துபாயில் ஜாலியாக இவ்வளவு தங்கம் வாங்கலாம்.. எந்த வரியும் இல்ல..!

சென்னை: இந்தியாவுடன் ஒப்பிடும்போது துபாயில் தங்கத்தின் விலை குறைவானதாக இருக்கிறது. எனவே தான் துபாய் செல்லக்கூடிய இந்தியர்கள் அங்கிருந்து தங்கத்தை வாங்கி வருவார்கள். ஆனால் துபாயில் தங்கம் விலை குறைவாக இருக்கிறது என்பதற்காக நாம் நினைத்த அளவுக்கு எல்லாம் தங்கத்தை வாங்கி விட முடியாது.

ஏனெனில் அதனை இந்தியாவிற்கு கொண்டு வரும்போது சுங்கவரி செலுத்த வேண்டி இருக்கும். அந்த வகையில் துபாயில் இருந்து வரக்கூடிய இந்தியர்கள் எவ்வளவு தங்கத்தை எந்த வரியும் செலுத்தாமல் கொண்டு வர முடியும் என்பது குறித்து நாம் விரிவாக தெரிந்து கொள்ளலாம்.

துபாயில் தங்கத்தை வாங்குபவர்கள் அதற்கான உரிய ஆவணங்களை வைத்திருக்க வேண்டும். அதாவது தங்கம் வாங்கியதற்கான ரசீது, தங்கத்தின் தரம் மற்றும் தூய்மை தன்மைக்கான சான்றிதழ்களை கட்டாயம் வைத்திருக்க வேண்டும். தங்க நகை, தங்க கட்டி , நாணயம் ஆகிய அனைத்துக்கும் இது பொருந்தும்.

தங்க நாணயங்களை பொருத்தவரை துபாயில் இருந்து வாங்கி வரக்கூடிய மொத்த தங்க நாணயத்தின் எடை 20 கிராமிலிருந்து 100 கிராமுக்குள் இருக்கும் போது 10% சுங்கவரி செலுத்தியாக வேண்டும். ஒருவேளை நீங்கள் 20 கிராமுக்கும் குறைவான தங்க நாணயங்களை கொண்டு வருகிறீர்கள் என்றால் அதற்கு எந்த ஒரு வரியும் செலுத்த வேண்டியது கிடையாது.

ஒரு குழந்தை 40-லிருந்து 100 கிராமுக்குள் தங்கத்தை கொண்டு வந்தால் 3% சுங்க வரி செலுத்த வேண்டும். ஒருவேளை அந்த தங்கத்தின் எடை 100 முதல் 200 கிராமுக்குள் இருந்தால் 6 % சுங்க கட்டணம் செலுத்த வேண்டும். 200 கிராமுக்கு மேல் குழந்தையின் பெயரில் தங்கத்தை கொண்டு வருகிறீர்கள் என்றால் 10% சுங்க கட்டணம் செலுத்தியாக வேண்டும். 15 வயதுக்குட்பட்ட குழந்தைகள் 40 கிராமுக்கு கீழ் இருக்கும் தங்க நகைகளை எந்த ஒரு வரியும் இல்லாமல் கொண்டுவர முடியும்.

ஒரு பெண் துபாயில் இருந்து இந்தியா வருகிறார் என்றால் 40 முதல் 100 கிராம் வரையிலான தங்கத்திற்கு 3% சுங்க வரியும் 100 முதல் 200 கிராம் வரையிலான தங்கத்திற்கு 6% வரியும் செலுத்த வேண்டும். 200 கிராமுக்கு மேல் தங்கத்தை வாங்கி வந்தால் 10% வரி செலுத்த வேண்டும். பெண் ஒருவர் 40 கிராமுக்குள் கீழ் வரை கொண்டு வரும் தங்கத்திற்கு எந்த வரியின் செலுத்த வேண்டியதில்லை. இந்த தங்கத்தை நகையாகவோ அல்லது கட்டிகளாகவோ அல்லது நாணயங்களாகவோ கொண்டு வரலாம்.

ஒரு ஆண், 20 முதல் 50 கிராம் வரையிலான தங்கத்திற்கு 3% வரியும் 50 முதல் 100 கிராம் வரையிலான தங்கத்திற்கு 6% வரியும் செலுத்த வேண்டும். 100 கிராமுக்கு மேல் தங்கம் வாங்கி கொண்டு வந்தால் 10% வரி செலுத்தி ஆக வேண்டும் 20 கிராமுக்கும் கீழ் தங்கத்தை கொண்டு வரும் ஆண்களுக்கு எந்த ஒரு சுங்க வரியும் கிடையாது. பொதுவாக சுங்கவரி இல்லாத அளவீடு வரையிலான தங்கம் கழிக்கப்பட்டு மீதமுள்ள தங்கத்திற்கு தான் வரி விதிக்கப்படுகிறது.

Story written by: Devika