புது கார் விலை 1.56 லட்சம் வரை குறையுது..!! கார் ஷோரூம்-க்கு உடனே கிளம்புங்க..!

மத்திய நிதியமைச்சர் நிர்மலா சீதாராமன் தலைமையிலான 56வது ஜிஎஸ்டி கவுன்சில் கூட்டத்தில் சிறிய கார்கள் மற்றும் மோட்டார் சைக்கிள்களுக்கான வரியை 28 சதவீதத்திலிருந்து 18 சதவீதமாகக் குறைத்து, பெரிய கார்கள் மற்றும் எஸ்யூவிகளுக்கு 40 சதவீத வரி விதித்துள்ளது.

இந்த மாற்றத்தின் மூலம் வாகனங்களின் விலைகளைக் குறைத்து, பண்டிகைக் காலத்தில் தேவையை அதிகரிக்கும் என எதிர்பார்க்கப்படுகிறது. இந்த சூழ்நிலையில் மஹிந்திரா, டாடா மோட்டார்ஸ், ரெனால்ட் நிறுவனங்கள் விலைக் குறைப்பை அறிவித்துள்ளன.

ஜிஎஸ்டி மாற்றங்களும் அதன் தாக்கமும்
ஜிஎஸ்டி கவுன்சிலின் புதிய அறிவிப்புகளின் படி செப்டம்பர் 22 முதல் சிறிய கார்கள் (1500 சிசி மற்றும் 4000 மிமீ நீளத்திற்கு உட்பட்டவை) மற்றும் 350 சிசி வரையிலான மோட்டார் சைக்கிள்களுக்கு வரியை 28 சதவீதத்திலிருந்து 18 சதவீதமாகக் குறைத்துள்ளது.

பெரிய இன்ஜின் கொண்ட பெட்ரோல் மற்றும் டீசல் கார்கள், முன்பு 28 சதவீத ஜிஎஸ்டியுடன் 22 சதவீத கூடுதல் செஸ் வரி என மொத்தம் 50 சதவீதம் வரி செலுத்தப்பட்டு இருந்தது. இப்போது 40 சதவீத வரிக்கு மாற்றப்பட்டுள்ளன.

எலக்ட்ரிக் வாகனங்கள் 5 சதவீத ஜிஎஸ்டியில் தொடர்கின்றன. இந்த வரிக் குறைப்பு, வாகன விலைகளைக் குறைத்து, வாடிக்கையாளர்களுக்கு நன்மை அளிக்க உள்ளது. குறிப்பாக பண்டிகைக் காலத்தில் திட்டமிட்டு வெளியாகியுள்ள இந்த அறிவிப்பு வாகனங்களின் விற்பனையை அதிகரிக்கும் என எதிர்பார்க்கப்படுகிறது. இந்த நிலையில் எந்த கார் எவ்வளவு குறைகிறது என்பதை இப்போது பார்ப்போம்.

மஹிந்திராவின் விலைக் குறைப்பு
மஹிந்திரா அண்ட் மஹிந்திரா நிறுவனம், செப்டம்பர் 6 முதல் தனது வாகனங்களின் விலையை 1.56 லட்சம் ரூபாய் வரை குறைத்துள்ளது. இதில், எக்ஸ்யூவி 3எக்ஸ்ஓ (டீசல்) 1.56 லட்சம் ரூபாய் வரை குறைப்புடன் மிகப்பெரிய நன்மையைப் பெறுகிறது.

எக்ஸ்யூவி3எக்ஸ்ஓ (பெட்ரோல்) 1.40 லட்சம், தார் 2டபிள்யூடி (டீசல்) 1.35 லட்சம், ஸ்கார்ப்பியோ-என் 1.45 லட்சம், எக்ஸ்யூவி700 1.43 லட்சம், தார் ராக்ஸ் 1.33 லட்சம், போலிரோ/நியோ 1.27 லட்சம், ஸ்கார்ப்பியோ கிளாசிக் மற்றும் தார் 4டபிள்யூடி 1.01 லட்சம் வரை விலைக் குறைக்கப்படுகிறது.

டாடா மோட்டார்ஸின் விலை குறைப்பு
டாடா மோட்டார்ஸ், முதல் வாகன உற்பத்தியாளராக, செப்டம்பர் 22 முதல் தனது வாகனங்களின் விலையை 1.55 லட்சம் ரூபாய் வரை குறைப்பதாக அறிவித்தது. நெக்ஸான் மாடல், 1.55 லட்சம் ரூபாய் குறைப்புடன் மிகப்பெரிய நன்மையைப் பெறுகிறது.

மற்ற மாடல்களில், சஃபாரி 1.45 லட்சம், ஹாரியர் 1.40 லட்சம், ஆல்ட்ரோஸ் 1.10 லட்சம், பஞ்ச் 85,000 ரூபாய், டிகோர் 80,000 ரூபாய், டியாகோ 75,000 ரூபாய், மற்றும் கர்வ் 65,000 ரூபாய் வரை விலைக் குறைப்பு பெறுகின்றன.

ரெனால்ட் விலை குறைப்பு
ரெனால்ட் இந்தியா, தனது கார்களின் விலையை 96,395 ரூபாய் வரை குறைத்து அறிவித்துள்ளது, இது செப்டம்பர் 22 முதல் அமலுக்கு வரும்.

கைகர் மாடலில், இமோஷன் சிவிடி மற்றும் DT சிவிடி 1.29 லட்சம் ரூபாய், இமோஷன் எம்டி 57,995 ரூபாய், இமோஷன் DT எம்டி 99,995 ரூபாய் குறைப்பு பெறுகின்றன.

குவிட் மாடலில், கிளைம்பர் ஏஎம்டி DT 54,995 ரூபாய், கிளைம்பர் 50,095 ரூபாய், ஆர்எக்ஸ்டி ஏஎம்டி 51,195 ரூபாய், கிளைம்பர் DT 51,195 ரூபாய் குறைப்பு பெறுகின்றன.

டிரைபர் மாடலில், இமோஷன் ஏஎம்டி DT 80,195 ரூபாய், இமோஷன் ஏஎம்டி 78,195 ரூபாய், இமோஷன் எம்டி DT 75,695 ரூபாய், இமோஷன் 73,795 ரூபாய் குறைப்பு பெறுகின்றன. இந்த மாற்றங்கள், வாடிக்கையாளர்களுக்கு பயனளிக்கும்.

இந்த 3 பிராண்டுகளில் டாடா நெக்ஸான் (1.55 லட்சம்) மற்றும் மஹிந்திராவின் எக்ஸ்யூவி3எக்ஸ்ஓ டீசல் (1.56 லட்சம்) ஆகியவை மிகப்பெரிய விலைக் குறைப்பைப் பெறுகின்றன.

மறுபுறம், டாடா கர்வ் (65,000 ரூபாய்) மற்றும் ரெனால்ட் குவிட் (49,000 முதல் 57,000 ரூபாய் வரை) ஆகியவை குறைந்தபட்ச விலை குறைப்பைப் பெறுகின்றன.