தங்கம் Vs ரியல் எஸ்டேட்.. உங்கள் முதலீட்டிற்கு எது சிறந்தது..? நிபுணர்களின் பரிந்துரை என்ன..?

பெரும்பாலான இந்தியர்களுக்கு, தங்கத்தில் முதலீடு செய்வது அல்லது சொத்து (ரியல் எஸ்டேட்) வாங்குவது என்பது மிக முக்கியமான நிதி முடிவுகளாகும். ஆனால், இந்த இரண்டு முதலீடுகளும் நம் போர்ட்ஃபோலியோவில் வெவ்வேறு வேலைகளை செய்கின்றன என்பதை நாம் புரிந்துகொள்ள வேண்டும்.

தங்கத்தை நாம் நினைத்தவுடன் வாங்கலாம், நினைத்தவுடன் விற்றுப் பணமாக்கலாம். இது சந்தையில் திடீர் பிரச்சனைகள் வரும்போது நம்முடைய மொத்த முதலீட்டையும் காப்பாற்றும் ஒரு பாதுகாப்பு வலை போல செயல்படுகிறது. ஆனால், ரியல் எஸ்டேட் அப்படியல்ல. வாடகை மற்றும் நிலம் அல்லது வீட்டின் மதிப்பு உயர்வதன் மூலம் நீண்ட காலத்துக்குப் பெரிய செல்வத்தை உருவாக்கும் வாய்ப்பை அது தருகிறது.

இருப்பினும், இதற்கு நிறைய காலமும், கவனமும், ஆவண வேலைகளும் தேவை. எனவே, உங்களுக்கு உடனடியாகப் பணம் எடுக்கும் வசதி (Liquidity) தேவையா அல்லது பொறுமையாக காத்திருந்து பெரிய சொத்து சேர்க்கும் ஆசை இருக்கிறதா என்பதைப் பொறுத்து உங்கள் தேர்வு அமையும்.

தங்கம் : தங்கம் எப்போதும் ஒரு சிறந்த பாதுகாப்பு வளையம். எந்த ஒரு நிறுவனத்தின் தோல்வியும் தங்கத்தின் மதிப்பை உடனடியாக பாதிக்காது. அதனால் தான், பங்குச் சந்தை சரியும்போது கூட, தங்கத்தின் விலை உயர்கிறது. இதைச் சிறிய தொகையில் கூட சுலபமாக வாங்கலாம், விற்கலாம். எனவே, முதலீடு குறித்து அதிகம் தெரியாதவர்களுக்கு கூட, தங்கத்தில் ஒரு சிறு பகுதி முதலீடு செய்வது, மொத்த முதலீட்டை நிலைத்தன்மையுடன் வைத்திருக்க உதவும்.

தங்கத்தை பத்திரமாக வைக்கச் சிரமம் இருந்தால், சாவரின் தங்கப் பத்திரங்கள் (SGBs) அல்லது தங்க ETF-கள் மூலம் முதலீடு செய்யலாம். முதிர்ச்சியின்போது வரிச் சலுகைகளும் SGB-களில் உண்டு. ஆனால், நகை வாங்குவது முதலீட்டுக்கு சிறந்தது அல்ல; ஏனெனில், அதற்கான செய்கூலி மற்றும் விற்பனையின்போது ஏற்படும் கழிவுகள் உங்கள் லாபத்தை குறைக்கும். தங்கம் என்பது ஒரு வருமானம் கொடுக்கும் சொத்து அல்ல, அதன் விலை ஏறினால் மட்டுமே லாபம் கிடைக்கும் என்பதையும் நினைவில் கொள்ள வேண்டும்.

ரியல் எஸ்டேட் : சொத்து வாங்குவது இரண்டு வழிகளில் வருமானம் தரும். ஒன்று, நீங்கள் வாடகைக்கு விடுவதன் மூலம் மாதாந்திர வருமானம் ஈட்டலாம். மற்றொன்று, காலப்போக்கில் அந்த சொத்தின் மதிப்பு உயரும். நீங்கள் 7 முதல் 10 ஆண்டுகள் வரை காத்திருக்கத் தயாராக இருந்தால், ஒரு உறுதியான, கண்ணால் பார்க்கக்கூடிய சொத்தை விரும்பினால், இது நல்ல தேர்வு. ஒரு நல்ல வங்கிக் கடனுடன், நிலையான வாடகைதாரரை அமைத்துவிட்டால், உங்கள் EMI-யின் ஒரு பகுதி வாடகை மூலம் ஈடுகட்டப்படும், அதே நேரம் சொத்தின் மதிப்பு உயர்ந்து கொண்டே போகும்.

ஆனால், சொத்து வாங்கும் முன், இடத்தின் முக்கியத்துவம், வேலை வாய்ப்பு மையங்களுக்கு அருகாமை, போக்குவரத்து வசதிகள், நல்ல கட்டுமான நிறுவனங்கள் ஆகியவற்றை சரிபார்க்க வேண்டும். மேலும், விற்பது என்பது உடனடியாக நடக்காது. பராமரிப்புச் செலவுகள், சொத்து வரி, வாடகைக்கு ஆள் கிடைக்காமல் போதல் போன்ற அபாயங்களும் இதில் உள்ளன.

எதை, எப்போது தேர்வு செய்வது?:உங்களுக்கு அவசரத் தேவைக்கு உடனே பணம் எடுக்கும் வசதி மற்றும் போர்ட்ஃபோலியோவுக்கு ஒரு திடமான பாதுகாப்பு தேவை என்றால், தங்கத்தை தேர்வு செய்யுங்கள். மாறாக, உங்கள் மூலதனத்தை பல ஆண்டுகளுக்கு முதலீடு செய்து, வாடகை வருமானம் மற்றும் நீண்ட கால மதிப்பு உயர்வை விரும்பினால், ரியல் எஸ்டேட்டை தேர்வு செய்யுங்கள்.

முதலில், உங்கள் அவசர கால நிதி மற்றும் காப்பீட்டை பாதுகாப்பாக வைத்துக் கொள்ளுங்கள். அடுத்து, முதலீட்டை நிலைநிறுத்த ஒரு சிறிய பகுதி தங்கத்தில் சேமிக்கவும். பின்னர், உங்கள் வருமானம் நிலையானதும், நன்கு ஆராய்ந்த பிறகு, சரியான விலையில் ரியல் எஸ்டேட்டில் முதலீடு செய்யுங்கள். தங்கம் உங்கள் அவசர கால துணை.. ரியல் எஸ்டேட் உங்கள் நீண்ட கால சொத்து.