலையற்ற தன்மையை அதிகரிக்கும் என்றும் அவர் எச்சரித்துள்ளார்.

ஃபெடரல் ரிசர்வ் வங்கி, எதிர்பார்த்ததை விடக் குறைவான வட்டிக் குறைப்பை அறிவித்தால், தங்கத்தின் விலை மேலும் சரியக்கூடும். அதேசமயம், புவிசார் அரசியல் பதற்றம் ஏதேனும் அதிகரித்தால், தங்கம் மற்றும் வெள்ளி மீண்டும் வேகமாக அதிகரிக்க வாய்ப்பு இருப்பதாகவும் நிபுணர்கள் கணித்துள்ளனர்.