தீபாவளி எபெக்ட்..!! ஒரே மாதத்தில் 1.87 லட்சம் கோடி கல்லாகட்டிய மத்திய அரசு..!!

இந்தியாவின் மொத்த சரக்கு மற்றும் சேவை வரி (GST) வசூல் அக்டோபர் 2024 இல் ரூ.1.87 லட்சம் கோடியாக அதிகரித்துள்ளது, இது கடந்த ஆண்டின் அதே காலகட்டத்துடன் ஒப்பிடுகையில் 9% உயர்வை பதிவு செய்துள்ளது. இந்த ரூ.1.87 லட்சம் கோடி அளவீடு என்பது ஜிஎஸ்டி வரி வசூலில் இரண்டாவது அதிகபட்சமான அளவாகும். ஏப்ரல் 2024 இல் ரூ.2.10 லட்சம் கோடியைத் தொடர்ந்து இரண்டாவது இடத்தில் உள்ளது.

சென்டரல் ஜிஎஸ்டி (CGST) வசூல் ரூ.33,821 கோடியாகவும், மாநில ஜிஎஸ்டி (SGST) ரூ.41,864 கோடியாகவும், ஒருங்கிணைந்த ஜிஎஸ்டி (IGST) ரூ.99,111 கோடியாகவும், செஸ் கட்டணம் வாயிலாக ரூ.12,550 கோடியும் வசூலிக்கப்பட்டு உள்ளது.

GST வருவாயில் வலுவான வளர்ச்சி, பண்டிகை காலத்தில் வலுவான உள்நாட்டு விற்பனை மற்றும் மேம்படுத்தப்பட்ட வரி வசூல் நடவடிக்கைகள் உள்ளிட்ட பல்வேறு காரணிகளால் பதிவாகியுள்ளது. அக்டோபர் மாதத்தில் உள்நாட்டு பரிவர்த்தனைகள் மொத்த வருவாயில் ரூ.1.42 லட்சம் கோடியைப் பங்களித்தன, இது வருடாந்திர அடிப்படையில் 10.6% அதிகரித்துள்ளது. இதற்கிடையில், இறக்குமதி வரிகளின் வருவாய் 4% அதிகரித்து ரூ.45,096 கோடியாக உயர்ந்துள்ளது.

அக்டோபர் மாதத்தில் ரூ.19,306 கோடி மதிப்பிலான ரீபண்ட் தொகை செலுத்தப்பட்டு உள்ளது, இது கடந்த ஆண்டு அதே காலகட்டத்துடன் ஒப்பிடுகையில் 18.2% அதிகரித்துள்ளது. திரும்பப் பெறுதல்களுக்குப் பிறகு, நிகர GST வசூல் 8% அதிகரித்து ரூ.1.68 லட்சம் கோடியைத் தாண்டியது.

டெலாய்ட் இந்தியாவின் பார்ட்னரான எம்.எஸ். மணி, பண்டிகை காலத்தின் மூலம் பதிவான அதிகப்படியான வர்த்தக தாக்கம் மற்றும் மேம்படுத்தப்பட்ட இணக்க முயற்சிகளால் வலுவான GST வசூல் பதிவாகியுள்ளது என்று கூறினார். GST வருவாயில் இந்த நிலையான வளர்ச்சி இந்தியப் பொருளாதாரத்தின் ஆரோக்கியத்தையும் அரசின் திறமையான வரி நிர்வாகத்தையும் குறிக்கிறது என்று கூறினார்.