26,000 டன் தங்கம் எடுத்தாச்சு.. இன்னும் எவ்வளவு தங்கம் பூமிக்கடியில் இருக்கு தெரியுமா..?

கடந்த சில மாதங்களாக உலகச் சந்தையில் தங்கத்தின் விலை மிக வேகமாக உயர்ந்து கொண்டே போகிறது. வரலாறு முழுக்க மனிதர்களை கவர்ந்த இந்த தங்கம், இப்போது செல்வம் மற்றும் செழிப்பின் அடையாளமாக மட்டுமல்லாமல், நவீன எலெக்ட்ரானிக்ஸ் கருவிகள் மற்றும் தொழில்நுட்பத்திலும் அதிக அளவில் பயன்படுத்தப்படுகிறது. இதன் விளைவாக, தங்கத்தின் தேவை மிகவும் அதிகரித்துள்ளது.

பூமியில் தங்கத்தின் கையிருப்பு நிலை என்ன..?: அமெரிக்கப் புவியியல் ஆய்வு மையத்தின் (USGS) சமீபத்திய அறிக்கையின்படி, மனித நாகரிகம் தொடங்கியதில் இருந்து நாம் இதுவரை சுமார் 26,000 டன் தங்கத்தை பூமிக்கு அடியில் உள்ள பாறைகள் மற்றும் ஆறுகளில் இருந்து தோண்டி எடுத்துள்ளோம். இந்த அளவு, இப்போது உலகிலேயே அதிக தங்கம் கையிருப்பு வைத்துள்ள முதல் 10 நாடுகளின் மொத்த இருப்பை விட அதிகமாகும். ஆரம்ப காலத்தில், தொழில்நுட்ப பயன்பாடு இல்லாததால், எடுக்கப்பட்ட பெரும்பாலான தங்கம் நகைகள் மற்றும் அலங்காரப் பொருட்களை செய்ய மட்டுமே பயன்பட்டது.

ஆராய்ச்சியாளர்களின் கணக்குப்படி, பூமியின் தங்கம் இருப்புத் தொழில்துறை புரட்சிக்குப் பிறகு வேகமாக குறைந்து வந்தாலும், இன்னும் பொருளாதார ரீதியில் லாபகரமாக வெட்டி எடுக்கக்கூடிய அளவில் சுமார் 70,550 டன் தங்கம் உலகளவில் மீதமுள்ளது. இந்த அதிகப்படியான தங்கம், தற்போது வரை அதிகம் சுரண்டப்படாத நிலையில், தென்னாப்பிரிக்கா, ரஷ்யா மற்றும் ஆஸ்திரேலியா போன்ற நாடுகளில் இருப்பதாக USGS குறிப்பிட்டுள்ளது.

தங்கம் எவ்வாறு சேமித்து வைக்கப்படுகிறது..?: உலக தங்க கவுன்சிலின் புள்ளிவிவரங்களின்படி, உலகெங்கிலும் உள்ள மொத்த தங்கத்தில் சுமார் 45% மக்கள் பயன்படுத்தும் நகைகளாகவும், 22% தங்கக் கட்டிகள் மற்றும் நாணயங்களாகவும் உள்ளன. ஆனால், நாடுகளின் பாதுகாப்பிற்காக மத்திய வங்கிகளில் டெபாசிட் செய்யப்பட்டுள்ள தங்கத்தின் அளவு மிகவும் குறைவாக, சுமார் 17% மட்டுமே உள்ளது. இது பொருளாதாரப் பாதுகாப்பிற்காக நாடுகள் வைத்திருக்கும் அசல் இருப்பை காட்டுகிறது.

எந்த நாட்டில் அதிக தங்கம் உள்ளது..?: உலகிலேயே அதிக தங்கம் உற்பத்தி செய்யும் நாடாக சீனா இருந்தாலும், அதிக தங்கம் கையிருப்பு வைத்துள்ள நாடுகளின் பட்டியலில் அது பின்தங்கியே உள்ளது. உலக நாடுகளின் மத்திய வங்கிகள் வைத்துள்ள தங்கத்தின் கையிருப்பு விவரங்களைப் பார்க்கும்போது, அமெரிக்கா இப்பட்டியலில் அசைக்க முடியாத இடத்தில் உள்ளது. 2024 ஆம் ஆண்டு கணக்குப்படி, அமெரிக்கா சுமார் 8,133.46 டன்கள் தங்கத்தைக் கையிருப்பு வைத்து உலகிலேயே முதலிடத்தில் உள்ளது.

அதற்கு அடுத்தபடியாக, ஐரோப்பிய நாடுகளில் ஜெர்மனி 3,351.53 டன்களுடன் இரண்டாவது இடத்தையும், இத்தாலி 2,451.84 டன்களுடன் மூன்றாவது இடத்தையும், பிரான்ஸ் 2,436.97 டன்களுடன் நான்காவது இடத்தையும் பிடித்துள்ளன. ரஷ்யா 2,335.85 டன்கள் கையிருப்புடன் ஐந்தாவது இடத்தில் இருக்க, அதிக அளவில் தங்கம் உற்பத்தி செய்யும் நாடான சீனா 2,264.32 டன்களுடன் ஆறாவது இடத்தில் உள்ளது. எதிர்காலத்தில் தன்னுடைய கையிருப்பை 5,000 டன் வரை அதிகரிக்க வேண்டும் என்று சீனா இலக்கு வைத்துள்ளது.

இந்த தரவுகள், உலகப் பொருளாதாரத்தில் இந்த நாடுகள் தங்கத்தை எவ்வளவு முக்கியத்துவம் வாய்ந்த ஒரு சொத்தாக பார்க்கின்றன என்பதையும், பொருளாதார ஸ்திரத்தன்மைக்காக அவை தங்கத்தை எந்த அளவு நம்பி உள்ளன என்பதையும் தெளிவாக காட்டுகின்றன.