50% லாபம் கொடுத்த தங்கம்.. இது விற்க வேண்டிய நேரமா? முதலீட்டாளர்களுக்கு நிபுணர்கள் கொடுத்த டிப்ஸ்.!!

2025 ஆம் ஆண்டு முடிவடைய இன்னும் இரண்டு மாதங்கள் உள்ள நிலையில், இந்த ஆண்டுக்கான சிறந்த முதலீட்டுச் சொத்துக்கான விருதை தங்கம் நிச்சயம் பெறும் என்று கூறப்படுகிறது. அக்டோபர் 2025 வரையிலான காலகட்டத்தில், தங்கம் 50%-க்கும் அதிகமான லாபத்தை தந்துள்ளது. இது உலகளாவிய பங்குகள், பிட்காயின் போன்ற கிரிப்டோக்கள் மற்றும் கிட்டத்தட்ட அனைத்து பாரம்பரிய முதலீட்டுப் பிரிவுகளையும் மிஞ்சி சாதனை படைத்துள்ளது. பாரம்பரியமாகத் தங்கத்தின் மீது மிகுந்த பற்றும் நம்பிக்கையும் கொண்ட இந்திய முதலீட்டாளர்கள், இந்த விலை ஏற்றத்தைக் கண்டு மிகுந்த மகிழ்ச்சியில் உள்ளனர். வெள்ளி விலையும் ஓரளவு ஏற்றம் கண்டாலும், தங்கமே இந்த ஆண்டின் நட்சத்திர முதலீடாக ஜொலித்துள்ளது.

தங்கத்தின் ஏற்றம் நீடிக்குமா..?:வரும் 2026 ஆம் ஆண்டிலும் இந்த தங்கத்தின் ஏற்றம் தொடருமா..? அல்லது ஒரு விலை சரிவு வருமா..? என்பதைக் கண்டறிய, உலகளாவிய மற்றும் உள்நாட்டுச் சந்தை நிலவரங்களை நாம் ஆய்வு செய்ய வேண்டும்.

சர்வதேச கமாடிட்டி எக்ஸ்சேஞ்ச் (COMEX) மாத விளக்கப்படத்தில், 2000 ஆம் ஆண்டு முதல் உள்ள நீண்ட காலப் போக்கை காணும்போது, தங்கம் பல ஆண்டுகளாக ஏறுமுகத்தை நோக்கி நகர்கிறது. இந்த முதன்மைப் போக்கு வலுவாகவும், நேர்மறையாகவும் இருப்பதால், நீண்ட காலப் பயணத்தில் எந்தப் பிரச்சனையும் இல்லை.

முக்கியமாக, இந்த முதன்மைப் போக்குக்குள் தங்கம் ஒரு துணை ஏறுமுக சேனலை (Secondary Rising Channel) உருவாக்கியிருந்தது. இது சமீபத்தில் 3,250 டாலர் என்ற புள்ளியில் இருந்து வெற்றிகரமாக உடைத்து வெளியேறியது. இந்த உடைப்புதான் தங்கத்தின் விலையை ஆக்ரோஷமாக 4,380 டாலர் நோக்கித் தள்ளியதற்கான முக்கியக் காரணமாகும்.

முதன்மை மற்றும் துணைப் போக்குகளை உடைத்து வெளியேறுவது என்பது அரிதான மற்றும் மிகவும் சக்திவாய்ந்ததாகும். இது, நடுத்தர மற்றும் நீண்ட காலத்தில் தங்கம் மேலும் உயரும் ஆற்றலைக் கொண்டுள்ளது என்பதை உணர்த்துகிறது. அடுத்த பெரிய உளவியல் மற்றும் தொழில்நுட்ப தடையாக 6,000 டாலர் என்ற இலக்கு உள்ளது. இது குறுகிய கால இலக்கு இல்லை என்றாலும், வரும் ஏற்றத்தின் பாதையை இது நிர்ணயிக்கும்.

இந்தியச் சந்தை நிலவரம் (MCX) : இந்தியாவில் MCX தங்கத்தின் விலை, சர்வதேச COMEX போக்கைப் பின்பற்றி, கரன்சியின் கூடுதல் தாக்கத்துடன் நகரும். இந்தியச் சந்தையில், 10 கிராமுக்கு ரூ.1,00,000 என்ற உளவியல் மற்றும் தொழில்நுட்ப முக்கியத்துவம் வாய்ந்த ஒரு தடையை தங்கம் உடைத்து முன்னேறியதுதான் பெரிய திருப்பு முனையாகும்.

தற்போதுள்ள விலையில் இருந்து, COMEX சந்தையில் தங்கத்தின் விலை 3,500 டாலர் என்ற நிலைக்குக் குறையலாம் என்று நிபுணர்கள் கருதுகிறார்கள். இந்த 3,500 டாலர் என்ற நிலை, தற்போதைய சந்தை விலையில் இருந்து தோராயமாக 10% சரிவுக்குச் சமமாகும். அதாவது, இந்தச் சரிவு வரலாம் என்று எதிர்பார்க்கப்படுகிறது.

சர்வதேச சந்தையில் 10% சரிவு ஏற்பட்டால், இந்தியச் சந்தையிலும் (MCX) அதே விகிதத்தில் விலை குறையும் என்று கணக்கிடப்படுகிறது. இதன் விளைவாக, MCX-ல் தங்கத்தின் விலை (10 கிராம்) சற்று குறைந்து, ரூ.96,000 முதல் ரூ.1,00,000 என்ற விலை வரம்பிற்குள் வரலாம்.

குறுகிய கால ஏற்ற இறக்கங்கள் எதுவாக இருந்தாலும், கடந்த பல வருடங்களாக தங்கத்தின் விலை மேல்நோக்கி மட்டுமே நகர்ந்து வருகிறது. இது எதிர்காலத்திலும் தொடரும் என்று தொழில்நுட்ப ஆய்வுகள் காட்டுகின்றன. அடுத்த வருடம் தங்கம் தொடர்ந்து ஏறுமுகம் காட்டாமல், விலை உயர்வு, பின் சிறிய சரிவு, மீண்டும் உயர்வு எனப் படிகள் போல ஏற்ற இறக்கத்துடன் இருக்கும்.

விலை உயரும்போது வாங்குவதைத் தவிர்த்து, மேலே குறிப்பிட்ட இந்த வலுவான தாங்குதல் (Support) பகுதிக்கு விலை குறையும்போது, நீண்ட கால முதலீட்டு நோக்கத்துடன் இருப்பவர்கள் கொஞ்சம் கொஞ்சமாக தங்கத்தை வாங்கிச் சேர்ப்பது பாதுகாப்பான மற்றும் புத்திசாலித்தனமான உத்தியாக இருக்கும்.