பூமியில் இதுவரை வெட்டி எடுக்கப்பட்ட மொத்த தங்கம் எவ்வளவு தெரியுமா..? இன்னும் எவ்வளவு இருக்கிறது..?

உலகெங்கிலும் உள்ள மொத்தத் தங்கத்தின் அளவு எவ்வளவு, அது இப்போது எங்குப் புழங்குகிறது என்பது குறித்து Visual Capitalist என்ற ஆய்வு நிறுவனம், சப்ரீனா லாம் என்ற கலைஞரின் வரைபட உதவியுடன் ஒரு விரிவான ஆய்வை வெளியிட்டுள்ளது. டாரதி நியூஃபெல்ட் என்பவர் வெளியிட்ட இந்த அறிக்கை, இதுவரை மனிதனால் வெட்டி எடுக்கப்பட்ட தங்கத்தின் நிலவரம் குறித்து ஆச்சரியமூட்டும் தகவல்களை வழங்குகிறது.

2024ஆம் ஆண்டின் இறுதியில், பூமியின் மேற்பரப்பில் (அதாவது, வெட்டி எடுக்கப்பட்டுப் பயன்பாட்டில் உள்ள) உள்ளதாக மதிப்பிடப்பட்டுள்ள மொத்தத் தங்கத்தின் அளவு 2,16,265 மெட்ரிக் டன்கள் ஆகும். இந்த ஒட்டுமொத்த தங்கத்தையும் உருக்கி, அதை ஒரே பெரிய உருவமாக மாற்றினால், அது ஒவ்வொரு பக்கமும் சுமார் 22.3 மீட்டர் (73 அடி) உயரம் கொண்ட ஒரு கனசதுரத்தை மட்டுமே உருவாக்கும். இத்தனைப் பெரிய உலகில், பல ஆயிரம் ஆண்டுகளாக மனிதர்கள் தேடி சேகரித்த தங்கத்தின் அளவு, ஒரு பெரிய கட்டிடத்தின் ஒரு பாதியளவு இடத்தில்தான் அடங்கிவிடும் என்பது கவனிக்கத்தக்கது.

தற்போதைய நிலவரப்படி, தங்கத்தின் விலை 1980 ஆம் ஆண்டு இருந்த உச்சபட்ச விலையை விட 40% அதிகமாக உள்ளது. முதலீட்டாளர்கள், பொருளாதாரம் தடுமாறும் காலங்களில் தங்கத்தை மிகவும் பாதுகாப்பான சேமிப்பு சாதனமாகக் கருதுவதால், அதன் மதிப்பு எப்போதும் உயர்ந்த நிலையிலேயே நீடிக்கிறது.

தங்கம் எங்குச் செலவிடப்பட்டது..?: வெட்டி எடுக்கப்பட்ட இந்த 2,16,265 மெட்ரிக் டன் தங்கத்தின் பயன்பாடு பல்வேறு பிரிவுகளாக பிரிக்கப்பட்டுள்ளது. இதில், வெட்டி எடுக்கப்பட்ட தங்கத்தில் மிகப்பெரிய பங்கு ஆபரணங்களாகவே உள்ளது. மொத்தமுள்ள 2,16,265 மெட்ரிக் டன் தங்கத்தில், சுமார் 97,149 மெட்ரிக் டன்கள் ஆபரணங்களுக்காகப் பயன்படுத்தப்படுகின்றன. கலாச்சார நிகழ்வுகள் மற்றும் திருமணங்கள் போன்ற காரணங்களால், உலகில் தங்க ஆபரணங்களை அதிகம் வாங்கும் நாடாக இந்தியா திகழ்கிறது (560 டன்கள்).

இதற்கு அடுத்தபடியாக, தங்கமானது முதலீட்டுத் தங்கமாக சேமிக்கப்படுகிறது. தங்கக் கட்டிகள், நாணயங்கள் மற்றும் தங்கத்தை அடிப்படையாகக் கொண்ட பரிவர்த்தனை நிதித் திட்டங்கள் (ETFs) ஆகியவை இந்தப் பிரிவில் 48,634 மெட்ரிக் டன்களைக் கொண்டுள்ளன. இது, உலக நாடுகளின் மத்திய வங்கிகள் வைத்திருக்கும் மொத்தத் தங்கத்தின் அளவை விடவும் கணிசமாகக் கூடுதலாகும்.

அரசாங்கங்களைப் பொறுத்தவரை, நாடுகள் தங்கள் நாட்டின் பொருளாதார உறுதித்தன்மைக்காக மத்திய வங்கிகள் கையிருப்பில் சுமார் 37,755 மெட்ரிக் டன்களை வைத்துள்ளன. இதில் அமெரிக்கா, ஜெர்மனி போன்ற நாடுகள் முன்னிலை வகிக்கின்றன.

இறுதியாக, சுமார் 32,727 மெட்ரிக் டன்கள் தங்கம் தொழில்நுட்பப் பயன்பாடுகளுக்காக ஒதுக்கப்பட்டுள்ளது. மின்னணுவியல் துறையில், குறிப்பாக செமிகண்டக்டர்களில், இதன் சிறந்த கடத்தும் திறன் காரணமாக அதிகளவில் பயன்படுத்தப்படுகிறது.

இன்னும் எவ்வளவு தங்கம் பூமிக்குள் உள்ளது..?: இதுவரை பூமியில் இருந்து எடுக்கப்படாத, ஆனால் வெட்டி எடுப்பதற்கு சாத்தியமுள்ள தங்கத்தின் கையிருப்பு சுமார் 54,770 மெட்ரிக் டன்களும், ஆதாரங்களாக 77,340 மெட்ரிக் டன்களும் இருப்பதாக மதிப்பிடப்பட்டுள்ளது. அதாவது, சுமார் 1,32,110 மெட்ரிக் டன்கள் தங்கம் இன்னும் பூமிக்கு அடியில் உள்ளது.

இந்த தகவல்கள் மூலம், தங்கம் என்பது ஒரு ஆடம்பரப் பொருள் மட்டுமல்ல, அது உலக நாடுகளின் பொருளாதாரத்தின் முதுகெலும்பாகவும், அன்றாட தொழில்நுட்பத்தின் அடிப்படை அங்கமாகவும் செயல்படுவதை நாம் புரிந்துகொள்ளலாம்.