ஸ்பேஸ்எக்ஸ் உடன் கைகோர்த்த கூகுள்.. முதலில் நாசா, இப்போ கூகுள்.. கலக்கும் எலான் மஸ்க்..!

விண்வெளி ஆராய்ச்சி மற்றும் பயணங்கள் துறையில் ஒரு தனியார் நிறுவனமாக அரசின் உதவிகள் எதுவும் இல்லாமல் மிகப்பெரிய புரட்சியைச் செய்துள்ள எலான் மஸ்க்-ன் ஸ்பேஸ் எக்ஸ் அடுத்தடுத்து நேற்று தனது ஸ்டார்ஷிப் ராக்கெட்-ஐ 5வது கட்ட உயரத்தில் சோதனை செய்து வெற்றி கண்டு உள்ளது.

இந்த நிலையில் நாசாவின் நிலவுக்கு செல்லும் பயணத் திட்டத்தை மொத்தமாகக் கைப்பற்றியுள்ள ஸ்பேஸ் எக்ஸ், தற்போது உலகின் முன்னணி டெக் நிறுவனமான கூகுள் உடன் ஒரு முக்கியமான திட்டத்திற்காக இணைந்துள்ளது.

எலான் மஸ்க்-ன் ஸ்பேஸ்எக்ஸ்

எலான் மஸ்க்-ன் ஸ்பேஸ்எக்ஸ் நிறுவனம் விண்வெளி பயணங்கள் மட்டும் அல்லாமல் செயற்கைக்கோள் வாயிலான இண்டர்நெட் சேவை திட்டமான ஸ்டார்லிங்க்-ஐ இயக்கி வருவது அனைவருக்கும் தெரியும். இந்த அதிவேக இண்டர்நெட் சேவையைக் கூகுள் பயன்படுத்தத் திட்டமிட்டு ஸ்பேஸ்எக்ஸ் உடன் கூட்டணி சேர்ந்துள்ளது.

கூகுள் கிளவுட்

கூகுள் நிறுவனத்தில் மிகவும் வேகமாக வளர்ந்து வரும் பிரிவான கூகுள் கிளவுட் சேவையை மேம்படுத்தும் விதமான டேட்டா டெலிவரி, கிளவுட் சேவை, நிறுவனங்களுக்கான சேவை ஆகியவற்றை மேம்படுத்த ஸ்பேஸ்எக்ஸ்-ன் ஸ்டார்லிங்க் சேவை உடன் இணைந்துள்ளது.

கூகுள் டேட்டா சென்டர்

இக்கூட்டணியின் கீழ் கூகுள் டேட்டா சென்டர் இருக்கும் அனைத்து இடங்களிலும் ஸ்டார்லிங்க் தனது கிரவுட் ஸ்டேஷனை அமைக்க உள்ளது. ஸ்டார்லிங்க் தற்போது 1,500 செயற்கைகோள் வாயிலாக அதிவேக இண்டர்நெட் சேவையை அளித்து வரும் நிலையில் உலகம் முழுவதும் இருக்கும் பெரு நிறுவனங்களுக்கு ஸ்டார்லிங்க் - கிளவுட் சேவை வாயிலாகச் சிறு கிராமம் வரையில் சேவை அளிக்க முடியும்.

கூகுளின் முடிவு

மேலும் ஸ்டார்லிங்க் சேவை தொடர்ந்து விரிவாக்கம் செய்யப்பட்டு வரும் நிலையில், கூடிய விரைவில் கூகுள் தனது வாடிக்கையாளர்களுக்கு அதிவேக டேட்டா டெலிவரியை உலகம் முழுவதும் அளிக்க முடியும், குறிப்பாகக் காடு, மலை, கிராமம், போன்ற பகுதிகளுக்கும் அளிக்க முடியும் என நம்புகிறது கூகுள்.