தங்கத்தில் முதலீடு: எப்போதும் மனைவிதான் புத்திசாலிங்க.. பாராட்டும் ஹர்ஷ் கோயங்கா

இந்த ஆண்டு தொடக்கம் முதல் தங்கத்தின் விலை தொடர்ந்து உயர்ந்து வருகிறது. தற்போது தங்கத்தின் விலை இதுவரை இல்லாத அளவுக்கு புதிய உச்சத்தை எட்டியுள்ளன. சில நேரங்களில் நம் வீட்டு பெண்கள் தங்க நகை எடுக்கும் போது இப்போ இது தேவையா என்ற எண்ணம் நமக்கு ஏற்பட்டு இருக்கும். ஆனால் இப்போ தங்கத்தின் விலை பார்க்கும்போது, நல்ல வேளை அன்னைக்கே அவள் (மனைவி) தங்கத்தை வாங்கி வைச்சா என்ற ஒரு விதமான நிதி பாதுகாப்பு எண்ணம் நமக்கு ஏற்பட்டு இருக்கும்.

சாமானிய நடுத்தர கணவர்கள் மட்டுமல்ல பெரிய தொழிலதிபர்களும் பெண்கள் தங்கம் சேமிப்பதை பாராட்டி வருகின்றனர். தற்போது அந்த லிஸ்டில் பிரபல தொழிலதிபர் இடம் பிடித்துள்ளார். உள்கட்டமைப்பு, டயர் மற்றும் ஐடி உள்பட பல்வேறு வணிகங்களில் ஈடுபட்டு வரும் நிறுவனம் ஆர்பிஜி எண்டர்பிரைசஸ். இந்நிறுவனத்தின் தலைவர் ஹர்ஷ் கோயங்கா.

இவர் தனது சமூக வலைதளமான எக்ஸில், தான் கார் வாங்கியதையும், மனைவி தங்கம் வாங்கியதையும் ஒப்பிட்டு, எப்போதும் மனைவிகள் தான் புத்திசாலிங்க என்று யதார்த்தமாக தனது கருத்தை பதிவு செய்துள்ளார். ஹர்ஷ் கோயங்கா தனது எக்ஸ் பதிவில், 10 ஆண்டுகளுக்கு முன்பு நான் ரூ.8 லட்சத்தில் ஒரு கார் வாங்கினேன். ஆனால் என் மனைவி அப்போது ரூ.8 லட்சத்துக்கு தங்கம் வாங்கினாள்.

இன்று நான் வாங்கிய காரின் மதிப்பு ரூ.1.5 லட்சம் ஆனால் அவள் வாங்கிய தங்கத்தின் மதிப்பு ரூ.32 லட்சம். இடையில் நான் தங்கம் வாங்குவதை தவிர்த்து விட்டு அந்த பணத்தை வைத்து சுற்றுலாவுக்கு செல்வோமா? என்று என் மனைவியிடம் கேட்டேன். ஆனால் அவள் சுற்றுலா 5 நாட்கள் நீடிக்கும், தங்கம் 5 தலைமுறைகள் நீடிக்கும் என்றாள்.

நான் ரூ.1 லட்சத்துக்கு போன் வாங்கினேன். அவள் அதே மதிப்புக்கு தங்கம் வாங்கினாள். இப்போது அந்த செல்போனின் மதிப்பு ரூ.8 ஆயிரம். ஆனால் அவளுடைய தங்கத்தின் மதிப்பு ரூ.2 லட்சம். நீதி: மனைவிகள் புத்திசாலிகள் என்று பதிவு செய்து இருந்தார்.

அண்மையில் கோடக் மகிந்திரா வங்கியின் நிறுவனர் மற்றும் இயக்குனருமான உதய் கோடக், இந்திய இல்லத்தரசிகளை புத்திசாலித்தனமான நிதி மேலாளர்கள் என்று பாராட்டி இருந்தார். உதய் கோடக் தனது எக்ஸ் பக்கத்தில், காலப்போக்கில் தங்கத்தின் செயல்திறன், இந்திய இல்லத்தரசிகள் உலகிலேயே புத்திசாலியான நிதி மேலாளர்கள் என்பதை எடுத்துக்காட்டுகிறது.

முதலீடு மூலம் பொருளாதார நடவடிக்கைகளை தூண்டுதல் மற்றும் பொருளாதாரத்தை தூண்டுவதற்காக வருவாயை காட்டிலும் அதிகமாக செலவினங்களை ஆதரிக்கும் அரசாங்கங்கள் மற்றும் பொருளாதார நிபுணர்கள், என்றென்றும் தங்க இறக்குமதியாளராக இருக்கும் இந்தியாவை பார்த்து கற்க வேண்டியது இருக்கலாம் என்று பதிவு செய்து இருந்தார்.

அசால்டா அடிச்சு தூள் கிளப்பும் ஐசிஐசிஐ வங்கி... அதிர்ச்சியில் எச்டிஎஃப்சி வங்கி
Disclaimer: This article is strictly for informational purposes only. It is not a solicitation to buy, sell in precious metal products, commodities, securities or other financial instruments. Greynium Information Technologies Pvt Ltd, its subsidiaries, associates and the author of this article do not accept culpability for losses and/or damages arising based on information in this article.