குட் நியூஸ்.. விரைவில் silver ETF வரப்போகுது.. சிறு முதலீட்டாளர்களுக்கு நல்ல சான்ஸ்..!

முதலீடு என்றாலே நம்மவர்களுக்கு முதலில் நியாபகம் வருவது தங்கம் தான். ஆனால் இன்று அதுவும் பேப்பர் தங்கம், டிஜிட்டல் தங்கம் என மாறி வருகின்றது.

பிசிகல் தங்கத்திற்கு மாற்றாக, இன்று கோல்டு இடிஎஃப் இருந்து வருகின்றது. இந்த நிலையில் தங்கத்திற்கு அடுத்த சிறந்த கமாடிட்டி முதலீடு எது எனில் அது வெள்ளியாகும்.

அதிலும் தற்போதைய காலக்கட்டத்தில் தொழிற்துறையானது மேம்பட்டு வரும் நிலையில், வெள்ளிக்கான தேவையும் அதிகரித்து வருகின்றது. இதனால் வெள்ளியின் விலையும் தொடர்ந்து அதிகரித்து வருகின்றது.

இதனை கருத்தில் கொண்டு, தற்போது silver ETF பற்றி ஆராய்ந்து வரப்படுவதாகவும் தகவல்கள் வெளியாகியுள்ளன. இதற்கு விரைவில் செபி அனுமதிக்கலாம் என்ற தகவலும் வெளியாகியுள்ளது. அண்மையில் நடந்த மியூச்சுவல் ஃபண்ட் ஆலோசனைக் கூட்டத்தில் இது குறித்து விரிவாக விவாதிக்கப்பட்டதாகவும் கூறப்படுகிறது.

ஆக இது குறித்து ஆராயப்பட்டு, சட்ட ரீதியான அல்லது செயல்பாட்டு தடைகள் எதுவும் இல்லாவிட்டால், வெள்ளி இடிஎஃப் (silver ETF) நடைமுறைக்கு கொண்டு வரப்படலாம் எனவும் தகவல்கள் வெளியாகியுள்ளன. வெள்ளிக்கான தேவை அதிகம் உள்ளது. ஆனால் செபியில் இது போன்ற சில திட்டங்களே உள்ளன.

வெள்ளி இடிஎஃப் என்பது சந்தையில் பங்கேற்பாளர்களின் நீண்டகால கோரிக்கையாக இருந்து வருகின்றது. தற்போது உலோகங்களை பிசிகலாக வாங்குகின்றனர். பலர் வெள்ளி இடிஎஃப்பினை சர்வதேச தளங்களில் வாங்குகின்றனர்.

தற்போதைய காலக்கட்டங்களில் முதலீட்டாளர்கள் இதனை பிசிகலாக வாங்கி வைப்பது என்பது மிக சவாலான விஷயம். அதோடு சேமிப்பதும் மிக கடினமாக உள்ளது. ஆக வெள்ளி இடிஎஃப் என்பது வந்தால், முதலீட்டாளர்கள் தங்களது போர்ட்போலியோவில் கூடுதலாக ஒரு முதலீட்டினை பெறுவர். இது சிறு முதலீட்டாளர்களுக்கும் நல்ல வாய்ப்பாக அமையும்.