உலகளவில் 2ஆம் இடம்.. சாதனை படத்தை இந்தியா.. RBI-இன் தங்க இருப்பு 880 டன்னாக உயர்வு..!!

உலக அளவில் தங்கத்திற்கான நுகர்வோர் தேவை அதிகரிப்பதில் இந்தியா இரண்டாவது இடத்தில் இருப்பதாக ஸ்டேட் பேங்க் ஆஃப் இந்தியா (SBI) ஆய்வறிக்கை தெரிவித்துள்ளது. கடந்த 2024 ஆம் ஆண்டில் இந்தியாவின் மொத்த தங்கத் தேவை 802.8 டன்னாக உயர்ந்தது. இது உலக மொத்தத் தேவையில் 26% ஆகும். அதே சமயம், 815.4 டன்னுடன் சீனா முதல் இடத்தில் உள்ளது.

எஸ்.பி.ஐ. குழுமத்தின் தலைமைப் பொருளாதார ஆலோசகர் டாக்டர். சௌமியா காந்தி கோஷ் வெளியிட்ட அறிக்கையின்படி, இந்தியாவின் தங்கத் தேவையை உள்நாட்டு உற்பத்தி மிக சிறிய அளவிலேயே பூர்த்தி செய்கிறது. 2024 ஆம் ஆண்டில் மொத்தத் தேவையில் சுமார் 86% இறக்குமதி மூலமே சமாளிக்கப்பட்டது. இதன் விளைவாக, 2024 மற்றும் 2025 ஆம் நிதியாண்டுகளில் தங்க இறக்குமதி முறையே 31% மற்றும் 27% அதிகரித்துள்ளது.

விலை அதிகரிப்பால் தேவை சற்று குறைவு :இருப்பினும், தங்கத்தின் விலை கடுமையாக உயர்ந்ததால், 2025 ஆம் ஆண்டின் மூன்றாம் காலாண்டில் தங்கத்திற்கான நுகர்வோர் தேவை கடந்த ஆண்டைவிட சுமார் 16% குறைந்துள்ளது. குறிப்பாக, நகைகளுக்கான தேவை குறைந்ததே இதற்கு முக்கிய காரணம். இதன் காரணமாக, 2026 ஆம் நிதியாண்டின் ஏப்ரல் முதல் செப்டம்பர் வரையிலான காலகட்டத்தில் தங்க இறக்குமதி 9% குறைந்து 26.5 பில்லியன் டாலராக இருந்தது.

மத்திய வங்கியின் இருப்பு : கடந்த 5, 10 மற்றும் 15 ஆண்டு கால அளவில் தங்கத்தின் மீதான வருமானம் பங்குச் சந்தையின் வருமானத்துடன் ஒப்பிடத்தக்க அளவில் உள்ளது. ஆனால், ஒரு வருடம் மற்றும் 3 ஆண்டு கால அளவில், தங்கத்தின் வருமானம் பங்குச் சந்தை வருமானத்தைவிட அதிகமாக உள்ளது.

மத்திய வங்கிகள் தங்கள் தங்க இருப்பை அதிகரிப்பதில் ஆர்வம் காட்டுவது மற்றொரு முக்கியமான போக்கு என்று டாக்டர். கோஷ் குறிப்பிடுகிறார். இந்திய ரிசர்வ் வங்கியின் (RBI) தங்க இருப்பு, மூலோபாய இருப்பு மேலாண்மையின் ஒரு பகுதியாக, 2025 ஆம் ஆண்டில் 880 டன்னாக அதிகரித்துள்ளது.

இந்நிலையில், இந்தியாவில் புதிதாக கண்டுபிடிக்கப்பட்டுள்ள தங்கச் சுரங்கங்கள் இறக்குமதி அழுத்தத்தை குறைக்க உதவும் என்று கூறப்படுகிறது. ஒடிசாவில் உள்ள தியோகர், கியோன்ஜார், மயூர்பஞ்ச் போன்ற பல்வேறு மாவட்டங்களில் சுமார் 1,685 கிலோ தாதுப்பொருள் இருப்பதாக இந்தியப் புவியியல் ஆய்வு கண்டறிந்துள்ளது.

மேலும், மத்தியப் பிரதேசத்தின் ஜபல்பூரில் லட்சக்கணக்கான டன்கள் தங்கம் இருக்கலாம் என்றும், ஆந்திராவின் கர்னூல் மாவட்டத்தில் இந்தியாவின் முதல் பெரிய தனியார் தங்கச் சுரங்கம் ஆண்டுக்கு 750 கிலோ தங்கம் உற்பத்தி செய்யும் என்றும் எதிர்பார்க்கப்படுகிறது. இந்தச் சுரங்கங்கள், இந்தியாவின் வர்த்தகக் கணக்கின் சமநிலைக்கும் சாதகமாக இருக்கும் என்று சொல்லப்படுகிறது.

Sovereign Gold Bonds (SGB) மீதான பார்வை : மக்களிடையே முதலீட்டை ஊக்குவிப்பதற்காக, 2015 நவம்பரில் மத்திய அரசு சவரன் தங்கப் பத்திரங்களை வெளியிடத் தொடங்கியது. பிப்ரவரி 2024 வரை 67 தவணைகள் வெளியிடப்பட்டுள்ளன. அக்டோபர் 23ஆம் தேதி நிலவரப்படி, நிலுவையில் உள்ள SGB-களின் மதிப்பு 125.3 டன்னாக உள்ளது. 2017-18 தொடரின் IV-க்கான மீட்பு விலை ரூ. 12,704 என நிர்ணயிக்கப்பட்டுள்ளது. இந்தத் திட்டத்தால், தங்கத்தின் விலை அதிகரித்ததன் காரணமாக அரசுக்கு ரூ. 93,284 கோடி இழப்பு ஏற்பட்டுள்ளதாக தெரிவிக்கப்பட்டுள்ளது.